ধেমাজিত হাহাকাৰ, বানত ক্ষতিগ্ৰস্ত ২০ সহস্ৰাধিক লোক, ধ্বংস ৪ হাজাৰ হেক্টৰ মাটিৰ খেতি
অৰুণাচল প্ৰদেশত যোৱা ৫ দিন ধৰি হৈ থকা ধাৰাষাৰ বৰষুণৰ ফলত ফেনে-ফোটোকাৰে বাঢ়ি অহা নৈসমূহৰ পানীত বুৰ গৈছে ধেমাজি জিলাৰ ৩টাকৈ ৰাজহ চক্ৰৰ শতাধিক গাওঁ। ক্ষতিগ্ৰস্ত হৈছে ২০ সহস্ৰাধিক লোক।
‘ধেমাজি, গোগামুখ আৰু জোনাই ৰাজহ চক্ৰৰ ১১৮ খন গাঁৱৰ ২২,৬৮৯ গৰাকী লোক বছৰৰ এই দ্বিতীয়টো বানত ক্ষতিগ্ৰস্ত হৈছে। বানত নষ্ট হৈছে জিলাখনৰ প্ৰায় ৪০৭৮ হেক্টৰ ভূমিৰ কৃষি,’ জিলা দুৰ্য্যোগ প্ৰশমন বিভাগৰ তথ্যত প্ৰকাশ।
আটাইতকৈ ক্ষতিগ্ৰস্ত জোনাই চক্ৰৰ কবুচাপৰি, মুনমুনি চাপৰি, মেচাকি চাপৰি, মুদৈ চাপৰি আদি বিস্তীৰ্ণ এলেকা বুৰাই পেলাইছে চিয়াং, লালি আৰু ব্ৰহ্মপুত্ৰৰ বাঢ়নী পানীয়ে।
জোনাইত ৮১খন গাঁৱৰ প্ৰায় ১১ হাজাৰ লোক এই বানত ক্ষতিগ্ৰস্ত হৈছে।
মহকুমা প্ৰশাসনে জোনাইত ২টা সাহায্য শিবিৰ স্থাপন কৰি সাহায্য সামগ্ৰী বিতৰণ কৰিছে। ‘১৫৩.১৮ কুইণ্টল চাউল, ২৯.৩৭ কুইণ্টল দাইল, ৮.৮১ কুইণ্টল নিমখ আৰু ৩০০ খন তিৰপাল বানাক্ৰান্তৰ মাজত ইতিমধ্যে বিতৰণ কৰা হৈছে,’ প্ৰশাসনীয় সূত্ৰত প্ৰকাশ।
আনহাতে জীয়াধলৰ পানীয়ে বুৰাইছে ধেমাজি ৰাজহ চক্ৰৰ জইৰামপুৰ আৰু লালুকজান অঞ্চল। প্ৰশাসনে বৃহস্পতিবাৰে ধৰ্মপুৰ প্ৰাথমিক বিদ্যালয়ত সাহায্য শিবিৰ মুকলি কৰি দুখন গাঁৱৰ ৩৫৭গৰাকী লোকক আশ্ৰয় প্ৰদান কৰিছে।
গোগামুখ ৰাজহ চক্ৰৰ কমলপুৰ গাঁৱৰ বিজয় তাঁতী নামৰ এজন যুৱকে বৃহস্পতিবাৰে বানত ডুব গৈ মৃত্যুক সাৱটি লৈছে।
গোগামুখত কুমটীয়া নৈৰ পানীয়ে ৩৫ খন গাওঁ বুৰাই পেলাইছে।
ধাৰাষাৰ বৰষুণৰ ফলত ধেমাজিৰ লগতে অৰুণাচল প্ৰদেশৰ চিয়াং উপত্যকাৰ জীৱনযাত্ৰাও ব্যাহত হৈছে।
বৃহস্পতিবাৰে এই বাতৰি পঠোৱাৰ পৰলৈকে বতৰ মুকলি হোৱা নাই।