অসমত চলিত বৰ্ষত বানপানীয়ে বিস্তৰ ক্ষতিসাধন কৰিছে। শুকুৰবাৰে অসমৰ ৰাজ্যপাল জগদীশ মুখীয়ে চিৰাং জিলাৰ বান পৰিস্থিতি পৰিদৰ্শন কৰাৰ লগতে মালিপাৰা মাধ্যমিক বিদ্যালয়ত স্থাপন কৰা অস্থায়ী বান শিৱিৰত উপস্থিত হৈ বানাক্ৰান্ত লোক সকলৰ খবৰ লয়।
চিৰাং জিলাৰ বান পৰিস্থিতি পৰিদৰ্শন কৰি তেওঁ অসমৰ বানপানীক লৈ গভীৰভাৱে উদ্বিগ্ন বুলি কোৱাৰ লগতে চৰকাৰে বানপানীৰ ফলত ক্ষতিগ্ৰস্ত লোক আৰু পশুধনৰ সহায়ৰ আৰু সাহায্যৰ বাবে চেষ্টা অব্যাহত ৰাখিছে বুলি মন্তব্য কৰে।
বান শিৱিৰত ৰাজ্যপাল গৰাকীয়ে বানাক্ৰান্ত লোক সকলৰ লগত মত বিনিময় কৰি তেওঁলোকৰ অভাৱ অভিযোগৰ বুজ লয়।
পৰিদৰ্শন কালত মুখীয়ে জিলা উপায়ুক্তক শিশু, বৃদ্ধলোক, গৰ্ভৱতী মহিলা সকলক সাহায্যৰ ক্ষেত্ৰত কোনোধৰণৰ ক্ৰতি নাৰাখিবলৈ নিৰ্দেশ দিয়ে।
আনহাতে, অস্থায়ী বান শিৱিৰৰ পৰিস্কাৰ-পৰিচ্ছন্নতা আৰু উপলব্ধ হোৱা বিশুদ্ধ খোৱাপানীৰ বাবে ৰাজ্যপাল মুখীয়ে জিলা উপায়ুক্ত গৰাকীক ধন্যবাদ জ্ঞাপন কৰে।
অস্থায়ী বান শিৱিৰত উপলব্ধ হোৱা চিকিৎসা সেৱাৰ বাবেও তেওঁ চিৰাং জিলা কৰ্তৃপক্ষৰ শলাগ লয়।
তদুপৰি, ক’ৰ’না ভাইৰাছৰ সংক্ৰমণৰ সময়ত ৰাজ্যপাল গৰাকীয়ে জিলা প্ৰশাসনক বানপানীৰ সময়ত স্বাস্থ্য বিভাগে বান্ধি দিয়া সকলো ধৰণৰ নীতি-নিৰ্দেশনা পালন কৰাৰ বাবেও আহ্বান জনায়।