কাৰ্বি আংলঙত ব্যক্তিগত খণ্ডৰ বৃহৎ শক্তি প্ৰকল্পক সুৰক্ষা দিবলৈ অসম চৰকাৰে এপিডিচিএলক ঢাল হিচাপে ব্যৱহাৰ কৰাৰ গুৰুতৰ অভিযোগ উত্থাপন হৈছে। পাহাৰীয়া জিলাখনৰ জনজাতীয় নেতা তথা অল পাৰ্টি হিল লিডাৰ্ছ কনফাৰেন্সে (এপিএইচএলচি) অভিযোগ কৰিছে যে ষষ্ঠ অনুসূচীভুক্ত এলেকাত ব্যক্তিগত কোম্পানীক বনভূমিৰ আবণ্টন দিয়াৰ পথ মুকলি কৰিবলৈ চৰকাৰে ৰাজ্যিক শক্তি বিভাগটোক সন্মুখত ৰাখিছে।
এপিএইচএলচিৰ মতে আচলতে এই পাম্পড ষ্টোৰেজ শক্তি প্ৰকল্পসমূহৰ দ্বাৰা লাভান্বিত পক্ষ হ’ল একাংশ বৃহৎ ব্যক্তিগত কৰ্পোৰেট গোষ্ঠী। চৰকাৰে কেৱল বিধিগত বন বিভাগৰ অনুমতি লাভৰ প্ৰক্ৰিয়াটো সহজ কৰিবলৈ এপিডিচিএলক ব্যৱহাৰ কৰিছে যাতে জনজাতীয় লোকৰ ভূমি হস্তান্তৰত থকা বাধা-নিষেধসমূহ কৌশলেৰে এৰাই চলিব পৰা যায়।
সংগঠনটোৱে কেন্দ্ৰীয় পৰিৱেশ আৰু বন মন্ত্ৰালয়লৈ প্ৰেৰণ কৰা এক স্মাৰকপত্ৰত উল্লেখ কৰিছে যে এই সমগ্ৰ প্ৰক্ৰিয়াটো অত্যন্ত অস্বচ্ছ আৰু ইয়াৰ ফলত কাৰ্বি আংলঙৰ খিলঞ্জীয়া জনজাতীয় লোকসকলৰ ভূমি আৰু জীৱিকাৰ প্ৰতি চৰম ভাবুকি নামি আহিছে। চৰকাৰৰ এনে কাৰ্যক সাংবিধানিক সুৰক্ষা কৱচ আৰু পৰিৱেশ আইনৰ প্ৰতি এক ডাঙৰ প্ৰত্যাহ্বান বুলি অভিহিত কৰিছে।
তথ্য অনুসৰি অসম চৰকাৰে কাৰ্বি আংলঙৰ ফুলনী অঞ্চলত তিনিটা শক্তি প্ৰকল্পৰ বাবে বনভূমি ব্যৱহাৰৰ প্ৰস্তাৱ কেন্দ্ৰলৈ প্ৰেৰণ কৰিছে। এই সকলোবোৰ প্ৰস্তাৱত এপিডিচিএলক ব্যৱহাৰকাৰী সংস্থা হিচাপে দেখুওৱা হৈছে যদিও ইয়াৰ অন্তৰালত গ্ৰীণকো এনার্জীজ প্ৰাইভেট লিমিটেডৰ দৰে কোম্পানী জড়িত থকাৰ প্ৰমাণ পোৱা গৈছে।
প্ৰকল্পসমূহৰ বাবে লংলকচ’ প্ৰস্তাৱিত সংৰক্ষিত বনাঞ্চলৰ ৪৪১.৯ হেক্টৰ আৰু আমচলোং প্ৰস্তাৱিত সংৰক্ষিত বনাঞ্চলৰ প্ৰায় ২২৩ হেক্টৰ ভূমি ডাইভাৰচন কৰাৰ পৰিকল্পনা কৰা হৈছে। যিহেতু এই অঞ্চলসমূহ কাৰ্বি আংলং স্বায়ত্তশাসিত পৰিষদৰ অধীনত আহে গতিকে এনে চৰকাৰী পদক্ষেপে পৰিষদৰ স্বায়ত্তশাসনৰ ওপৰতো প্ৰশ্নচিহ্নৰ সৃষ্টি কৰিছে।
এপিএইচএলচিয়ে অভিযোগ কৰিছে যে চৰকাৰে প্ৰকৃত প্ৰকল্প বিকাশকসকলৰ পৰিচয় ইচ্ছাকৃতভাৱে গোপন কৰি ৰাখিছে। গ্ৰীণকো এনার্জীজে ইতিমধ্যে এই প্ৰকল্পসমূহৰ বাবে স্বতন্ত্ৰভাৱে আবেদন জনাইছিল যদিও পিছলৈ সেইসমূহ এপিডিচিএলৰ নামলৈ স্থানান্তৰ কৰা হয় যিয়ে প্ৰমাণ কৰে যে চৰকাৰী বিভাগটোক কেৱল প্ৰক্সি হিচাপে ব্যৱহাৰ কৰা হৈছে।
এপিএইচএলচিৰ মতে যিসকলপৰা ভূমি আৰু অৰণ্য কাঢ়ি লোৱা হ’ব তেওঁলোকে জানিবলৈ অধিকাৰ আছে যে তেওঁলোকৰ জন্মভূমিত কাৰ নিয়ন্ত্ৰণ থাকিব আৰু ইয়াৰ পৰা কোনে লাভ অৰ্জন কৰিব। তথ্য গোপন কৰি বন বিভাগৰ অনুমতি লোৱাটো ১৯৮০ চনৰ বন সংৰক্ষণ আইনৰ সম্পূৰ্ণ উলংঘা বুলিও তেওঁলোকে দাবী কৰিছে।
ইমানতে ক্ষান্ত নাথাকি পাহাৰীয়া নেতাসকলে অভিযোগ কৰিছে যে চৰকাৰে ২০০৬ চনৰ বন অধিকাৰ আইনো (FRA) আওকাণ কৰিছে। বন বিভাগৰ প্ৰস্তাৱত চৰকাৰে স্বীকাৰ কৰিছে যে প্ৰভাৱিত অঞ্চলসমূহত বন অধিকাৰৰ স্বীকৃতি দিয়াৰ কাম এতিয়াও সম্পূৰ্ণ হোৱা নাই কিন্তু তথাপিও পিছত প্ৰমাণপত্ৰ দিয়াৰ প্ৰতিশ্ৰুতিৰে প্ৰকল্প আগবঢ়াই নিয়া হৈছে।
এপিএইচএলচিৰ নেতা জ’নছ ইংতি কাথাৰৰ মতে বন অধিকাৰ আইনখন কেৱল চৰকাৰী কামৰ নামত টিক চিহ্ন দিয়াৰ বস্তু নহয়। বনাঞ্চলৰ ভূমি কৰ্পোৰেটৰ হাতত গতাই দিয়াৰ পূৰ্বে গ্ৰাম সভাৰ সন্মতি আৰু লোকসকলৰ অধিকাৰ সাব্যস্ত কৰাটো আইনগতভাৱে বাধ্যতামূলক আছিল যিটো এইক্ষেত্ৰত হোৱা নাই।
স্থানীয় গাঁও পৰিষদসমূহৰ পৰা কোনো ধৰণৰ আগতীয়া সন্মতি নোলোৱাকৈ চৰকাৰে লোৱা এই সিদ্ধান্তই খিলঞ্জীয়া লোকসকলৰ মাজত তীব্ৰ প্ৰতিক্ৰিয়াৰ সৃষ্টি কৰিছে। লোকসকলে আজিও নাজানে এই প্ৰকল্পসমূহৰ দ্বাৰা পৰিৱেশৰ কিমান ক্ষতি হ’ব বা ইয়াৰ দ্বাৰা কাৰ আচলতে উন্নতি হ’ব।
দলটোৱে সতৰ্ক কৰি দিছে যে চৰকাৰী খণ্ডক ঢাল হিচাপে ব্যৱহাৰ কৰি ব্যক্তিগত কোম্পানীক সুবিধা কৰি দিয়াৰ এই ধাৰাটোৱে সমগ্ৰ দেশৰ বাবে এক বিপদজনক উদাহৰণ দাঙি ধৰিব। ইয়াৰ ফলত জনজাতীয় লোকসকলৰ সন্মতিৰ প্ৰক্ৰিয়া দুৰ্বল হ’ব আৰু সংবিধানৰ সুৰক্ষা কৱচসমূহ কেৱল কাগজতে সীমাবদ্ধ হৈ পৰিব।
এপিএইচএলচিয়ে কেন্দ্ৰীয় মন্ত্ৰালয়ক এই প্ৰস্তাৱসমূহ তৎকালীনভাৱে স্থগিত ৰাখিবলৈ আহ্বান জনাইছে। তেওঁলোকে দাবী কৰিছে যে প্ৰকল্পৰ প্ৰকৃত লাভান্বিত পক্ষৰ নাম ৰাজহুৱা কৰাৰ লগতে বন অধিকাৰ আইনৰ সঠিক পালন নোহোৱালৈকে যাতে কোনো ধৰণৰ বনভূমি হস্তান্তৰ কৰা নহয়।
