অসম চৰকাৰে অলপতে ৰাজ্যখনৰ নতুন আৰু পুৰণি চিনেমা হল পুনৰুজ্জীৱিত কৰি তোলাৰ সিদ্ধান্ত গ্ৰহণ কৰিছে।
এই সন্দৰ্ভত ৰাজ্যখনৰ মুখ্য মন্ত্ৰী সৰ্বানন্দ সোণোৱালে অসম ৰাজ্যিক চলচ্চিত্ৰ বিত্তীয় উন্নয়ন নিগমৰ অধ্যক্ষ যতীন বৰাক চিনেমা গৃহসমূহ পৰ্যবেক্ষণ কৰিবলৈ নিৰ্দেশ দিছে।
চৰকাৰ সিদ্ধান্ত মৰ্মে, ৰাজ্যিক চলচ্চিত্ৰ বিত্তীয় উন্নয়ন নিগমৰ অধ্যক্ষ, বিশিষ্ট অভিনেতা তথা চলচ্চিত্ৰ নিৰ্মাতা যতীন বৰাই যোৱা সপ্তাহত তেজপুৰৰ ঐতিহাসিক জোনাকী চিনেমা হল পৰিদৰ্শন কৰে।
তেওঁ এই ঐতিহ্যমণ্ডিত চিত্ৰগৃহটোৰ স্বত্ত্বাধিকাৰীৰ সৈতে মত বিনিময় কৰে।
সাক্ষাতৰ সময়ত যতীন বৰাই অহা অক্টোবৰত জোনাকী চিনেমা হলক ‘ঐতিহ্য’ৰ মৰ্যাদা প্ৰদান কৰা হ’ব বুলি ঘোষণা কৰে।
তেওঁ তেজপুৰ ভ্ৰমণৰ সময়ত শোণিতপুৰৰ উপায়ুক্ত নৰসিং পাৱাৰৰ সৈতে এক বিতং আলোচনাত মিলিত হয়।
আলোচনাৰ সময়ত দুয়োগৰাকীয়ে চিত্ৰ গৃহটো পুনৰুজ্জীৱিত কৰা সম্পৰ্কে আলোচনা কৰে।
পুনৰুজ্জীৱিত কৰি তোলা জোনাকী চিত্ৰগৃহটো অহা ৩ অক্টোবৰত মুখ্য মন্ত্ৰী সোণোৱালে মুকলি কৰাৰ সম্ভাৱনা আছে।
ৰাজ্য চৰকাৰে পুৰণি চিত্ৰ গৃহৰ পুনৰুজ্জীৱিতকৰণৰ বাবে ২৫ লাখ টকাৰ আৰু নতুন চিত্ৰগৃহৰ বাবে ৫০ লাখ টকাৰ অনুদান আগবঢ়োৱাৰ সিদ্ধান্ত গ্ৰহণ কৰিছে।
জোনাকী চিত্ৰ গৃহটো অসমত নিৰ্মাণ কৰা প্ৰথমটো চিত্ৰগৃহ।
এইটো ১৯৩৭ চনত অসমৰ প্ৰথমগৰাকী চলচ্চিত্ৰ নিৰ্মাতা ৰূপকোঁৱৰ জ্যোতিপ্ৰসাদ আগৰৱালাই প্ৰতিষ্ঠা কৰিছিল।
১৯৩৫ চনত যেতিয়া জ্যোতিপ্ৰসাদে প্ৰথমখন অসমীয়া চলচ্চিত্ৰ ‘জয়মতী’ নিৰ্মাণ কৰিছিল, তেতিয়া ৰাজ্যখনত কোনো স্থায়ী চিত্ৰগৃহ নাছিল আৰু তেওঁ এটা সাজি লোৱা প্ৰেক্ষাগৃহত তেওঁৰ ছবি প্ৰদৰ্শন কৰিছিল।
তেওঁ জোনাকী প্ৰেক্ষাগৃহটো উন্নত কৰি ১৯৩৭ চনত এটা স্থায়ী চিত্ৰ গৃহ হিচাপে প্ৰতিষ্ঠা কৰিছিল।
