পুনৰ চৰ্চালৈ আহিছে অসমৰ সমষ্টি পুনৰ নিৰ্দ্ধাৰণৰ প্ৰসংগ।
দেশৰ কেইবাখনো ৰাজ্যৰ লগতে অসমতো সমষ্টি পুনৰ নিৰ্দ্ধাৰণৰ বাবে কেন্দ্ৰীয় চৰকাৰে তৎপৰতা প্ৰদৰ্শন কৰাৰ সময়তে অসম চৰকাৰে ৰাজ্যৰ সকলো জিলা উপায়ুক্তক সংশ্লিষ্ট জিলা সমূহৰ প্ৰশাসনিক আৰু উন্নয়ন খণ্ড সমূহৰ পাৰিসংখ্যিক তথ্যৰ লগতে প্ৰয়োজনীয় মানচিত্ৰ প্ৰেৰণৰ নিৰ্দেশ দিছে।
ইয়াৰ বাবে চৰকাৰে ৯ আগষ্টৰ ভিতৰতে এই সম্পৰ্কীয় তথ্য সমূহ যোগান ধৰাৰ নিৰ্দেশ দিয়া বুলি জানিব পৰা গৈছে।
চৰকাৰে ৰাজ্যৰ ১৯ খন জিলাৰ উপায়ুক্তক এই সন্দৰ্ভত কাৰ্যকৰী ব্যৱস্থা গ্ৰহণৰ নিৰ্দেশ যদিও কেইকনমান জিলা ক্ৰমে কাৰ্বি আংলং,পশ্চিম কাৰ্বি আংলং,ধুবুৰী,দক্ষিণ শালমাৰা, বিশ্বনাথ,গোৱালপাৰা,শোণিতপুৰ, নগাঁও,হোজাই, যোৰহাট,মাজুলী, শিৱসাগৰ, চৰাইদেউ,কোকৰাঝাৰ আদি জিলা সমূহে এনে তথ্য আৰু মানচিত্ৰ নতুনকৈ জমা নিদিলেও হ’ব।
কাৰণ উক্ত জিলা সমূহে তেনে তথ্য ইতিমধ্যে জমা দিছে।উপায়ুক্ত সকলে জমা দিবলগীয়া মানচিত্ৰ সমূহ যাতে স্পষ্ট হয় সেই বিষয়ত গুৰুত্ব দিবলৈ কোৱা হৈছে।
সমষ্টি পুনৰ নিৰ্দ্ধাৰণ আয়োগৰ ওচৰত ৰাজ্য চৰকাৰে শীঘ্ৰে তেনে তথ্য দাখিল কৰিব।উল্লেখ্য কেন্দ্ৰীয় ন্যায় মন্ত্ৰ্যালয়ে ইতিমধ্যে সমষ্টি পুনৰ নিৰ্দ্ধাৰণৰ বাবে অসম,নাগালেণ্ড,মণিপুৰ অৰুণাচল প্ৰদেশৰ লগতে কাশ্মীৰৰ চৰকাৰক বিভিন্ন জিলাৰ পাৰিসংখ্যিক তথ্য আৰু মানচিত্ৰ দাখিলৰ নিৰ্দেশ দিছে।
সমষ্টি সমূহৰ জনসংখ্যাৰ পৰিৱৰ্তনৰ দিশ বিশ্লেষণ কৰি সমষ্টি সমূহৰ সীমা ইয়াৰ পিছতে পুনৰ নিৰ্দ্ধাৰণ কৰা হ’ব।
