সমগ্ৰ অসমজুৰি আধা কোটি মানুহ আৰু অলেখ জীৱ-জন্তুক জীয়াতু ভোগোৱা চলিত বানক লৈ হুলস্থূলেৰে সমাপ্ত হৈছে বিধান সভাৰ গ্ৰীষ্মকালীন অধিৱেশনৰ প্ৰথমটো দিন।
সদন আৰম্ভ হোৱাৰ লগে লগেই “বান”ক লৈ আলোচনাৰ বাবে বিৰোধীয়ে আগবঢ়োৱা প্ৰস্তাৱ অধ্যক্ষই নাকচ কৰাত হুলস্থূল কৰি সভা ত্যাগ কৰে কংগ্ৰেছ আৰু এ আই ইউ দি এফে।
অধ্যক্ষ হিতেন্দ্ৰ নাথ গোস্বামীয়ে প্ৰশ্নকালত বিষয়টো আলোচনাৰ প্ৰস্তাৱ দিছিল যদিও তাত মান্তি নহৈ প্লাকাৰ্দ জোকাৰি প্ৰতিবাদ কৰি ওলাই যায় দুয়ো বিৰোধী দল।
কিছু সময় পিছত শাসক, বিৰোধী উভয়ে পুনৰ বিষয়টো আলোচনাৰ বাবে সদনত আসন গ্ৰহণ কৰে।
আলোচনা আৰম্ভ হোৱাৰ পিছতে অগপ বিধায়ক বৃন্দাবন গোস্বামী আৰু এ আই ইউ দি এফ বিধায়ক আমিনুল ইছলামে মত প্ৰকাশ কৰে যে, বানক “ৰাষ্ট্ৰীয় সমস্যা”ৰূপে ঘোষণা কৰিব লাগে বুলি সভাই এক প্ৰস্তাৱ ল’ব লাগে।
“অসমৰ বান আৰু গৰাখহনীয়াক ৰাষ্ট্ৰীয় সমস্যাৰূপে ঘোষণাৰ বাবে কেন্দ্ৰৰ কাষ চপাৰ বাবে সদনত এটা প্ৰস্তাৱ গ্ৰহণ কৰা হওক। সকলো সদস্যই দলৰ ঊৰ্ধ্বত থাকি এই সিদ্ধান্তৰ বাবে ঐক্যবদ্ধ হওঁ আহক,” তেজপুৰৰ বিধায়ক গোস্বামীৰ আহ্বান।
অনুৰূপ আহ্বান জনায় ধিঙৰ এ আই ইউ দি এফ বিধায়ক আমিনুল ইছলামেও। “কেৰালাৰ বানতকৈ অসমৰ বান কম গুৰুতৰ নহয়। অসমৰ সম্পদসমূহ যদি কেন্দ্ৰই ৰাষ্ট্ৰীয় সম্পদৰূপে গণ্য কৰে, তেন্তে অসমৰ দুৰ্য্যোগক কিয় ৰাষ্ট্ৰীয় দুৰ্য্যোগৰূপে ঘোষণা নকৰিব?” ইছলামৰ প্ৰস্তাৱ।
কিন্তু, শাসনৰ অংশীদাৰ অগপ আৰু বিৰোধী এ আই ইউ দি এফৰ বিধায়ক দুজনৰ প্ৰস্তাৱক লৈ সদনত কোনো ঐকমত্য সৃষ্টি নহ’ল।
বিৰোধী দলপতি, নাজিৰাৰ বিধায়ক দেৱব্ৰত শইকীয়াই বান নিয়ন্ত্ৰণত বিজেপি নেতৃত্বাধীন কেন্দ্ৰীয় চৰকাৰ বিফল হোৱা বুলি মন্তব্য কৰিলে।
ইয়াৰ বিপৰীতে বানক “ৰাষ্ট্ৰীয় দুৰ্য্যোগ” ঘোষণাৰ গুৰুত্ব অস্বীকাৰ কৰি সমস্যাটো সমাধানৰহে পোষকতা কৰিলে শাসকীয় বিধায়ক মৃণাল শইকীয়াই।
লগতে পঢ়ক– বানত ক্ষতিগ্ৰস্ত অৰ্ধ কোটি লোক, মৃত ৬৬; তথাপি “নিদ্ৰা”ত অসমৰ জল সম্পদ বিভাগ
লগতে পঢ়ক– অসম ডুবিছে বানত; আৰু ব্ৰহ্মপুত্ৰ ব’ৰ্দে ৪০লাখ টকা খেদাইছে মন্ত্ৰী পৰিয়ালৰ বিলাসত
“অসমৰ বানপানীক ৰাষ্ট্ৰীয় সমস্যা বুলি ঘোষণা কৰিলেই সমস্যাটো সমাধান হৈ নাযায়। কেন্দ্ৰই শেহতীয়াকৈ অসমৰ বান-গৰাখহনীয়া অধ্যয়নৰ বাবে ১০০ কোটি টকাত অনুমোদন জনাইছে। এনে পদক্ষেপ আগতে কেতিয়াও লোৱা হোৱা নাছিল,” খুমটাইৰ বিধায়কৰ মন্তব্য।
তেওঁৰ মতে, বিজেপি নেতৃত্বাধীন বৰ্তমানৰ কেন্দ্ৰীয় চৰকাৰে পূৰ্বৰ চৰকাৰসমূহতকৈ সমস্যাটো সমাধানত অধিক নিষ্ঠা প্ৰদৰ্শন কৰিছে।
