পঞ্চায়ত নিৰ্বাচনৰ প্ৰস্তুতি চলিথকাৰ সময়তে অসমত ক্ৰমাৎ বৃদ্ধি পাইছে ৰাজনৈতিক উত্তেজনা। পঞ্চায়ত নিৰ্বাচনৰ পূৰ্বে আৰক্ষীয়ে প্ৰাৰ্থীক ভয় দেখুৱাই অসৎ আচৰণ কৰাৰ অভিযোগ উত্থাপন কৰিছে কংগ্ৰেছ দলে।
অসম আৰক্ষীক জবাবদিহিতাৰ দাবী জনাই শাসকীয় বিজেপিৰ ৰাজনৈতিক হেঁচাত কাম কৰাৰ অভিযোগ উত্থাপন কৰি বৃহস্পতিবাৰে অসম প্ৰদেশ কংগ্ৰেছ কমিটীয়ে গুৱাহাটীস্থিত আৰক্ষী সঞ্চালক প্ৰধানৰ কাৰ্যালয়লৈ প্ৰতিবাদী সমদল উলিয়াই। অসম কংগ্ৰেছৰ মুৰব্বী ভূপেন বৰা আৰু সাংসদ প্ৰদ্যুত বৰদলৈ নেতৃত্বাধীন দলটোৱে সমদল কৰি আহি থাকোতে বাধা প্ৰদান কৰে আৰক্ষীয়ে।
পঞ্চায়ত নিৰ্বাচনৰ দিন চমু চাপি অহাৰ লগে লগে এই ঘটনাই নিকা নিৰ্বাচনী প্ৰক্ৰিয়া সুনিশ্চিত কৰাৰ ক্ষেত্ৰত ৰাজ্যৰ প্ৰশাসন যন্ত্ৰৰ ভূমিকাক লৈ তীব্ৰ অসন্তুস্তি প্ৰকাশ কৰিছে।
কংগ্ৰেছৰ নেতৃত্বই ডিজিপিক প্ৰশ্ন কৰিছে যে অসম আৰক্ষীয়ে মুখ্যমন্ত্ৰী হিমন্ত বিশ্ব শৰ্মাৰ ৰাজনৈতিক স্বাৰ্থত সেৱা আগবঢ়াইছে নে এই ৰাজ্যৰ জনসাধাৰণক সুৰক্ষা প্ৰদানৰ বাবে সাংবিধানিক কৰ্তব্য পালন কৰিছে। যদি আৰক্ষী বিৰোধীৰ এজেণ্ট হয়, তেন্তে কেনেকৈ ন্যায্য নিৰ্বাচন হ‘ব? গণতন্ত্ৰৰ কি হ‘ব?” তেওঁ সমগ্ৰ অসমতে কংগ্ৰেছ প্ৰাৰ্থীক ভাবুকি প্ৰদান কাৰৰ লগতে হাৰাশাস্তি কৰা হৈছে বুলি অভিযোগ উত্থাপন কৰৰিছে।
ন্যায় প্ৰদান নকৰিলে কংগ্ৰেছে প্ৰতিবাদ তীব্ৰতৰ কৰাৰ ভাবুকি দিছে, বৰাই ভাৰতৰ নিৰ্বাচন আয়োগত আনুষ্ঠানিক অভিযোগ দাখিল কৰাৰ কথা ঘোষণা কৰিছে। ইফালে, বিজেপিয়ে এই অভিযোগ নাকচ কৰাৰ লগতে দলৰ এগৰাকী মুখপাত্ৰই কংগ্ৰেছৰ এই কাৰ্যক সাংগঠনিক দুৰ্বলতাৰ পৰা দৃষ্টি আঁতৰাই অনাৰ লক্ষ্যৰে “ৰাজনৈতিক নাটক” বুলি অভিহিত কৰিছে।
উল্লেখযোগ্য যে বেৰহামপুৰ বিধান সভা সমষ্টিৰ অন্তৰ্গত ২ নং কঠিয়াতোলি জিলা পৰিষদ সমষ্টিৰ কংগ্ৰেছ প্ৰাৰ্থী বৰ্ণালী দেৱীৰ সৈতে স্বামী গোবিন নাথক কামৰূপ আৰক্ষীয়ে জিম্মাত লৈছে। স্থানীয় আৰক্ষী থানাত জেৰা চলি আছে যদিও তেওঁক আটক কৰাৰ কাৰণ জানিব পৰা হোৱা নাই।
কংগ্ৰেছ দলে এই ঘটনাক তীব্ৰ গৰিহণা দি বিৰোধীৰ কণ্ঠ দমন কৰি নিৰ্বাচনী প্ৰক্ৰিয়াক ভেঙুচালি কৰাৰ স্পষ্ট প্ৰয়াস বুলি অভিহিত কৰিছে।
