কৰ’নাৰ সৈতে মোকাবিলা কৰাত ৰাজ্য চৰকাৰ চূড়ান্তভাৱে ব্যৰ্থ হৈছে, অসম প্ৰদেশ কংগ্ৰেছৰ সভাপতি ৰিপুণ বৰাই বুধবাৰে কয়।
“কোভিড১৯ নিয়ন্ত্ৰণ কৰা, এই পৰিস্থিতি মোকাবিলা কৰা স্বাস্থ্য মন্ত্ৰীয়ে কেৱল ভাষণ দি আছে৷ কেৱল চমক সৃষ্টি কৰি আছে৷ কেৱল সংবাদমেল পাতিছে৷ মুখ্যমন্ত্ৰীৰ এই ক্ষেত্ৰত কোনো নিয়ন্ত্ৰণ নাই৷ এই বিশৃংখলতাৰ বাবে দুৰ্ভোগ ভুগিছে সৰ্বসাধাৰণ ৰাইজে৷ আমি এইবোৰৰ উচ্চ পৰ্যায়ৰ তদন্ত দাবী জনাইছো,” তেজপুৰত এক সংবাদমেলত এই মন্তব্য বৰাৰ৷
গুৱাহাটীৰ কেন্দ্ৰীয় কাৰাগাৰত ক’ভিড ৰোগীৰ প্ৰসংগ উল্লেখ কৰি বৰাই কয়, “গুৱাহাটী কেন্দ্ৰীয় কাৰাগাৰত চাৰিওফালে সুউচ্চ প্ৰাচীৰ৷ ইমান কটকটীয়া নিৰাপত্তা। তাৰপিছতো কাৰাবন্দীসকলৰ মাজত ৫১জন কৰ’নাত আক্ৰান্ত হৈছে৷ ঠিক সেইদৰে গোলাঘাটত ৩০জন পজিটিভ হৈছে কাৰাবন্দী৷”
চৰকাৰে কাৰাগাৰত আগতীয়াকৈ উপযুক্ত চিকিৎসা ব্যৱস্থা আৰু প্ৰতিৰোধ ব্যৱস্থা নোলোৱাৰ ফলতেই আজি তাত কৰ’নাত আক্ৰান্ত হৈছে বুলি উল্লেখ কৰি বৰাই কয়, “গুৱাহাটী কেন্দ্ৰীয় কাৰাগাৰত কাৰাবন্দীসকল কৰ’নাৰ লক্ষণত ভুগি থকাৰ পিছতো তেওঁলোকক পৰীক্ষা কৰা নাছিল জোলোঙাৰ মেকুৰী ওলাই পৰিব বুলি৷ অৱশেষত কাৰাবন্দীসকল জুই জ্বলাই প্ৰতিবাদ কৰিবলৈ বাধ্য হ’ল৷ তাৰপিছত পৰীক্ষা কৰা হ’ল আৰু কৰ’নাত পজিটিভ ওলাল ৫১ জন৷”
লগতে বৰাই কয়, “হাইলাকান্দিৰ কোৱাৰেন্টাইন চেন্টাৰত থকা চৰ্মিম দাস নামৰ মহিলা৷ কোৱাৰেন্টাইন চেন্টাৰত তেওঁৰ শ্বাব টেষ্ট কৰা হৈছিল৷ তেৰ দিনলৈ তেওঁৰ পৰীক্ষাৰ ৰিজাল্ট নোলাল৷ ফলত সিদিনাখন আত্মহত্যা কৰিলে৷ তাৰ পিছত তেওঁ নিগেটিভ বুলি ৰিজাল্ট আহিল৷”
আনহাতে এইবিলাক চৰকাৰৰ ভেকোভাওনা, অকৰ্মণ্যতা নহয় কি বুলি প্ৰশ্ন কৰি বৰাই কয়, “য’ত শ্বাব টেষ্ট কৰিলে ১৫ মিনিটত ৰিজাল্ট ওলায়৷ তাত ১৩ দিন লাগিল কিয়?”
এই বিশৃংখলতাৰ বাবে দুৰ্ভোগ ভুগিছে সৰ্বসাধাৰণ ৰাইজে বুলি উল্লেখ কৰাৰ লগতে এইবোৰৰ উচ্চ পৰ্যায়ৰ তদন্ত দাবী জনায় অসম প্ৰদেশৰ সভাপতিজনে৷
