অসমত বান পৰিস্থিতিয়ে পুনৰ ভয়াবহ ৰূপ ধাৰণ কৰিছে। ৰাজ্যখনৰ ১২ খন জিলাৰ প্ৰায় ৫.৬৫ লাখ লোক বৰ্তমান বানৰ কবলত পৰাৰ লগতে মৃত্যুৰ সংখ্যা ৩১ জনলৈ বৃদ্ধি পাইছে। বুধবাৰে, ২২ জুলাইত মুখ্যমন্ত্ৰী হিমন্ত বিশ্ব শৰ্মাই সৰ্বাধিক ক্ষতিগ্ৰস্ত শিৱসাগৰ আৰু চৰাইদেউ জিলা পৰিদৰ্শন কৰি বানপীড়িত ৰাইজৰ অৱস্থাৰ বুজ লয়। এই সময়ছোৱাতে তেওঁ বানত প্ৰাণ হেৰুওৱা প্ৰতিগৰাকী ব্যক্তিৰ পৰিয়াললৈ চৰকাৰৰ তৰফৰ পৰা তাৎক্ষণিকভাৱে ৪ লাখ টকাকৈ এককালীন সাহায্য প্ৰদান কৰাৰ কথা ঘোষণা কৰে।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষৰ তথ্য অনুসৰি, যোৱা ২৪ ঘণ্টাত ৰাজ্যত বানপানীৰ ফলত ২১ জন লোকৰ মৃত্যু হোৱাৰ লগে লগে চলিত বৰ্ষত বানত প্ৰাণ হেৰুওৱা লোকৰ সংখ্যা ৩১ জনলৈ বৃদ্ধি পাইছে। শেহতীয়াকৈ মৃত্যু হোৱা লোকসকলৰ ভিতৰত চাৰিগৰাকী মহিলা আৰু দুটা শিশুষহ ১৩ জন শিৱসাগৰৰ, পাঁচজন চৰাইদেউৰ, দুজন গোলাঘাটৰ আৰু এগৰাকী মহিলা যোৰহাটৰ। বৰ্তমান বিশ্বনাথ, চৰাইদেউ, ধেমাজি, ডিব্ৰুগড়, গোলাঘাট, যোৰহাট, কামৰূপ, কামৰূপ মহান মহানগৰ, কাৰ্বি আংলং, নগাঁও, শিৱসাগৰ আৰু তিনিচুকীয়া জিলাৰ ৫.৬৪ লাখতকৈ অধিক লোক বানৰ দ্বাৰা ক্ষতিগ্ৰস্ত হৈছে। ইয়াৰ ভিতৰত শিৱসাগৰ জিলাত আটাইতকৈ বেছি প্ৰায় ৩.৬ লাখ লোক আক্ৰান্ত হোৱাৰ বিপৰীতে যোৰহাটত ৮৮ হাজাৰ আৰু চৰাইদেউত ৭২ হাজাৰ ৫০০ তকৈ অধিক লোক বানৰ কবলত পৰিছে।
বুধবাৰে বানপীড়িত অঞ্চল পৰিদৰ্শন কৰি মুখ্যমন্ত্ৰী শৰ্মাই সংবাদ মাধ্যমৰ আগত কয় যে বানপানীৰ ফলত ৰাজ্যত বিস্তৰ ক্ষতিসাধন হৈছে। তেওঁ ক্ষতিগ্ৰস্ত পৰিয়ালসমূহক আশ্বাস প্ৰদান কৰি কয় যে এই সংকটৰ সময়ত তেওঁলোক অকলশৰীয়া নহয় আৰু চৰকাৰে তেওঁলোকৰ সাহায্য, পুনৰ্সংস্থাপন তথা জীৱিকা ঘূৰাই অনাৰ প্ৰতিটো পদক্ষেপতে থিয় দিছে। অৱশ্যে পথ যোগাযোগ ব্যৱস্থা বিচ্ছিন্ন হোৱাৰ বাবে বৰ্তমানো বহু জলমগ্ন গাঁৱত সাহায্য উপস্থিত হোৱা নাই বুলি মুখ্যমন্ত্ৰীগৰাকীয়ে স্বীকাৰ কৰে। তেওঁ উল্লেখ কৰে যে যাতায়াতৰ কোনো সুচল ব্যৱস্থা নথকাৰ বাবে ঘৰতে আৱদ্ধ হৈ থকা লোকসকলৰ ওচৰলৈ যোৱাটো সম্ভৱ হোৱা নাই। পানী কমাৰ লগে লগে সেই স্থানসমূহত প্ৰশাসনে প্ৰৱেশ কৰিব বুলিও তেওঁ প্ৰতিশ্ৰুতি দিয়ে আৰু চৰকাৰী শিবিৰসমূহত সাহায্য সামগ্ৰীৰ কোনো অভাৱ নাই বুলি স্পষ্ট কৰি দিয়ে।
চৰাইদেউৰ এটা সাহায্য শিবিৰ পৰিদৰ্শন কৰি মুখ্যমন্ত্ৰীয়ে গুৰুতৰভাৱে অসুস্থ লোকসকলক চিকিৎসালয়লৈ স্থানান্তৰ কৰাৰ আশ্বাস দিয়াৰ লগতে বানত হেৰাই যোৱা গুৰুত্বপূৰ্ণ নথিপত্ৰসমূহ পুনৰুদ্ধাৰৰ বাবে চৰকাৰে ব্যৱস্থা গ্ৰহণ কৰিব বুলি জানিবলৈ দিয়ে। সোমবাৰৰ নিশাৰ পৰা বান পৰিস্থিতিৰ দ্ৰুত অৱনতি ঘটিছে। বৰ্তমান ১০ খন জিলাত ২৭৩ টা সাহায্য শিবিৰ আৰু সাহায্য বিতৰণ কেন্দ্ৰ স্থাপন কৰা হৈছে য’ত ১২ হাজাৰ ২৮৪ জন লোকে আশ্ৰয় লৈ আছে। সেনা, ৰাষ্ট্ৰীয় দুৰ্যোগ সঁহাৰি বাহিনী, ৰাজ্যিক দুৰ্যোগ সঁহাৰি বাহিনী, অগ্নিনিৰ্বাপক বাহিনী, আৰক্ষী আৰু অসামৰিক প্ৰশাসনে যুটীয়াভাৱে অভিযান চলাই চৰাইদেউ, গোলাঘাট, যোৰহাট আৰু শিৱসাগৰৰ পৰা ছয় হাজাৰতকৈ অধিক লোকক নিৰাপদ স্থানলৈ উদ্ধাৰ কৰিছে। যোৱা ২৪ ঘণ্টাত প্ৰশাসনে বানপীড়িত পৰিয়ালসমূহৰ মাজত ৫,০১১.০৭ কুইণ্টল চাউল, ৯৫৬.৫৩ কুইণ্টল দাইল, ২৬৫.১৮ কুইণ্টল নিমখ আৰু ২০,১১৫.৪২ লিটাৰ মিঠাতেল বিতৰণ কৰিছে।
চলিত বানপানীয়ে ৰাজ্যৰ ৮৭২ খন গাঁও বুৰাই পেলোৱাৰ সমান্তৰালকৈ ২৪,২১০.৩৫ হেক্টৰ কৃষিভূমি নষ্ট কৰিছে আৰু ১.৮৫ লাখৰো অধিক পশুধন তথা হাঁহ-কুকুৰা ক্ষতিগ্ৰস্ত কৰিছে। ইয়াৰ লগতে বিভিন্ন জিলাত মথাউৰি, পথ, দলং আৰু অন্যান্য আন্তঃগাঁথনিৰ বিস্তৰ ক্ষতিসাধন হৈছে। ইফালে, ভাৰতীয় বতৰ বিজ্ঞান বিভাগে আগন্তুক চাৰিদিনৰ বাবে অসমত বিজুলী-ঢেৰেকণিৰ সৈতে ধাৰাষাৰ বৰষুণৰ পূৰ্বানুমান কৰি হালধীয়া সতৰ্কবাণী জাৰি কৰিছে। বৰ্তমান নিয়ামাটিঘাটত ব্ৰহ্মপুত্ৰৰ জলস্তৰ বিপদসীমাৰ ওপৰেৰে বৈ থকাৰ লগতে শিৱসাগৰত দিখৌ আৰু নাঙলমুৰাঘাটত দিচাং নৈয়ে সৰ্বোচ্চ বানৰ স্তৰ অতিক্ৰম কৰিছে, যিয়ে পৰৱৰ্তী সময়ত সামগ্ৰিক বান পৰিস্থিতিক লৈ অধিক উদ্বেগৰ সৃষ্টি কৰিছে।
