ৰাজ্যত বিধানসভা নিৰ্বাচনৰ ভোটগ্ৰহণ প্ৰক্ৰিয়া সমাপ্ত হোৱাৰ পাছতো মুখ্যমন্ত্ৰী হিমন্ত বিশ্ব শৰ্মাই সংবাদ মাধ্যম আৰু বিৰোধী ৰাজনৈতিক দলৰ প্ৰাৰ্থীৰ প্ৰতি প্ৰদৰ্শন কৰা ‘অসহিষ্ণু’ আচৰণক লৈ তীব্ৰ উদ্বেগ প্ৰকাশ কৰিছে অসম চিভিল ছ’চাইটিয়ে। আজি এক প্ৰেছ বিজ্ঞপ্তিযোগে সংগঠনটোৱে নিৰ্বাচন আয়োগৰ নিৰপেক্ষতাক লৈয়ো কেতবোৰ গুৰুতৰ প্ৰশ্ন উত্থাপন কৰে। বিশেষকৈ বিৰোধী প্ৰাৰ্থী লুৰিণজ্যোতি গগৈ, কুনকি চৌধুৰী আৰু তেওঁলোকৰ সমৰ্থকসকলৰ প্ৰতি যি ধৰণৰ বৈষম্যমূলক আচৰণ তথা হাৰাশাস্তি কৰা হৈছে, তাৰ ফলত জনসাধাৰণৰ মনত নিৰ্বাচনী ব্যৱস্থাটোৰ প্ৰতি সন্দেহৰ সৃষ্টি হোৱা বুলি সংগঠনটোৱে উল্লেখ কৰে।
অসম চিভিল ছ’চাইটিয়ে অভিযোগ কৰিছে যে বৰ্তমান ৰাজ্যৰ প্ৰশাসনৰ বাঘজৰী নিৰ্বাচন আয়োগৰ হাতত থকাৰ পাছতো বিৰোধীৰ প্ৰতি চলোৱা দমনমূলক কাৰ্যই আয়োগৰ নিৰপেক্ষ ভাৱমূৰ্তিৰ প্ৰতি প্ৰত্যাহ্বান কঢ়িয়াই আনিছে। মধ্য গুৱাহাটী সমষ্টিৰ অসম জাতীয় পৰিষদৰ প্ৰাৰ্থী কুনকি চৌধুৰীৰ বিৰুদ্ধে আৰক্ষী তথা প্ৰশাসনে যি দৰে দ্ৰুত ব্যৱস্থা গ্ৰহণ কৰিছে, তাৰ বিপৰীতে কুনকি চৌধুৰীয়ে দাখিল কৰা গুৰুতৰ অভিযোগসমূহৰ ক্ষেত্ৰত আয়োগৰ ৰহস্যজনক মৌনতাই ৰাইজৰ মনত সন্দেহ বৃদ্ধি কৰিছে। সংগঠনটোৰ মতে, জনসাধাৰণৰ মনত এনে সন্দেহৰ সৃষ্টি হ’লে ভৱিষ্যতে নিৰ্বাচনৰ ফলাফলক লৈয়ো জনসাধাৰণৰ মাজত অবিশ্বাসৰ সৃষ্টি হ’ব পাৰে।
সংগঠনটোৰ সভাপতি হাফিজ ৰছিদ আহমেদ চৌধুৰী আৰু কাৰ্যকৰী সভাপতি আব্দুল মান্নানে মুখ্যমন্ত্ৰী ড° শৰ্মাৰ শেহতীয়া কিছুমান বক্তব্যক ভাৰতীয় গণতান্ত্ৰিক পৰম্পৰাৰ সম্পূৰ্ণ পৰিপন্থী বুলি অভিহিত কৰিছে। বিশেষকৈ ‘অসমীয়া প্ৰতিদিন’, ‘ডিৱাই ৩৬৫’ৰ দৰে সংবাদ প্ৰতিষ্ঠান, অন্যান্য নিউজ প’ৰ্টেল আৰু কুনকি চৌধুৰীৰ পৰিয়ালৰ বিৰুদ্ধে মুখ্যমন্ত্ৰীয়ে যি ধৰণৰ আক্ৰোশমূলক মন্তব্য আগবঢ়াইছে, সেয়া অত্যন্ত দুৰ্ভাগ্যজনক। এনে ধৰণৰ অসহিষ্ণু আচৰণৰ পৰা বিৰত থাকিবলৈ সংগঠনটোৱে মুখ্যমন্ত্ৰীক আহ্বান জনাইছে। লগতে শাসকীয় পক্ষৰ কোনো ধৰণৰ প্ৰৰোচনাত ভৰি নিদিবলৈ সংগঠনটোৱে বিৰোধী দল আৰু সমৰ্থকসকলক সতৰ্ক কৰি দিয়ে। আৰু সুস্থ গণতন্ত্ৰৰ স্বাৰ্থত নিৰ্বাচন আয়োগক অধিক নিৰপেক্ষ আৰু সক্ৰিয় ভূমিকা পালন কৰিবলৈ সংগঠনটোৱে অনুৰোধ জনাইছে।
