নগাঁও জিলাৰ শিলঘাটত অৱস্থিত অসম সমবায় মৰাপাট কলৰ দ্বিতীয় ইউনিটৰ উৎপাদন গোটটো বন্ধ হৈ পৰাৰ ফলত মৰাপাট উদ্যোগটোত অচলাৱস্থাই দেখা দিছে। কলটোৰ প্ৰথম আৰু দ্বিতীয় ইউনিটৰ উৎপাদন গোটৰ দায়িত্বত থকা পশ্চিম বংগৰ চুনু এণ্টাৰপ্ৰাইজ আৰু মৰাপাট কলৰ পৰিচালন সঞ্চালক গুনমনি গগৈৰ মাজত চলি থকা আভ্যন্তৰীণ সংঘাতৰ বাবে এই অচলাৱস্থাৰ সৃষ্টি হৈছে বুলি জানিব পৰা গৈছে।
উদ্যোগটোৰ মূল সমস্যা হৈছে মৰাপাট যোগানকাৰীসকলৰ বিশাল অনাদায়ী ধন। ২০১৯ চনৰ পৰা অসম সমবায় মৰাপাট কলৰ পৰা তেওঁলোকে ৮ কোটি টকা পাবলগীয়া আছে। ইয়াৰ উপৰিও, বিগত তিনি মাহত এই ধনৰ পৰিমাণ ৫ কোটিৰো অধিক টকা হৈছেগৈ। এই ধন অনাদায় হৈ থকাৰ বাবে যোগানকাৰীসকলে বৰ্তমান কলটোলৈ মৰাপাট যোগান ধৰিবলৈ অনিচ্ছুক। ইফালে, শেহতীয়াকৈ মৰাপাটৰ দাম অত্যধিক হাৰত বৃদ্ধি পোৱাত লিজত লোৱা মেচাৰ্চ চুনু এণ্টাৰপ্ৰাইজকো সংকটত পেলাইছে।
ইফালে, চুনু এণ্টাৰপ্ৰাইজৰ হৈ উপ-পৰিচালন সঞ্চালকৰ দায়িত্বত থকা শশী প্ৰকাশ পুৰুহিতে প্ৰাণৰ সংশয়ত ভুগি কোনো গোপন স্থানত আত্মগোপন কৰা বুলি জানিব পৰা গৈছে। এনে উদ্বেগজনক পৰিস্থিতিত মৰাপাট কলৰ পৰিচালনা মণ্ডলীৰ সদস্যসকল আৰু যোগানকাৰীসকলে চিন্তিত হৈ পৰিছে।
পৰিচালন সঞ্চালক গুনমনি গগৈৰ কাৰ্যকালত সংঘটিত বিত্তীয় কেলেংকাৰীৰ তথ্য বিভাগীয় প্ৰতিবেদনত প্ৰকাশ পোৱাৰ লগে লগে পৰিচালনা মণ্ডলীৰ সদস্যসকল তেওঁৰ বিৰুদ্ধে সৰৱ হৈ পৰে। ফলস্বৰূপে, কলটোৰ আভ্যন্তৰীণ সংঘাত দূৰ কৰিবলৈ অধ্যক্ষ কেশৱ মহন্তই এগৰাকী ৰাজপত্ৰিত বিষয়াক দায়িত্ব দিয়াত, পৰিচালনা মণ্ডলীয়ে গগৈৰ পৰিৱৰ্তে এগৰাকী চৰকাৰী ৰাজপত্ৰিত বিষয়াক মৰাপাট কলটোৰ দায়িত্ব অৰ্পণ কৰিবলৈ লিখিত পৰামৰ্শ আগবঢ়ায়।
ইফালে, কলিয়াবৰ মহকুমাৰ সহকাৰী আয়ুক্ত হিমাশ্ৰী ডেকাই মৰাপাট যোগানকাৰীসকলৰ সৈতে আন এখন বৈঠকত মিলিত হয়। এই বৈঠকত যোগানকাৰীসকলে প্ৰাপ্য ধন আদায় দিলে এসপ্তাহৰ ভিতৰত পৰ্যাপ্ত পৰিমাণৰ মৰাপাট যোগান ধৰাৰ লিখিত প্ৰতিশ্ৰুতি প্ৰদান কৰে।
মৰাপাট যোগানকাৰীসকলে পৰৱৰ্তী সময়ত কলটোৰ অধ্যক্ষ তথা মন্ত্ৰী কেশৱ মহন্তকো সাক্ষাৎ কৰি প্ৰাপ্য ধনৰ প্ৰসংগ অৱগত কৰে। মন্ত্ৰী মহন্তই যোগানকাৰীসকলৰ প্ৰাপ্য ধন শীঘ্ৰেই আদায়ৰ আশ্বাস প্ৰদান কৰিছে বুলি তেওঁলোকে জানিবলৈ দিয়ে।
