সোমবাৰে বিষয়াসকলে জানিবলৈ দিয়া মতে, অসম চৰকাৰে দুখন জিলাৰ বেদখলৰ পৰা ৪ হাজাৰ বিঘাতকৈ অধিক (৫৪০ হেক্টৰৰো অধিক) মাটি মুক্ত কৰাৰ বাবে সাজু হৈছে আৰু এই অভিযানে প্ৰায় ২৫০০ পৰিয়ালক প্ৰভাৱিত কৰাৰ সম্ভাৱনা আছে।
প্ৰশাসনে মঙলবাৰে ধুবুৰীৰ তিনিখন ৰাজহ গাঁৱৰ ৩০০০ বিঘা মাটি মুকলি কৰিবলৈ ১২০০-১৪০০ পৰিয়ালক উচ্ছেদ কৰাৰ পৰিকল্পনা কৰাৰ লগতে বৃহস্পতিবাৰ বা তাৰ পিছত প্ৰায় ১০৪০ বিঘা বনাঞ্চল মুক্ত কৰাৰ বাবে গোৱালপাৰাৰ প্ৰায় ১১০০ পৰিয়ালক উচ্ছেদ কৰি অনুৰূপ অভিযান চলাব।
ধুবুৰী জিলা প্ৰশাসনৰ এগৰাকী জ্যেষ্ঠ বিষয়াই সংবাদ সংস্থাক জনোৱা মতে, চাপৰ ৰাজহ চক্ৰত আদানী গোটৰ প্ৰস্তাৱিত তাপ শক্তি প্ৰকল্পৰ বাবে মাটি দিবলৈ এই মাটি মুকলি কৰাৰ বাবে উচ্ছেদ অভিযান আৰম্ভ হ’ব।
তেওঁ লগতে কয়, “আদানি গোটক গতাই দিয়াৰ বাবে আমি অসম শক্তি বিতৰণ কোম্পানী লিমিটেডক ৩৫০০ বিঘা আবণ্টন দিছো। তাৰ ভিতৰত প্ৰায় ৩ হাজাৰ বিঘা ১২০০-১৪০০ পৰিয়ালে বেদখল কৰি আছে আৰু সেই মাটিখিনি আমি মুকলি কৰিম।”
এই উচ্ছেদ অভিযান চাৰুৱা বাক্ৰা, চিৰাকুটা আৰু সন্তোষপুৰ গাঁৱত চলোৱা হ’ব আৰু বেদখল কৰা বুলি অভিযোগ উত্থাপন হোৱা ভূমিখিনি খালী কৰিবলৈ গাঁওবাসীক উপযুক্ত জাননী দিয়া হৈছিল বুলি দাবী কৰিছে বিষয়াগৰাকীয়ে।
তেওঁ লগতে কয়, “আথানি চক্ৰৰ বাইজাৰ আলগাত আমি বেদখলকাৰীৰ অস্থায়ী পুনৰ্বাসনৰ বাবে ৩০০ বিঘা মাটি আৱণ্টন দিছো। আমি ৫০ হাজাৰকৈ টকা অনুমোদন জনাইছো আৰু ইতিমধ্যে বহু লোকে স্বেচ্ছাই নিজৰ মাটি এৰি যোৱাৰ আগতে এই ধনৰাশি লাভ কৰিছে।”
এই তিনিখন গাঁৱত বহু পৰিয়ালৰ স্থায়ী ‘পট্টা’ অথবা ভূমিৰ অধিকাৰ থকা বুলি উল্লেখ কৰি চৰকাৰে নিৰ্ধাৰিত মানদণ্ড অনুসৰি ক্ষতিপূৰণ দি ভূমি অধিগ্ৰহণৰ সঠিক প্ৰক্ৰিয়া আৰম্ভ কৰিব বুলিও বিষয়াগৰাকীয়ে জানিবলৈ দিয়ে।
যোৱা মাহত মুখ্যমন্ত্ৰী হিমন্ত বিশ্ব শৰ্মাই শক্তি প্ৰকল্পটোৰ বাবে প্ৰস্তাৱিত স্থান পৰিদৰ্শন কৰিছিল, আৰু ঘোষণা কৰিছিল যে তাত ৩৪০০ মেগাৱাটৰ তাপ বিদ্যুৎ কেন্দ্ৰ স্থাপন কৰা হ’ব আৰু প্ৰকল্পটোৰ বাবে অলপতে নিবিদা আহ্বান কৰা হ’ব।
গোৱালপাৰাত জিলা প্ৰশাসনে কৃষ্ণাই বনাঞ্চলৰ পাইকান সংৰক্ষিত বনাঞ্চলৰ প্ৰায় ১,০৪০ বিঘা মাটি মুকলি কৰাৰ বাবে উচ্ছেদ অভিযান চলাব বুলি গোৱালপাৰাৰ সংমণ্ডল বন বিষয়া (ডি এফ অ’) তেজছ মাৰিস্বামীয়ে জানিবলৈ দিয়ে।
তেওঁ লগতে কয় যে ১০৮০টা পৰিয়ালে বনাঞ্চলৰ মাটি বেদখল কৰিছে আৰু আমি যোৱা বছৰৰ নৱেম্বৰ-ডিচেম্বৰ মাহত তেওঁলোকক খালী কৰিবলৈ কৈছিলোঁ।আমি যোৱা মাহত পুনৰ তেওঁলোকক ১০ জুলাইৰ ভিতৰত অঞ্চলটো এৰি যাবলৈ জাননী দিছিলো।
ইতিমধ্যে বহু পৰিয়ালে বনাঞ্চলৰ পৰা ওলাই গৈছে বুলিও ডি এফ অ’গৰাকীয়ে কয়, আনহাতে উচ্ছেদ অভিযান আৰম্ভ হোৱাৰ পূৰ্বে অহা দুদিনৰ ভিতৰত বাকী থকা পৰিয়ালসমূহো আঁতৰি যাব বুলিও তেওঁ আশা প্ৰকাশ কৰে।
মাৰিস্বামীয়ে কয় যে ২০২৩ চনৰ পৰা আমি চাৰিখন বনাঞ্চলত বেদখলৰ পৰা ৬৫০ হেক্টৰ মাটি মুকলি কৰিছো। তাৰ ভিতৰত ২০০ হেক্টৰত মানুহৰ বাসস্থান আছিল আৰু বাকী ৪৫০ হেক্টৰত খেতি কৰা হৈছিল।
