অসমৰ বিৰোধী ৰাজনীতিক লৈ এই মুহূৰ্তত এক ডাঙৰ খবৰ পোহৰলৈ আহিছে, যিয়ে ৰাজ্যখনৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে। দীৰ্ঘদিন ধৰি চলি থকা বিজেপি বিৰোধী মিত্ৰজোঁটত এইবাৰ ফাঁট মেলাৰ ইংগিত পোৱা গৈছে।
শেহতীয়া সূত্ৰ অনুসৰি, অসম প্ৰদেশ কংগ্ৰেছে অখিল গগৈৰ নেতৃত্বত থকা ৰাইজৰ দলক অবিহনে নিৰ্বাচনত আগবঢ়াৰ সম্ভাৱনা আছে। জানিব পৰা মতে, কংগ্ৰেছে ৰাইজৰ দলক বাদ দি আন বিৰোধী দলসমূহৰ সৈতে এক নতুন মিত্ৰতা গঢ়াৰ দিশে আগবাঢ়িছে।
আজি অসম প্ৰদেশ কংগ্ৰেছৰ সভাপতি গৌৰৱ গগৈয়ে এক গুৰুত্বপূৰ্ণ সংবাদমেল আয়োজন কৰাৰ কথা আছে য’ত আন বিৰোধী নেতাসকলো উপস্থিত থকাৰ সম্ভাৱনা আছে। কিন্তু চৰ্চা চলিছে যে এই গুৰুত্বপূৰ্ণ বৈঠকখনলৈ ৰাইজৰ দলক এতিয়ালৈকে নিমন্ত্ৰণ জনোৱা হোৱা নাই। আগন্তুক বিধানসভা নিৰ্বাচনৰ বাবে কংগ্ৰেছে নিজৰ প্ৰাৰ্থীৰ প্ৰথমখন তালিকা ঘোষণা কৰাৰ পাছৰ পৰাই দুয়োটা দলৰ মাজত সংঘাতৰ আৰম্ভণি হৈছিল।
ৰাইজৰ দলৰ মুৰব্বী অখিল গগৈয়ে কংগ্ৰেছৰ এই সিদ্ধান্তত তীব্ৰ অসন্তুষ্টি প্ৰকাশ কৰিছে। তেওঁ অভিযোগ কৰিছে যে মিত্ৰজোঁটৰ আলোচনা চলি থকাৰ মাজতে কংগ্ৰেছে একপক্ষীয়ভাৱে প্ৰাৰ্থীৰ তালিকা ঘোষণা কৰাটো দুৰ্ভাগ্যজনক। আনহাতে কংগ্ৰেছ নেতৃত্বই এতিয়াও মিত্ৰতাৰ দুৱাৰ খোলা আছে বুলি কৈছে যদিও ইতিমধ্যে অসম জাতীয় পৰিষদৰ সৈতে তেওঁলোকৰ বুজাবুজি চূড়ান্ত হোৱা বুলি নিশ্চিত কৰিছে।
বিৰোধী শিবিৰৰ এই বিভাজনে আগন্তুক নিৰ্বাচনত বিশেষ প্ৰভাৱ পেলাব পাৰে। বিশেষকৈ উজনি অসম আৰু খিলঞ্জীয়া লোকৰ বসতি থকা অঞ্চলবোৰত যদি কংগ্ৰেছ আৰু ৰাইজৰ দলৰ মাজত মিত্ৰতা নহয়, তেন্তে বিৰোধীৰ ভোট বিভাজন হোৱাটো প্ৰায় নিশ্চিত। ইয়াৰ ফলত শাসকীয় পক্ষই লাভান্বিত হোৱাৰ সম্ভাৱনা বৃদ্ধি পাব আৰু কেইবাটাও সমষ্টিৰ ফলাফলত ইয়াৰ প্ৰত্যক্ষ প্ৰভাৱ পৰিব পাৰে।
