বুধবাৰে গোলাঘাটৰ মৰঙীত সংঘটিত ভয়ংকৰ দুৰ্ঘটনাত গুৰুতৰভাৱে আহত এজন ব্যক্তিৰ যোৰহাট চিকিৎসা মহাবিদ্যায়ত মৃত্যু হয়। ইয়াৰে সৈতে দুৰ্ঘটনাটোত মৃত্যু হোৱা লোকৰ সংখ্যা ৩ জনলৈ বৃদ্ধি পালে।
ইপিনে মুখ্য মন্ত্ৰী সৰ্বানন্দ সোণোৱাল এই সমগ্ৰ ঘটনা তদন্তৰ বাবে উজনি অসমৰ আয়ুক্ত জুৰি সোণোৱালক নিৰ্দেশ দিছে। তেওঁ দুৰ্ঘটনাত পতিত হৈ নিহত হোৱা আবকাৰী বিভাগৰ বিষয়া-কৰ্মচাৰীৰ মৃত্যুত গভীৰ শোক প্ৰকাশ কৰাৰ লগতে আহতসকলৰ আশু আৰোগ্য কামনা কৰে।
উল্লেখযোগ্য যে কালি নিশা মৰঙীৰ ৩৯নং ঘাইপথত বিশেষ অভিযানৰ বাবে যোৰহাট অভিমুখে যোৱা টাটা চুম’ত এথন ডাম্পাৰে খুন্দা মৰাত টাটা চুম’খন জ্বলি ছাই হৈ যোৱাৰ লগতে আবকাৰী পৰিদৰ্শৰ সৈতে দুজনৰ থিতাতে মৃত্যু হৈছিল।
গাড়ীখনত থকা আবকাৰী বিভাগৰ ৬জনীয়া চোৰাংচোৱা দলটোৰ আহত ৪জনক প্ৰথমতে গোলাঘাটৰ অসামৰিক চিকিৎসালয়ত ভৰ্তি কৰোৱা হয় যদিও পিছত ইয়াৰে আবকাৰী বিষয়া হৰেকৃষ্ণ কুমাৰৰ যোৰহাট চিকিৎসা মহাবিদ্যালয়ত মৃত্যু ঘটে।
আনহাতে বাকি তিনিজন ক্ৰমে সূন্দৰ বৰি, টানু ইনজাল আৰু জাহিদুল হকক বৰ্তমান গুৱাহাটী চিকিৎসা মহাবিদ্যালয় হাস্পতাললৈ লৈ অনা হয়।
আবকাৰী মন্ত্ৰী পৰিমল শুক্লবৈদ্যই বিভাগটোৰ বিভিন্ন বিষয়া কৰ্মচাৰীক নিহতৰ আত্মীয়ৰ কাষত এই দুখৰ মুহুৰ্তত থিয় দিবলৈ আহ্বান জনাইছে। ৰাজ্যৰ অতিৰিক্ত আবকাৰী আয়ুক্ত সঞ্জীৱ মেধিৰ নেতৃত্বত এটা দলে ডিফুলৈ গৈ নিহত আবকাৰী বিষয়া চুমু মাইবংছাৰ অন্ত্যেষ্টিক্ৰিয়াত ভাগ ল’ব।
মন্ত্ৰী গৰাকীয়ে জনোৱা মতে উক্ত শোকাৱহ দুৰ্ঘটনাত আহতসকলৰ চিকিৎসাৰ খৰচ চৰকাৰে বহন কৰিব। আহতসকলক উন্নত চিকিৎসা প্রদান কৰাৰ যাৱতীয় ব্যৱস্থা সন্দৰ্ভত মন্ত্ৰী পৰিমল শুক্লবৈদ্যই গুৱাহাটী চিকিৎসা মহাবিদ্যালয় হাস্পতালৰ অধীক্ষকৰে আলোচনা কৰে।
বিষয়টোৰ তদাৰক কৰিবলৈ কামৰূপৰ আবকাৰী অধীক্ষক দেৱজিত নাথক নিৰ্দেশ দিয়া হৈছে।
দুৰ্ঘটনাটোত জ্বলি যোৱা টাটা চুম’খনৰ নম্বৰ হৈছে এ এছ ০১ ডি জে ০৮০১ আৰু ডাম্পাৰখনৰ নম্বৰ এন এল ০৫ জি ১০৪৯।