অসম বিধানসভাৰ নিৰ্বাচনী ভোটগ্ৰহণ প্ৰক্ৰিয়া সমাপ্ত হোৱাৰ পৰিপ্ৰেক্ষিতত ৰাজ্যৰ বৰ্তমানৰ ৰাজনৈতিক পৰিৱেশ আৰু প্ৰশাসনৰ ভূমিকাৰ ওপৰত তীব্ৰ অসন্তুষ্টি প্ৰকাশ কৰিছে অসম নাগৰিক সন্মিলনে। আজি এক বিবৃতিযোগে অসম নাগৰিক সন্মিলনে মুখ্যমন্ত্ৰী হিমন্ত বিশ্ব শৰ্মাৰ শেহতীয়া বক্তব্যই শালীনতাৰ সীমা অতিক্ৰম কৰা বুলি অভিযোগ উত্থাপন কৰিছে। নিৰ্বাচনকালীন সময়ত বিৰোধী প্ৰাৰ্থী আৰু সংবাদ মাধ্যমৰ ওপৰত চলোৱা মানসিক হাৰাশাস্তি তথা আৰক্ষীৰ পক্ষপাতদুষ্ট আচৰণক সন্মিলনে কঠোৰ ভাষাৰে গৰিহণা দিছে।
অসম নাগৰিক সন্মিলনৰ অভিযোগ অনুসৰি, চৰকাৰে আৰক্ষী বাহিনীক নিজৰ ৰাজনৈতিক স্বাৰ্থত ব্যৱহাৰ কৰি বিৰোধীৰ কণ্ঠ ৰোধ কৰিবলৈ অপচেষ্টা চলাইছে। কংগ্ৰেছ নেতা পৱন খেৰাই মুখ্যমন্ত্ৰীৰ পৰিয়ালৰ বিৰুদ্ধে উত্থাপন কৰা অভিযোগৰ তথ্যভিত্তিক প্ৰত্যুত্তৰ দিয়াৰ পৰিৱৰ্তে আৰক্ষী পঠিয়াই তেওঁক আটক কৰিবলৈ লোৱা পদক্ষেপক সন্মিলনে ‘অগণতান্ত্ৰিক’ বুলি অভিহিত কৰিছে। একেদৰে, মধ্য গুৱাহাটীৰ অজাপৰ প্ৰাৰ্থী কুনকি চৌধুৰীৰ বিৰুদ্ধে কৃত্ৰিম বুদ্ধিমত্তা (AI) ব্যৱহাৰ কৰি অপপ্ৰচাৰ চলোৱাসকলৰ বিৰুদ্ধে আৰক্ষীয়ে কোনো ব্যৱস্থা গ্ৰহণ নকৰাৰ বিপৰীতে চৌধুৰী আৰু তেওঁৰ সতীৰ্থকহে মাজনিশা থানালৈ মাতি নি হাৰাশাস্তি কৰা কাৰ্যই প্ৰশাসনৰ দুমুখীয়া নীতিক স্পষ্ট কৰি তুলিছে।
বিবৃতিটোত উল্লেখ কৰা অনুসৰি, চৰকাৰক সমালোচনা কৰা নিৰ্দিষ্ট কেইটামান সংবাদ মাধ্যমক মুখ্যমন্ত্ৰীয়ে প্ৰকাশ্যে ভাবুকি প্ৰদান কৰাটো গণতন্ত্ৰৰ চতুৰ্থ স্তম্ভৰ বাবে এক অশনি সংকেত। নিৰ্ভয়ে ক্ষমতাধিষ্ঠিত পক্ষৰ ভুল আঙুলিয়াই দিয়াটোৱেই সাংবাদিকৰ কৰ্তব্য যদিও বৰ্তমান ৰাজ্যত সাংবাদিকক কৰ্তব্য পালনত বাধা দিয়াৰ এক পৰিৱেশ সৃষ্টি কৰা হৈছে। ডিব্ৰুগড়ত লুৰিণজ্যোতি গগৈৰ বাসগৃহত চলোৱা তালাচি আৰু বিৰোধীৰ পৰিয়ালৰ বিৰুদ্ধে কৰা অপ্ৰমাণিত ব্যক্তিগত আক্ৰমণক সন্মিলনে গণতান্ত্ৰিক পৰম্পৰাৰ পৰিপন্থী বুলি গণ্য কৰিছে।
বিবৃতিটোত অসম নাগৰিক সন্মিলনে আহ্বান জনাইছে যে নিৰ্বাচনৰ পাছৰ এই সন্ধিক্ষণত বিৰোধী প্ৰাৰ্থীসকলে ইভিএমৰ (EVM) সুৰক্ষাৰ ওপৰত তীক্ষ্ণ নজৰ ৰখা উচিত। বৰ্তমান ৰাজ্যৰ সকলো ইভিএম কঢ়িওৱা বাকচ ষ্ট্ৰং ৰূমত আৱদ্ধ হৈ থকাৰ সময়ত কোনো ধৰণৰ গাফিলতি যাতে নহয়, তাৰ বাবে তেওঁলোকে সজাগ হ’বলৈ সকীয়াই দিছে।
বৰ্তমান চৰকাৰী পক্ষৰ পৰা এই অভিযোগসমূহৰ সন্দৰ্ভত কোনো আনুষ্ঠানিক প্ৰতিক্ৰিয়া প্ৰকাশ পোৱা নাই। অনাগত দিনত প্ৰশাসনৰ ভূমিকা আৰু নিৰ্বাচন আয়োগৰ নিৰপেক্ষতাই ৰাজ্যৰ গণতান্ত্ৰিক সুস্থিৰতা নিৰূপণ কৰিব।
