সংসদৰ শীতলকালীন অধিৱেশনৰ দ্বিতীয় দিনা নুমলীগড় তেল শোধানাগাৰ ব্যক্তিগতকৰণৰ বিৰোধিতাৰে দিল্লীৰ সাংসদ ভৱনৰ সন্মুখত প্ৰতিবাদ সাব্যস্ত কৰে অসমৰ চাৰিগৰাকী কংগ্ৰেছী সাংসদে।
ৰাজ্য সভাৰ সাংসদ তথা প্ৰদেশ কংগ্ৰেছৰ সভাপতি ৰিপুন বৰাৰ নেতৃত্বত হাতে হাতে প্লে’ কাৰ্ড লৈ নগাঁৱৰ সাংসদ প্ৰদ্যুত বৰদলৈ, কলিয়াবৰৰ সাংসদ গৌৰৱ গগৈ, বৰপেটাৰ সাংসদ আব্দুল খালেকে প্ৰতিবাদ সাৱ্যস্ত কৰে।
প্ৰতিবাদত অংশগ্ৰহণ কৰি ৰিপুন বৰাই সংবাদ মাধ্যমৰ আগত কয়, ‘৮৫৫ জন চহিদৰ মৃত্যুৰ বিনিময়ত অসম চুক্তি হৈছিল, তাৰ পাছত নুমলীগড় তেল শোধানাগাৰ অসমৰ ৰাইজে পাইছিল। এই নুমলীগড় তেল শোধানাগাৰ ভাৰত চৰকাৰে ব্যক্তিগত কোম্পানীক বিক্ৰী কৰিব লৈছে।‘
‘ই অসমৰ অৰ্থনীতিৰ অন্যতম ৰাজহাড়। গতিকে অসমৰ ৰাইজে কেতিয়াও ইয়াক সমৰ্থন নকৰে আৰু সেয়েহে লোকসভা, ৰাজ্যসভাৰ অসমৰ কংগ্ৰেছ সাংসদসকলে প্ৰধান মন্ত্ৰী মোদীৰ দৃষ্টি আকৰ্ষণ কৰিবৰ বাবে এই ধৰ্ণা কাৰ্য্যসূচী ৰূপায়ণ কৰিছে’ বৰাই লগতে কয়।
