এক ব্যক্তিগত ভ্ৰমণসূচীলৈ দেওবাৰে সপৰিবাৰে বোকাখাতৰ বিহৰা চাহ বাগিছাত উপস্থিত হয় অসমৰ ৰাজ্যপাল জগদীশ মুখী।
দেওবাৰে বিয়লি হেলিকপ্তাৰেৰে বিহৰা চাহ বাগিচাৰ হেলিপেডত অৱতৰণ কৰে পৰিয়ালসহ ৰাজ্যপাল মুখীয়ে।
বিহৰা চাহ বাগিচাত অৱতৰণ কৰাৰ পাছতে তেওঁ বাগিছাৰ পৰিচালকৰ বাংলোলৈ গৈ পৰিচালকৰ আতিথ্য গ্ৰহণ কৰে।
বিয়লি ৩ বজাত ৰাজ্যপাল জগদীশ মুখীয়ে পৰিবাৰ আৰু পৰিয়ালৰ সদস্যৰে সৈতে কাজিৰঙা ৰাষ্ট্ৰীয় উদ্যানৰ অগৰাতলি বনাঞ্চলত জীপ চাফাৰী কৰে ৷
জীপ চাফাৰীৰ সময়ত ৰাজ্যপাল গৰাকীক কাজিৰঙাৰ সঞ্চালক আৰু বন সংমণ্ডল বিষয়াৰ লগতে অনান্য বিষয়াসকলেও সংগ দিয়ে।
আনহাতে, ৰাজ্যপালগৰাকীক কাজিৰঙা ৰাষ্ট্ৰীয় উদ্যান কৰ্তৃপক্ষ আৰু অগৰাতলি জীপ চাফাৰী সন্থাই ফুলাম গামোছা আৰু উপহাৰৰ টোপোলাৰে আদৰণি জনায়।
জগদীশ মুখীয়ে অগৰাতলি বনাঞ্চলৰ চহলা বিল আৰু দৰ্শন চূডা়ৰ পৰা কাজিৰঙাৰ বন আৰু বন্যপ্ৰাণীৰ লগতে সৌন্দৰ্যও উপভোগ কৰে।
ৰাজ্যপাল গৰাকীয়ে ভ্ৰমণৰ সময়ত কাজিৰঙাৰ সৌন্দ্যৰ্যত অভিভূত হোৱাৰ লগতে ৰাষ্ট্ৰীয় উদ্যানখনৰ সুপৰিচালনাৰ বাবে কৰ্তৃপক্ষৰ শলাগ লয়।
অগৰাতলি দৰ্শনৰ পাচত ৰাজ্যপালগৰাকীয়ে পুনৰ বিহৰা চাহ বাগিছালৈ উভতি আহে।
ৰাজ্যপালৰ সন্মানাৰ্থে বাগিছা কৰ্তৃপক্ষই নিশা সাংস্কৃতিক কাৰ্যসুচীৰো আয়োজন কৰে।
নিশাতো বিহৰা বাগিছাত কটাই সোমবাৰে ৰাতিপুৱা তেওঁ কাজিৰঙাৰ কহঁৰা বনাঞ্চলৰ মিহিমুখত হাতীৰে উদ্যান দৰ্শন কৰিব।