শুকুৰবাৰে এক সূত্ৰই প্ৰকাশ কৰা অনুসৰি অসমৰ হাইলাকান্দি জিলাত আৰক্ষী জোৱানক আক্ৰমণৰ ঘটনাৰ সৈতে জড়িত এজন আবকাৰী কনিষ্টবলক গ্ৰেপ্তাৰ কৰা হৈছে।
কনিষ্টবলজনৰ নাম অজয় নুনিয়া। সূত্ৰ অনুসৰি দীপাৱলীৰ নিশা হাইলাকান্দিৰ কয়া চাহ বাগিচা এলেকাত এদল ব্যক্তিয়ে আৰক্ষী জোৱানৰ ওপৰত আক্ৰমণ চলায়।
আৰক্ষীয়ে অঞ্চলটোৰ এটা জুৱাৰ ঘাটত অভিযান চলাই থকা অৱস্থাত এদল ব্যক্তিয়ে আক্ৰমণ কৰে। খবৰ অনুসৰি এই আক্ৰমণত ৭ জন আৰক্ষী বিষয়া গুৰুতৰভাৱে আহত হয়।
এই আক্ৰমণৰ নেতৃত্ব দিয়াৰ বাবে অজয় নুনিয়াক গ্ৰেপ্তাৰ কৰা হৈছে বুলি সূত্ৰই প্ৰকাশ কৰিছে। ইয়াৰ উপৰিও এই ঘটনাৰ সৈতে জড়িত দুধনাথ কলৱাৰ আৰু মতিলাল দুসাদ নামৰ আন দুজন সন্দেহযুক্ত লোককো গ্ৰেপ্তাৰ কৰা হৈছে।
