বিশিষ্ট ৰাজনীতিবিদ, সমাজসেৱক দ্ৰুপদ বৰগোহাঁইৰ পৰলোকপ্ৰাপ্তিত মুখ্য মন্ত্ৰী সৰ্বানন্দ সোণোৱালে গভীৰ শোক প্ৰকাশ কৰিছে। এক শোকবাৰ্তাত মুখ্য মন্ত্ৰী সোণোৱালে কয় যে এগৰাকী সুদক্ষ ৰাজনীতিক হিচাপে অসমৰ আৰ্থ-সামাজিক জীৱনধাৰালৈ প্ৰয়াত বৰগোহাঁইয়ে যি অৱদান আগবঢ়াই গ’ল সেয়া অসমৰ জনসাধাৰণে শ্ৰদ্ধাৰে স্মৰণ কৰিব।
মুখ্য মন্ত্ৰীগৰাকীয়ে লগতে কয় যে এগৰাকী সুদক্ষ, নীতিনিষ্ঠ ৰাজনীতিক হিচাপে বৰগোহাঁইয়ে ৰাজ্যখনৰ আৰ্থ-সামাজিক উত্তৰণৰ বাবে দৃঢ়তাৰে কাম কৰি গৈছে। সাংসদ আৰু বিধায়ক হিচাপে সমাজৰ সকলো শ্ৰেণীৰ জনসাধাৰণ উপকৃত হ’ব পৰাকৈ কাম কৰি যোৱাৰ উপৰি অঞ্চলটোৰ বিভিন্ন অনুষ্ঠান-প্ৰতিষ্ঠানৰ লগত জড়িত থাকি সমাজৰ বিভিন্ন দিশলৈ বিশিষ্ট বৰঙণি আগবঢ়াই গৈছে।
এইগৰাকী প্ৰবীণ ৰাজনীতিকৰ বিয়োগ ৰাজ্যখনৰ সমাজ জীৱনৰ বাবে অপূৰণীয় ক্ষতি বুলিও মুখ্য মন্ত্ৰীয়ে কয়। তদুপৰি সোণোৱালে বৰগোহাঁইৰ বিদেহ আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনোৱাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে।
আনহাতে ৰাজ্য চৰকাৰে এই গৰাকী বিশিষ্ট ৰাজনীতিকৰ শেষকৃত্য ৰাজ্যিক মৰ্যাদাৰে সম্পন্ন কৰাৰ বাবে ব্যৱস্থা গ্ৰহণ কৰিছে। শেষকৃত্য অনুষ্ঠানত শক্তি বিভাগৰ ৰাজ্যিক (স্বতন্ত্ৰ) মন্ত্ৰী তপন কুমাৰ গগৈ উপস্থিত থাকিব।
উল্লেখ্য যে অসমৰ বাওঁ ৰাজনীতিৰ এটা স্তম্ভস্বৰূপ দ্ৰুপদ বৰগোহাঁইৰ আজি পুৱা ৬ বজাত মৃত্যু হয়। ডিব্ৰুগড়ৰ আদিত্য নাৰ্ছিং হ’মত দীৰ্ঘ দিনৰ পৰা চিকিৎসাধীন হৈ থকা বৰ্ষীয়ান ৰাজনীতিবিদজনে ৭৮ বছৰ বয়সত মৃত্যুবৰণ কৰে।
