দেশৰ নিৰ্বাচনী বতাহ গৰম হৈ থকাৰ সময়তে অসমৰ মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাৰ বিৰুদ্ধে একাধিক বিদেশী ৰাষ্ট্ৰৰ পাছপোৰ্ট আৰু নাগৰিকত্ব থকাৰ এক বিস্ফোৰক অভিযোগ উত্থাপন কৰিছে বিৰোধী দল কংগ্ৰেছে। যিজন মুখ্যমন্ত্ৰীয়ে অহৰহ গৌৰৱ গগৈৰ পত্নীৰ নাগৰিকত্ব আৰু দেশপ্ৰেমক লৈ প্ৰশ্ন উত্থাপন কৰি ৰাজনীতি উত্তাল কৰি ৰাখিছে, সেইজন ড° হিমন্ত বিশ্ব শৰ্মাৰ নিজৰ ঘৰতে এতিয়া ওলাইছে এক ভয়ংকৰ পাছপোৰ্ট আৰু নাগৰিকত্বৰ কেলেংকাৰি। দেওবাৰে কংগ্ৰেছৰ জ্যেষ্ঠ নেতা পৱন খেৰাই এখন সংবাদ মেল সম্বোধন কৰি দাবী কৰে যে মুখ্যমন্ত্ৰীৰ পত্নীগৰাকীৰ নামত সংযুক্ত আৰৱ আমিৰশ্বাহী, ইজিপ্ত আৰু এণ্টিগুৱা-বাৰ্বুডাৰ দৰে দেশৰ সক্ৰিয় পাছপোৰ্ট আছে। এই চাঞ্চল্যকৰ তথ্যই সমগ্ৰ ৰাজ্য তথা দেশৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি কৰাৰ লগতে ৰাষ্ট্ৰীয় নিৰাপত্তাৰ দৰে গুৰুত্বপূৰ্ণ বিষয় সন্দৰ্ভত গভীৰ প্ৰশ্নৰ অৱতাৰণা কৰিছে।
আশ্চৰ্যকৰ কথাটো হ’ল, যিগৰাকী মুখ্যমন্ত্ৰীয়ে মুছলমানৰ বিৰুদ্ধে ঘৃণা আৰু ধৰ্মীয় মেৰুকৰণৰ ৰাজনীতি কৰি আহিছে বুলি অভিযোগ আছে, সেইগৰাকী হিমন্ত বিশ্ব শৰ্মাৰ ধৰ্মপত্নীৰ ওচৰত কেনেকৈ দুখনকৈ ইছলামিক দেশৰ পাছপোৰ্ট আছে, তাক লৈ এতিয়া ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছে। কংগ্ৰেছ নেতাগৰাকীয়ে প্ৰকাশ কৰা তথ্য অনুসৰি, মুখ্যমন্ত্ৰীৰ পত্নীৰ ওচৰত ইছলামিক ৰাষ্ট্ৰ সংযুক্ত আৰৱ আমিৰশ্বাহীৰ গোল্ডেন কাৰ্ডৰ লগতে ইজিপ্ত আৰু পূব কেৰিবিয়ান দ্বীপ ৰাষ্ট্ৰ এণ্টিগুৱা-বাৰ্বুডাৰ পাছপোৰ্ট মজুত আছে। ভাৰতীয় সংবিধান আৰু আইন অনুসৰি দেশত দ্বৈত নাগৰিকত্ব সম্পূৰ্ণৰূপে নিষিদ্ধ। এনে প্ৰেক্ষাপটত এগৰাকী মুখ্যমন্ত্ৰীৰ পত্নীয়ে একাধিক বিদেশী ৰাষ্ট্ৰৰ নাগৰিকত্ব কুক্ষীগত কৰি ৰখা কাৰ্য কেৱল চৰম বেআইনীয়েই নহয়, ই ৰাষ্ট্ৰীয় নিৰাপত্তাৰ প্ৰতিও এক গুৰুতৰ ভাবুকি বুলি বিৰোধীয়ে উদ্বেগ প্ৰকাশ কৰিছে। আশ্চৰ্যকৰ বিষয় যে এই আটাইবোৰ পাছপোৰ্ট ড° শৰ্মা ৰাজ্যৰ মুখ্যমন্ত্ৰীৰ আসনত অধিষ্ঠিত হোৱাৰ পিছতেই সংগ্ৰহ কৰা বুলি সংবাদ মেলত অভিযোগ উত্থাপন কৰা হৈছে।
যিগৰাকী মুখ্যমন্ত্ৰীয়ে বিৰোধী নেতা গৌৰৱ গগৈৰ পত্নীৰ নাগৰিকত্বক লৈ নিৰন্তৰ প্ৰশ্ন উত্থাপন কৰি ৰাজনৈতিক পৰিৱেশ উত্তাল কৰি আহিছে, তেওঁৰ নিজৰ পত্নীৰ ক্ষেত্ৰত এনে তথ্য পোহৰলৈ অহাৰ পিছতে বিৰোধীয়ে মুখ্যমন্ত্ৰীৰ দেশপ্ৰেমৰ শ্লোগানৰ তীব্ৰ সমালোচনা কৰিছে। ইয়াৰ লগতে কেন্দ্ৰীয় গৃহ মন্ত্ৰালয়ৰ ভূমিকা সন্দৰ্ভতো প্ৰশ্ন উত্থাপন কৰি পৱন খেৰাই অভিযোগ কৰে যে গৃহমন্ত্ৰী অমিত শ্বাহৰ আশীৰ্বাদপুষ্ট হোৱাৰ বাবেই মুখ্যমন্ত্ৰীৰ পৰিয়ালে আইন ভংগ কৰিলেও কেন্দ্ৰীয় গৃহ বিভাগে নীৰৱতা অৱলম্বন কৰিছে।
আনক কঠোৰ আইনৰ আওতালৈ আনিম বুলি ভাবুকি দি অহা মুখ্যমন্ত্ৰীয়ে নিজৰ পত্নীকো সেই একেই কঠোৰ আইনৰ আওতালৈ অনাৰ দাবী উঠিছে। লগতে ৰাজ্যৰ সচেতন মহলে এতিয়া প্ৰশ্ন কৰিছে— যিগৰাকী মহিলাই ভাৰতীয় আইন উলংঘা কৰি বিদেশী পাছপোৰ্ট আৰু নাগৰিকত্ব লৈছে, তেওঁৰ মুখ্যমন্ত্ৰী স্বামীয়ে কেনেকৈ আনৰ দেশপ্ৰেমৰ প্ৰমাণ পত্ৰ বিলোৱাৰ নৈতিক অধিকাৰ লাভ কৰে? মুখ্যমন্ত্ৰীয়ে নিজৰ পত্নীৰ বিৰুদ্ধে নিৰপেক্ষ তদন্ত ঘোষণা কৰিবলৈ সাহস কৰিবনে বুলি প্ৰশ্ন তুলি কংগ্ৰেছে এই সমগ্ৰ কাণ্ডৰ তদন্তৰ বাবে এখন বিশেষ তদন্তকাৰী দল (এছ আই টি) গঠনৰ দাবী জনাইছে। লগতে, এই চৰকাৰখনে নিৰ্বাচনত পৰাজিত হ’লে বিদেশলৈ পলায়ন কৰাৰ বাবেই এইদৰে পাছপোৰ্ট আৰু বিদেশী সম্পত্তিৰ ব্যৱস্থা কৰি থৈছে নেকি, সেই প্ৰশ্নইও এতিয়া অসমত ব্যাপক ৰূপত চৰ্চা লাভ কৰিবলৈ ধৰিছে।
