বিহুৰ দিনটোতো একেখন পুৰণি ৰেকৰ্ড বজালে সোণোৱালে, “জাতিটো শংকিত হ’ব নালাগে”

নাগৰিকত্ব সংশোধনী বিধেয়কৰ বিৰোধিতা কৰা অসমৰ জনগণৰ পৰা পলাই ফুৰিবলৈ মুখ্য মন্ত্ৰীয়ে ন ন কৌশল লৈছে যদিও প্ৰতিবাদকাৰীয়ে চেষ্টা এৰা নাই তেওঁক ক’লা পতাকা দেখুৱাবলৈ। আজি নগাৱঁৰ নেহৰুবালিত অনুষ্ঠিত ভোগালী উৎসৱলৈ যোৱা মুখ্য মন্ত্ৰী সৰ্বানন্দ সোণোৱালক ক’লা পতাকাৰ পৰা বচাবলৈ আৰক্ষীয়ে নতুন কৌশল লয়। মুখ্য মন্ত্ৰীৰ কনভয়টো যোৱাৰ পূৰ্বেই এটা আগতীয়া কনভয় প্ৰেৰণ কৰে আৰক্ষীয়ে। ফলত প্ৰতিবাদ কৰিবলৈ ৰৈ থকা প্ৰতিবাদকাৰীসকলক আটক কৰিবলৈ আৰক্ষী সক্ষম হয়।

তৎসত্ত্বেও মুখ্য মন্ত্ৰীৰ কাৰ্য্যসূচীৰ কাষতে এজনে ক’লা বেলুন উৰুওৱা দেখা গ’ল। অৰ্থাৎ আজি বিহুৰ দিনটোতো প্ৰতিবাদৰ সন্মুখীন হ’ব লগীয়া হয় মুখ্য মন্ত্ৰী সোণোৱাল।

ইপিনে প্ৰতিবাদ কৰিবলৈ অহা অসম জাতীয়তাবাদী যুৱ ছাত্ৰ পৰিষদৰ কেইবাজনো সদস্যক আৰক্ষীয়ে আটক কৰাৰ সমান্তৰালভাৱে বিজেপি কৰ্মীসকলেও প্ৰতিবাদকাৰীসকলক বাধা দিয়াৰ চেষ্টা কৰাৰ অভিযোগ উঠিছে। বিজেপিৰ পালিনেতাই প্ৰতিবাদকাৰীক টনা-আঁজোৰা কৰা আৰু শ্ল’গান দিব নোৱৰাকৈ মুখত সোপা দিয়া বুলি অভিযোগ উত্থাপন কৰিছে প্ৰতিবাদকাৰীসকলে।

আনহাতে মুখ্য মন্ত্ৰীজনে আজি ভোগালী উৎসৱত উপস্থিতসকলক ভাষণ দিয়ে সেই একেই পুৰণি ৰেকৰ্ড বজাই। তেওঁ ‘জাতিটো শংকিত হ’ব নালাগে’ বুলি পূৰ্বৰ দৰেই আশ্বাস দিয়ে। তেওঁ জাতিটোক ৰক্ষা কৰিব বুলিও প্ৰতিশ্ৰুতি দিয়ে।

তাৰোপৰি নাগৰিকত্ব সংশোধনী বিধেয়কৰ বিৰোধিতাৰ আন্দোলনবোৰক কংগ্ৰেছ আৰু বাওঁপন্থীৰ ষড়যন্ত্ৰ আখ্যা দিছে মুখ্য মন্ত্ৰীজনে। “কংগ্ৰেছ আৰু বাওঁপন্থীয়ে বিধেয়কখনৰ বিষয়ে মানুহক বিভ্ৰান্ত কৰিছে। ইয়াৰ আঁৰত আগন্তুক লোকসভাৰ নিৰ্বাচন”, সোণোৱালে কয়। আনহাতে তেওঁ অসম চুক্তিৰ ৬ নং দফা ৰূপায়ণৰ বাবে আছুক দায়িত্ব ল’বলৈও আহ্বান জনায়।