সৰ্বভাৰতীয় কংগ্ৰেছ কমিটিৰ অসমৰ তত্ত্বাৱধায়ক তথা কেন্দ্ৰীয় সাধাৰণ সম্পাদক জিতেন্দ্ৰ সিঙে আজি নিজৰ পদৰ পৰা পদত্যাগ কৰিছে। শেহতীয়া নিৰ্বাচনত দলৰ শোচনীয় ফলাফলৰ বাবে নৈতিক দায়িত্ব স্বীকাৰ কৰি তেওঁ দলীয় শীৰ্ষ নেতৃত্বলৈ পদত্যাগ পত্ৰ প্ৰেৰণ কৰে। তাৎক্ষণিকভাৱে কাৰ্যকৰী হোৱাকৈ প্ৰেৰণ কৰা এই পদত্যাগ পত্ৰই এতিয়া ৰাজ্যিক কংগ্ৰেছৰ ৰাজনীতিত তীব্ৰ চাঞ্চল্যৰ সৃষ্টি কৰিছে।
দলীয় নেতৃত্বলৈ প্ৰেৰণ কৰা পত্ৰখনত জিতেন্দ্ৰ সিঙে উল্লেখ কৰিছে যে নিৰ্বাচনী ফলাফল অত্যন্ত হতাশাজনক আছিল আৰু এজন তত্ত্বাৱধায়ক হিচাপে তেওঁ এই ব্যৰ্থতাৰ সম্পূৰ্ণ দায়িত্ব গ্ৰহণ কৰিছে। তেওঁ স্বীকাৰ কৰে যে নিৰন্তৰ প্ৰচেষ্টাৰ পাছতো দলটোৱে অসমৰ জনসাধাৰণৰ আশা-আকাংক্ষা আৰু বিশ্বাস অৰ্জন কৰাত ব্যৰ্থ হ’ল। অসমৰ ৰাইজৰ সেৱা কৰিবলৈ যি লক্ষ্য আগত লৈ নিৰ্বাচনী যুঁজত অৱতীৰ্ণ হৈছিল, সেই লক্ষ্যত উপনীত হ’ব নোৱাৰাটো তেওঁৰ কাৰ্যকালৰ এক উল্লেখযোগ্য বিফলতা বুলি তেওঁ অভিহিত কৰে।
নিৰ্বাচনী ফলাফলৰ পৰ্যালোচনা কৰি সিঙে তেওঁৰ পত্ৰত অসমৰ ৰাইজৰ লগতে কংগ্ৰেছৰ তৃণমূল পৰ্যায়ৰ কৰ্মী আৰু নেতৃত্বক তেওঁৰ প্ৰতি দেখুওৱা মৰম তথা সন্মানৰ বাবে আন্তৰিক ধন্যবাদ জ্ঞাপন কৰে। তেওঁ উল্লেখ কৰে যে অসমত কাম কৰাৰ সময়ছোৱাত যি বিশ্বাস আৰু সহযোগ লাভ কৰিছিল, সেয়া তেওঁৰ বাবে চিৰস্মৰণীয় হৈ ৰ’ব। পদত্যাগ কৰিলেও তেওঁ কংগ্ৰেছ দলৰ আদৰ্শ আৰু লক্ষ্যৰ প্ৰতি সদায় দায়বদ্ধ থাকিব বুলিও স্পষ্ট কৰি দিয়ে। দলৰ আগন্তুক যিকোনো কাৰ্যসূচী বা দায়িত্বত নিজৰ সহযোগিতা অব্যাহত ৰখাৰো আশ্বাস প্ৰদান কৰে বিদায়ী তত্ত্বাৱধায়কগৰাকীয়ে।
