মুখ্য মন্ত্ৰী সৰ্বানন্দ সোণোৱাল আৰু মন্ত্ৰী হিমন্ত বিশ্ব শর্মাই নিৰ্বাচনী আচৰণ বিধি উলংঘা কৰাৰ গুৰুতৰ অভিযোগ আনিছে অসম প্ৰদেশ কংগ্ৰেছ কমিটিয়ে।
উল্লেখযোগ্য যে যোৱা ২১ ছেপ্টেম্বৰত দেশজুৰি অহা ২১ অক্টোবৰৰ পৰা হ’বলগীয়া উপ নিৰ্বাচনৰ নিৰ্বাচনী অধিসূচনা জাৰি হয়।
কিন্তু নিৰ্বাচনী অধিসূচনা জাৰি হোৱাৰ পাছতো ২৪ ছেপ্টেম্বৰত মুখ্য মন্ত্ৰী সৰ্বানন্দ সোণোৱাল আৰু স্বাস্থ্য মন্ত্ৰী হিমন্ত বিশ্ব শৰ্মাই কলাক্ষেত্ৰৰ শংকৰদেৱ প্ৰেক্ষাগৃহত চাহ বাগিচাৰ ৬৫১ খন হাস্পতালত ‘বিনামূলীয়া ঔষধ যোগান’ আঁচনিৰ শুভাৰম্ভ কৰাৰ লগতে মন্ত্ৰী শৰ্মাই কালি ‘আপোনাৰ আপোন ঘৰ’ আৰু ‘অভিনন্দন’ নামৰ দুখন আঁচনিৰ শুভাৰম্ভ কৰে।
ইয়াৰ পাছতে আজি কংগ্ৰেছে সৰ্বানন্দ সোণোৱাল নেতৃত্বাধীন ৰাজ্যৰ বিজেপি চৰকাৰে নিৰ্বাচনী আচৰণ বিধি ভংগ কৰাৰ অভিযোগ তুলি ভাৰতৰ মুখ্য নিৰ্বাচনী আয়ুক্ত তথা ৰাজ্যৰ মুখ্য নিৰ্বাচনী বিষয়ালৈ স্মাৰকপত্ৰ প্ৰেৰণ কৰে।
অসম প্ৰদেশ কংগ্ৰেছ কমিটিৰ সাধাৰণ সম্পাদক ৰঞ্জন বৰাৰ স্বাক্ষৰ সম্বলিত স্মাৰকপত্ৰত সোণোৱাল নেতৃত্বাধীন ৰাজ্য চৰকাৰৰ বিৰুদ্ধে বিহিত ব্যৱস্থা গ্ৰহণৰ বাবে দাবী জনায়।
এই সন্দৰ্ভত প্ৰতিক্ৰিয়া প্ৰকাশ কৰি প্ৰদেশ কংগ্ৰেছৰ মুখপাত্ৰ ঋতুপৰ্ণ কোঁৱৰে আমাৰ সাংবাদিকৰ আগত কয়, ‘বিজেপি চৰকাৰে গণতান্ত্ৰিক প্ৰমূল্যবোধ আওকাণ কৰে। নিৰ্বাচন আয়ুক্তকে ধৰি অন্যান্য সাংবিধানিক প্ৰতিষ্ঠানসমূহক বিজেপি নেতৃত্বই গুৰুত্ব দিব নিবিচাৰে’।
সেয়ে ‘সুস্থ গণতান্ত্ৰিক পৰম্পৰা ৰক্ষাৰ স্বাৰ্থত নিৰ্বাচনী কমিটিয়ে ব্যৱস্থা গ্ৰহণ কৰাটো বিচাৰো’ কোঁৱৰে লগতে কয়।