কেন্দ্ৰীয় চৰকাৰৰ অধীনৰ কৰ্মচাৰীলৈ প্ৰধান মন্ত্ৰী মোদীয়ে মৰগীয়া বানছ ৫% বৃদ্ধি ঘোষণা কৰাৰ পাছতেই ৰাজ্য চৰকাৰৰ অধীনৰ কৰ্মচাৰীলৈও সমান শতকৰা হাৰত মৰগীয়া বানছ বৃদ্ধি কৰাৰ সিদ্ধান্ত লৈছে সোণোৱালে চৰকাৰে, যিটোক দেৱালীৰ উপহাৰ বুলিব পাৰি।
ৰাজ্য চৰকাৰৰ কৰ্মচাৰীৰ মৰগীয়া ভাট্টা বৃদ্ধি কৰাৰ এই সিদ্ধান্তটো ঘোষণা কৰা হৈছে ২২ অক্টোবৰত।
এই বৰ্ধিত হাৰ ২০১৯ চনৰ ১ জুলাইৰ পৰাই কাৰ্যকৰী হ’ব আৰু অৱসৰ লোৱা কৰ্মচাৰী সকলেও অৰ্থাৎ পেন্সন লাভ কৰা সকলেও তেওঁলোকৰ পেন্সন এই ৫ শতাংশ বৃদ্ধিৰ হাৰত লাভ কৰিব।
সদ্যহতে মুঠ ৪ মাহৰ বৰ্ধিত মৰগীয়া ভাট্টা কৰ্মচাৰীসকলে একেলগে লাভ কৰিব।
ইয়াৰ আগলৈকে কৰ্মচাৰীসকলৰ মৰগীয়া বানছ ১২ শতাংশ আছিল আৰু এতিয়াৰ পৰা ১৭ শতাংশকৈ লাভ কৰিব।
ৰাজ্য চৰকাৰৰ এই ঘোষণাই ৰাজ্য চৰকাৰৰ অধীনৰ কৰ্মচাৰীসকললৈ সন্তুষ্টি কঢ়িয়াই আনিছে বুলি জানিবলৈ দিছে সচিবালয় সেৱা সন্থাই।
৫ শতাংশ মৰগীয়া ভাট্টা বৃদ্ধিৰ পাছতে মুখ্য মন্ত্ৰী সৰ্বানন্দ সোণোৱাল আৰু বিত্ত মন্ত্ৰী ড০ হিমন্ত বিশ্ব শর্মাক ধন্যবাদ জ্ঞাপন কৰিছে সচিবালয় সেৱা সন্থাৰ সভাপতি বাসৱ কলিতা আৰু সাধাৰণ সম্পাদক পাৰ্থ হাজৰিকাই।
“চৰকাৰে দীপান্বিতাৰ পূৰ্বে ৰাজ্যিক কৰ্মচাৰীৰ বাবে ১২ শতাংশ ৰ পৰা ১৭ শতাংশলৈ মৰগীয়া বানচ বৃদ্ধি কৰাত অনুমোদন দিয়া হেতু অসম সচিবালয় সেৱা সন্থাৰ তৰফৰ পৰা সভাপতি বাসৱ চন্দ্র কলিতা আৰু সাধাৰণ সম্পাদক পাৰ্থ হাজৰিকাই মুখ্য মন্ত্রী আৰু বিত্ত মন্ত্রীক ধন্যবাদ জ্ঞাপন কৰে আৰু লগতে আগন্তুক দীপান্বিতা উপলক্ষে মুখ্য মন্ত্ৰীৰ লগতে ৰাজ্যৰ কৰ্মচাৰীসকলক অভিনন্দন জ্ঞাপন কৰে।’ সচিবালয় সেৱা সন্থাৰ এটা বিবৃতিত প্ৰকাশ।
