শনিবাৰে পঞ্চভূতত বিলীন হ’ল ৰাজ্যৰ প্ৰাক্তন আৰক্ষী সঞ্চালক প্ৰধান খনেন শৰ্মাৰ নশ্বৰ দেহ।
প্ৰচলিত ৰীতি অনুসৰি নৱগ্ৰহ শ্মশানত পুত্ৰই মুখাগ্নি কৰি শেষকৃত্য সম্পন্ন কৰে শৰ্মাৰ।
আনহাতে, সম্পূৰ্ণ ৰাজ্যিক মৰ্য্যাদাৰে শেষ বিদায় জনোৱা হয় প্ৰয়াত প্ৰাক্তন আৰক্ষী সঞ্চালক প্ৰধানগৰাকীক।
শেষকৃত্য সম্পন্ন অনুষ্ঠানত আৰক্ষী আয়ুক্ত দীপক কুমাৰকে ধৰি অসম আৰক্ষীৰ শীৰ্ষ বিষয়া তথা গুণমুগ্ধ সকল উপস্থিত থাকে।
উল্লেখযোগ্য যে, দীৰ্ঘদিন ধৰি কৰ্কট ৰোগত আক্ৰান্ত হৈ থকা শৰ্মাই শুকুৰবাৰে সন্ধিয়া ৭ বজাত গুৱাহাটীৰ ডাউন টাউনস্থিত চানভেলী হাস্পাতালত শেষ নিশ্বাস ত্যাগ কৰিছিল।
১৯৮২-বেটচৰ অসম-মেঘালয় কেডাৰৰ আই পি এছ বিষয়াজনে ৩৩ বছৰ সেৱা আগবঢ়াইছিল।
আৰক্ষী সঞ্চালক প্ৰধান হৈ থকা সময়ছোৱাত অসমৰ উগ্ৰবাদী গোটসমূহৰ সৈতে মোকাবিলা কৰাৰ বাবে জনাজাত হোৱা খগেন শৰ্মাৰ বিয়োগত ৰাজ্যৰ মুখ্য মন্ত্ৰী সৰ্বানন্দ সোণোৱালৰ লগতে বিভিন্ন ব্যক্তিয়ে শোক প্ৰকাশ কৰে।
