অসমৰ মুখ্যমন্ত্ৰী হিমন্ত বিশ্ব শৰ্মাই পুৱা (২৩ মে’) ওড়িশাৰ সম্বলপুৰ ভ্ৰমণ কৰি সমলেশ্বৰী মন্দিৰ পৰিদৰ্শনেৰে যাত্ৰা আৰম্ভ কৰে।মন্দিৰ ভ্ৰমণৰ পাছত শৰ্মা লক্ষ্মীনাথ বেজবৰুৱাৰ বাসগৃহলৈ যায় আৰু লক্ষ্মীনাথ বেজবৰুৱাৰ প্ৰতিমূৰ্তিক শ্ৰদ্ধাঞ্জলি জনায়৷
মুখ্যমন্ত্ৰী হিমন্ত বিশ্ব শৰ্মাই কয় যে, “অসমীয়া সাহিত্যৰ কাণ্ডাৰী সাহিত্যৰথী লক্ষ্মীনাথ বেজবৰুৱাদেৱে প্ৰায় ২০ বছৰ মহানদীৰ পাৰৰ সম্বলপুৰত বাস কৰা গৃহটি আমাৰ ঐতিহ্যপূৰ্ণ সম্পদ৷ সেয়া আমাৰ বাবে এতিয়া তীৰ্থসদৃশ৷ অসমীয়া সাহিত্যৰ অম্লান জ্যোতিষ্কগৰাকীয়ে সম্বলপুৰৰ সাধনা গৃহৰ নিৰ্মল পৰিৱেশত সৃষ্টি কৰা সাহিত্য কৃতিয়ে জাতীয় জীৱনৰ ভাষা-সাহিত্যলৈ অনৱদ্য অৱদান আগবঢ়াইছে৷ তদুপৰি সাহিত্যৰথীয়ে প্ৰকাৰান্তৰে বিভিন্ন দিশত অসম আৰু ওড়িশাৰ মাজতো সমন্বয়ৰ সেতু গঢ়িছিল৷ আমাৰ চৰকাৰে বন্দিত সত্তাগৰাকীৰ সম্বলপুৰৰ গৃহটি মেৰামতি-পুনৰ্নিৰ্মাণ তথা সাহিত্যৰথীৰ প্ৰতিমূৰ্তি নিৰ্মাণৰ পদক্ষেপ গ্ৰহণেৰে ঐতিহ্য সংৰক্ষণৰ কেইবাটাও প্ৰচেষ্টা হাতত লৈছোঁ৷আজি পুৱা ঐতিহ্য সমাহাৰেৰে সমৃদ্ধ বেজবৰুৱাদেৱৰ এই বিখ্যাত গৃহত উপস্থিত হৈ তেখেতলৈ শ্ৰদ্ধাঞ্জলি অৰ্পণ কৰিলোঁ। পৱিত্ৰ বুদ্ধ পূৰ্ণিমাৰ আজিৰ এই পুৱাটি মোৰ স্মৃতিত সদায়ে দোলা দি থাকিব৷’
ভ্ৰমণৰ সময়ত অসমৰ মুখ্যমন্ত্ৰীজনে সাহিত্যৰথী লক্ষ্মীনাথ বেজবৰুৱা স্মৃতি ৰক্ষা সমিতি, সম্বলপুৰৰ আহ্বায়ক দীপক কুমাৰ পাণ্ডাৰ সৈতে আলোচনাত মিলিত হয়।অসমৰ মুখ্যমন্ত্ৰী হিমন্ত বিশ্ব শৰ্মাৰ সংগ দিয়ে কেন্দ্ৰীয় শিক্ষা, দক্ষতা বিকাশ, আৰু উদ্যোগীকৰণ মন্ত্ৰী ধৰ্মেন্দ্ৰ প্ৰধানে।
সংবাদ মাধ্যমক অৱগত কৰি মুখ্যমন্ত্ৰী শৰ্মাই অসম আৰু ওড়িশাৰ মাজত যোগসূত্ৰ ৰাখি ৰাজ্য দুখনৰ মাজত থকা সাংস্কৃতিক আৰু আধ্যাত্মিক বান্ধোনৰ ওপৰত গুৰুত্ব আৰোপ কৰে।
দীপক কুমাৰ পাণ্ডাৰ সৈতে হোৱা আলোচনাৰ সময়ত শৰ্মাই পুনৰ সম্বলপুৰ ভ্ৰমণৰ ইচ্ছা প্ৰকাশ কৰি গংগাধৰ মেহেৰ বিশ্ববিদ্যালয়ত বেজবৰুৱাৰ নাম আসন প্ৰতিষ্ঠা কৰাৰ পৰিকল্পনা ঘোষণা কৰে।
অসমৰ মুখ্যমন্ত্ৰী হিমন্ত বিশ্ব শৰ্মাই বেজবৰুৱাৰ গৃহ ভ্ৰমণৰ অন্তত ঝাৰছুগুডাৰ পৰা পথেৰে সম্বলপুৰলৈ যাত্ৰা কৰি হেলিকপ্টাৰেৰে দেওগড় অভিমুখে ৰাওনা হয়।
উল্লেখযোগ্য যে অসম চৰকাৰে ইতিমধ্যে বেজবৰুৱা ঘৰ সংৰক্ষণৰ বাবে দুটা কিস্তিত ধন আবণ্টন দিছে।বাসগৃহ সংৰক্ষণৰ কাম প্ৰায় শেষ হ’লেই প্ৰতিমূৰ্তি স্থাপন কৰা হ’ব।
