ক্ষমতা দখলৰ স্বাৰ্থত দুজন জনপ্ৰতিনিধিয়ে সাধাৰণ ৰাইজক বিৰোধী পক্ষৰ লোকক আক্ৰমণ কৰিবৰ বাবে দিয়া উচটনিমূলক বক্তব্যত আশ্বৰ্য প্ৰকাশ কৰিছে। অসমৰ দৰে এখন বিভিন্ন জনগোষ্ঠীৰ মাজত ঐক্য আৰু সংহতি বজাই ৰখা ৰাজ্যত নিৰ্বাচিত জনপ্ৰতিনিধিয়ে ক্ষমতাকেন্দ্ৰিক ৰাজনীতি কৰি সাধাৰণ ৰাইজক উচটনি যোগোৱা কাৰ্যক তীব্ৰ ভাষাৰে গৰিহণা দিছে অসম প্ৰদেশ কংগ্ৰেছ কমিটিয়ে।
এক প্ৰেছ বিবৃতিত অসম প্ৰদেশ কংগ্ৰেছ কমিটিৰ সভাপতি ভূপেন কুমাৰ বৰাই আজি কয় যে লখিপুৰৰ বিজেপি সাংসদ প্ৰদান বৰুৱা আৰু জোনাই সমষ্টিৰ বিজেপিৰ বিধায়ক ভূৱন পেগুৱে মানুহক মাৰপিট কৰিবলৈ আৰু প্ৰয়োজন হ’লে একেবাৰে মাৰি পেলাবলৈ যি ৰাজহুৱা বক্তব্য প্ৰকাশ কৰিছে সেয়া দেশৰ সংবিধান বিৰোধী আৰু ভাৰতৰ গণতন্ত্ৰৰ বাবে এক প্ৰত্যাহ্বানস্বৰূপ বুলি উল্লেখ কৰে।
২ মে’ৰ পঞ্চায়ত নিৰ্বাচনৰ পূৰ্বে জোনাইৰ সংগমৰ ৰংগমঞ্চত নিজৰ দলীয় কৰ্মীক এনেদৰে সাধাৰণ ৰাইজৰ বিৰুদ্ধে উচটাই বক্তব্য ৰখা কাৰ্য আইন বিৰুদ্ধ আৰু বিষয়টো আইন-শৃংখলাৰ লগত জড়িত বুলি উল্লেখ কৰি অসম প্ৰদেশ কংগ্ৰেছ কমিটিৰ সভাপতি ভূপেন কুমাৰ বৰাই আজি কয় যে অসমৰ গৃহ বিভাগৰ দায়িত্বত থকা মুখ্যমন্ত্ৰীয়ে তাৎক্ষণিকভাৱে এই অভিযোগৰ তদন্ত কৰা উচিত।
সংবাদ মাধ্যমত এই দুজন নেতাৰ যি ভাষ্য প্ৰকাশ হৈছে সেই বিষয়সমূহ পৰীক্ষা কৰি দুইজন নেতাৰ বিৰুদ্ধে তদন্তৰ ব্যৱস্থা কৰিবৰ বাবে অসমৰ আৰক্ষী সঞ্চালক প্ৰধানৰ ওচৰত প্ৰদেশ কংগ্ৰেছে দাবী উত্থাপন কৰিছে। উল্লেখ্য যে যোৱা ২ মে’ৰ পঞ্চায়ত নিৰ্বাচনৰ ভোটদানৰ সময়ছোৱাত একাংশ লোকৰ গণপ্ৰহাৰত দিব্যজ্যোতি কুটুম নামৰ এজন সমাজ সচেতন ব্যক্তি আঘাতপ্ৰাপ্ত হৈছিল আৰু যোৱা ৪ মে’ত ডিব্ৰুগড়ৰ অসম মেডিকেল কলেজত এই লোকজনৰ মৃত্যু ঘটে।
জনপ্ৰতিনিধিসকলৰ উচটনিমূলক বক্তব্যৰ বাবেই একাংশ ৰাইজ উত্তেজিত হৈ এনে ঘটনা সংঘটিত কৰিলে নেকি সেই কথাৰো তদন্তৰ প্ৰয়োজন আছে বুলি মত প্ৰকাশ কৰিছে। ইয়াৰ পূৰ্বে কংগ্ৰেছ দলৰ কেবাজনো নেতা-কৰ্মীক স্থানীয় বিজেপি সমৰ্থকসকলে আক্ৰমণ কৰি বাহন ক্ষতিগ্ৰস্ত কৰাৰ লগতে গুৰুতৰভাৱে আহত কৰিছিল। সেই ঘটনাৰো উচিত তদন্ত এতিয়ালৈকে নহ’ল বুলি ক্ষোভ প্ৰকাশ কৰে। বিষয়টো গুৰুত্বসহকাৰে লোৱাৰ বাবে আৰক্ষী সঞ্চালক প্ৰধানক অনুৰোধ জনায়। বৰাই লগতে জনপ্ৰতিনিধিসকলক সকলোৰে প্ৰতি সমান দৃষ্টিভংগী দেখুওৱাৰ মানসিকতা গঢ় দিবৰ বাবে আহ্বান জনায়।
