ধাৰাসাৰ বৰষুণৰ বাবে সৃষ্টিহোৱা বান পৰিস্থিতিয়ে অসমত তীব্ৰ সংকটৰ সৃষ্টি কৰিছে। ২২খন জিলাত ৫.৩৫ লাখতকৈও অধিক লোক বানপানীৰ বাবে স্থানচ্যুত হৈছে আৰু বৰ্তমানলৈকে মৃত্যু হোৱা লোকৰ সংখ্যা ১১জনলৈ বৃদ্ধি পাইছে।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষ (ASDMA)ৰ তথ্য অনুসৰি ২২খন জিলাৰ ৬৫টা ৰাজহ চক্ৰ আৰু ১২৫৪খন গাঁৱৰ ৫,১৫,০৩৯জন লোক বানপানীৰ দ্বাৰা প্ৰভাৱিত হৈছে। বানৰ ফলত ১২,৬১০ হেক্টৰ শস্য ভূমি পানীত তল গৈছে, লগতে ৯৪টা জীৱ-জন্তুৰ মৃত্যু হৈছে। আৰু ১৬৫টা সাহায্য শিবিৰত ৩১,২১২জন লোকক আশ্ৰয় দিয়া হৈছে আৰু ১৫৭টা সাহায্য বিতৰণ কেন্দ্ৰ খোলা হৈছে বুলি সদৰী কৰিছে।
সৰ্বাধিক ক্ষতিগ্ৰস্ত জিলাবোৰৰ ভিতৰত শ্ৰীভূমিত ১,৯৪,১৭২জন, কাছাৰত ৭৭,৯৬১জন আৰু নগাঁৱত ৬৭,৮৮০জন লোক বানপানীত পৰিছে। হোজাই জিলাৰ ডবোকা ৰাজহ চক্ৰৰ পৰা এজনৰ মৃত্যু হোৱা বুলি জানিব পৰা গৈছে, যাৰ ফলত মৃতকৰ সংখ্যা ১১লৈ বৃদ্ধি পাইছে। লগতে হাইলাকান্দি আৰু ডিব্ৰুগড়ৰ আন দুজন লোক নিৰুদ্দেশ হৈ আছে বুলি জানিব পৰা গৈছে।
গুৱাহাটী আঞ্চলিক বতৰ বিজ্ঞান কেন্দ্ৰৰ মতে, ৰাজ্যখনৰ বহু ঠাইত মাজনিশাৰ পৰা তীব্ৰ বৰষুণৰ সম্ভাৱনা আছে। বৰষুণৰ ফলত বহু পথ, ৰে’লপথ আৰু ফেৰী সেৱা বন্ধ হৈ পৰিছে। শিলচৰৰ ৰে’ল ষ্টেচনত পানী জমা হোৱাৰ ফলত দুখন ৰে’ল বাতিল কৰা হৈছে, আৰু মাজুলী-যোৰহাটৰ মাজত ফেৰী সেৱাও বন্ধ হৈ আছে।
ব্ৰহ্মপুত্ৰ নদী নিয়ামতীঘাট আৰু তেজপুৰত বিপদসীমাৰ ওপৰেৰে পানী বৈ আছে। তদুপৰি বৰাক নদী ছোটা বেকৰা, ফুলাৰতাল, এ.পি.ঘাট, বি.পি.ঘাটত পানী বিপদসীমাৰ ওপৰেৰে বৈছে। সুবনশিৰি (বদাতিঘাট), বুৰহিদিহিং (খোৱাং), ধনশিৰি (নুমলীগড়), কোপিলী (কামপুৰ, ধৰ্মতুল), ৰুকনি (ঢোলাই), ধলেশ্বৰী (ঘৰমুৰা), কটাখাল (মাটিজুৰি) আৰু কুছিয়াৰা (শ্ৰীভূমি) অদি নদীবোৰত ইয়াৰ প্ৰভাৱ পৰিছে।
উল্লেখ্য যে এতিয়া লৈকে তিনিটাকৈ মথাউৰি ভঙা বুলি জানিবলৈ পোৱা গৈছে আৰু আন দুটা ক্ষতিগ্ৰস্ত হৈছে, লগতে বহু পথ, দলং, বিদ্যুৎৰ খুঁটা, ঘৰ আদিও ক্ষতিগ্ৰস্ত হৈছে। ২১,০৩৭ জন লোক ‘নগৰীয়া বানপানী’ত প্ৰভাৱিত হৈছে। যাৰ বাবে ৪৬৪ জন দুটা সাহায্য শিবিৰত আশ্ৰয় লৈ আছে।
মুখ্যমন্ত্ৰী হিমন্ত বিশ্ব শৰ্মাই লখিমপুৰ জিলাৰ ক্ষতিগ্ৰস্ত অঞ্চলসমূহ পৰিদৰ্শন কৰে। বিশেষকৈ অৰুণাচল প্ৰদেশৰ নীপকো জলবিদ্যুৎ প্রকল্পৰ বান্ধৰ পৰা মুকলি হোৱা পানীয়ে প্লাৱিত কৰা অঞ্চলসমূহ পৰিদৰ্শন কৰে। আমতোলা অঞ্চলৰ পাচানৈ নদীৰ মথাউৰি ভঙাৰ ফলত ব্যাপক ক্ষতি হোৱা বুলি তেওঁ উল্লেখ কৰে।
নিপকোৰ বিষয়ে মন্তব্য কৰি মুখ্যমন্ত্ৰীয়েনীপকোৰ জলবিদ্যুৎ প্ৰকল্পৰ পৰা অঘোষিতভাৱে পানী মুকলি কৰাৰ সন্দেহজনক ঘটনাৰ পূৰ্ণাঙ্গ তদন্তৰ নিৰ্দেশ প্ৰদান কৰাৰ লগতে নীপকো দোষী সাব্যস্ত হ’লে আইনীভাৱে কঠোৰ ব্যৱস্থা গ্ৰহণ কৰা হ’ব বুলিও উল্লেখ কৰে।
ইফালে, অসম কংগ্ৰেছৰ সদ্য নিযুক্ত সভাপতি গৌৰৱ গগৈয়ে ভূমিস্খলনত মৃত্যুবৰণ কৰা পৰিয়ালক সাক্ষাৎ কৰি সহানুভূতি প্ৰকাশ কৰে।
এই সংকটজনক পৰিস্থিতিত ৰাজ্য চৰকাৰে তৎকালীন আৰু দীৰ্ঘম্যাদী সহায়ৰ আশ্বাস প্ৰদান কৰাৰ, লগতে বানপানীৰ ক্ষতিকাৰক প্ৰভাৱ ৰোধৰ বাবে আগন্তুক দিনত অধিক সুসংগঠিত পদক্ষেপ লোৱাৰ কথা ঘোষণা কৰিছে।
