অসম প্ৰদেশ কংগ্ৰেছৰ সভাপতি ৰিপুন বৰা আৰু সৰ্বভাৰতীয় মহিলা কংগ্ৰেছৰ সভানেত্ৰী তথা শিলচৰৰ সাংসদ সুস্মিতা দেবে শনিবাৰে ধুবুৰী লোকসভা সমষ্টিৰ কংগ্ৰেছ প্ৰাৰ্থী আবু তাহেৰ বেপাৰীৰ হৈ নিৰ্বাচনী প্ৰচাৰ চলায়।
নিৰ্বাচনী প্ৰচাৰত কংগ্ৰেছৰ সভাপতি ৰিপুন বৰাই প্ৰধান মন্ত্ৰী নৰেন্দ্ৰ মোদীক তীব্ৰ সমালোচনা কৰাৰ লগতে মোদীক মিছলীয়া আখ্যা দিয়ে। বৰাই কয় যে ২০১৪ চনৰ নিৰ্বাচনত নৰেন্দ্ৰ মোদীয়ে নিজকে ‘চাইৱালা’ দাবী কৰিছিল আৰু এতিয়া ২০১৯ত নিজকে ‘চকীদাৰ’ বুলি দাবী কৰিছে।
তাৰোপৰি বৰাই কয় যে নৰেন্দ্ৰ মোদীয়ে নিজকে এল পি স্কুলত পঢ়ি থকাৰ সময়তে গুজৰাটৰ ভাভনগৰ ৰে’লৱে ষ্টেশ্যনত চাহ বিক্ৰী কৰা বুলি কৈছিল। কিন্তু প্ৰকৃত কথা হ’ল যে মোদীয়ে দেশৰ জনসাধাৰণৰ সহানুভূতি আদায়ৰ বাবে মিছলীয়া কথাৰে জনসাধাৰণক বিপথে পৰিচালিত কৰিছিল।
যিহেতু বৰাই কয় যে মোদীয়ে ১৯৫০ চনত জন্ম গ্ৰহণ কৰে আৰু গুজৰাটৰ ভাভনগৰ ৰে’লৱে ষ্টেশ্যনটোৰ নিৰ্মাণৰ কাম ১৯৭৩ চনত আৰম্ভ হয়। গতিকে কংগ্ৰেছৰ সভাপতি গৰাকীয়ে নৰেন্দ্ৰ মোদীক ২৩ বছৰ বয়সত এল পি স্কুলত পঢ়িছিল নিকি বুলি প্ৰশ্ন উত্থাপন কৰে।
আনহাতে নিৰ্বাচনী প্ৰচাৰত উপস্থিত মহিলা কংগ্ৰেছৰ সভানেত্ৰী সুস্মিতা দেবেও প্ৰধান মন্ত্ৰী নৰেন্দ্ৰ মোদী, অপগ আৰু বদৰুদ্দিন আজমলক তীব্ৰ সমালোচনা কৰে।
