ৰাজ্য চৰকাৰে অৰুণোদয় আঁচনিৰ নামত প্ৰদান কৰা মাহেকীয়া ভাট্টা লাভ কৰা হিতাধিকাৰীসকলৰ ঘৰৰ সন্মুখত এইবাৰ ৰাজহুৱাকৈ লাগিব ‘অৰুণোদয় হিতাধিকাৰীৰ ফলক’।
আজি মুখ্যমন্ত্ৰী হিমন্ত বিশ্ব শৰ্মাই ওদালগুৰিৰ এখন ৰাজহুৱা সভাত এই ঘোষণা কৰিছে।
ওদালগুৰিত নতুনকৈ স্থাপন কৰা ২৫ মেগাৱাট শক্তি সম্পন্ন সৌৰ শক্তি প্ৰকল্পৰ উদ্বোধন কৰি মুখ্যমন্ত্ৰী শৰ্মাই নিজ ভাষণত অৰুণোদয় সম্পৰ্কে এই ঘোষণা কৰে।
মূলত: অৰুণোদয় আঁচনিৰ সুবিধা গ্ৰহণ কৰি থকা অৰ্থনৈতিকভাৱে সবল লোকসকলৰ নাম কৰ্তনৰ বাবেই এইদৰে ফলক লগোৱাৰ পৰিকল্পনা কৰা হৈছে বুলি হিমন্ত বিশ্ব শৰ্মাই দাবী কৰে।
মুখ্যমন্ত্ৰীৰ ঘোষণা অনুসৰি এতিয়াৰ পৰা চৰকাৰী চাকৰি কৰা আৰু আৰ্থিকভাৱে সবল পৰিয়ালে স্বইচ্ছাৰে অৰুণোদয় আঁচনি এৰিব লাগিব।
যাতে কেৱল যোগ্য ব্যক্তিয়ে অৰুণোদয় আঁচনিৰ সুবিধা লাভ কৰে, তাৰ বাবে প্ৰতিটো হিতাধিকাৰীৰ পৰিয়ালৰ ঘৰত অৰুণোদয় ফলক লগোৱা হ’ব বুলি হিমন্ত বিশ্ব শৰ্মাই উল্লেখ কৰে।
আনহাতে অহা ১০ অক্টোবৰৰ পৰা অৰুণোদয় আঁচনিৰ ধন এহেজাৰ টকাৰ পৰা ১২৫০ টকালৈ বৃদ্ধি হ’ব বুলিও তেওঁ ঘোষণা কৰে।
এই অতিৰিক্ত ২৫০ টকা কাৰেণ্টৰ বিল হিচাপে চৰকাৰে পৰিশোধ কৰিব বুলি তেওঁ জানিবলৈ দিয়ে।
পূৰ্বৰ পৰা অৰুণোদয় আঁচনিৰ ধন লাভ কৰি থকা হিতাধিকাৰীৰ লগতে প্ৰতিটো সমষ্টিত ৬ হাজাৰ পৰিয়ালে নতুনকৈ অৰুণোদয় আঁচনি লাভ কৰিব বুলিও হিমন্ত বিশ্ব শৰ্মাই ঘোষণা কৰে।
