অহা ১৮ ডিচেম্বৰত কৰ্মবিৰতি পালনেৰে বিতৰ্কিত নাগৰিকত্ব (সংশোধন) আইনৰ বিৰুদ্ধে প্ৰতিবাদ সাব্যস্ত কৰিব সদৌ অসম কৰ্মচাৰী পৰিষদে।
উক্ত দিনা ৰাজ্যৰ সমূহ কৰ্মচাৰীয়ে কোনো ধৰণৰ কাৰ্য্যালয় সম্পৰ্কীয় কাম কৰাৰ পৰা বিৰত থাকিব। কাৰ্য্যালয়লৈ নাযায় কৰ্মচাৰীসকল। সদৌ অসম কৰ্মচাৰী পৰিষদৰ সম্পাদক প্ৰধান ফকৰ উদ্দিন আহমদে আজি নৰ্থ-ইষ্ট নাওক এই কথা জনায়।
আহমেদে আৰু লগতে জানিবলৈ দিয়ে, নাগৰিকত্ব (সংশোধন) আইনৰ বাতিল নোহোৱা পৰ্য্যন্ত কৰ্মচাৰী পৰিষদে নিৰৱচ্ছিন্নভাৱে আন্দোলন চলাই যাব।
তাৰোপৰি অহা ১৬ ডিচেম্বৰৰ পৰা ১৮ ডিচেম্বৰলৈকে সদৌ অসম ছাত্ৰ সন্থাৰ উদ্যোগত প্ৰতিখন জিলাৰ উপায়ুক্ত, মহকুমাধিপতিৰ কাৰ্য্যালয়ৰ সন্মুখত অনুষ্ঠিত হ’ব লগীয়া গণ সত্যাগ্ৰহতো কৰ্মচাৰী পৰিষদে অংশগ্ৰহণ কৰিব।
আহমদে জনায় যে উক্ত দিনকেইটাত কৰ্মচাৰীসকলে কাৰ্য্যালয়ত উপস্থিত হৈ স্বাক্ষৰ কৰি আহি এই গণ সত্যাগ্ৰহত অংশগ্ৰহণ কৰিব পাৰিব।
উল্লেখ কৰিব পাৰি যে সদৌ অসম ছাত্ৰ সন্থা আৰু শিল্পী সমাজৰ উদ্যোগত যোৱা ১২ ডিচেম্বৰৰ দিনা লতাশিল খেলপথাৰত অনুষ্ঠিত গণ অৱস্থান কাৰ্য্যসূচীৰ লগতে ১৩ ডিচেম্বৰত চানমাৰি অভিযান্ত্ৰিক মহাবিদ্যালয় খেলপথাৰত ১১ ঘণ্টীয়া অনশন কাৰ্য্যসূচীত অংশগ্ৰহণ কৰিছিল।
সদৌ অসম কৰ্মচাৰী পৰিষদে আৰম্ভণিৰে পৰা জাতিদ্ৰোহী বিধেয়কখনৰ বিৰোধিতা কৰি আহিছে। ১০ ডিচেম্বৰৰ নেছ’ৰ উত্তৰ-পূব তথা অসম বন্ধলৈও সমৰ্থন আগ বঢ়াইছিল পৰিষদে।