অসমৰ বিজেপি চৰকাৰে বিগত ৪ বছৰত বিজ্ঞাপনৰ বাবে অভিলেখ পৰিমানৰ ধন খৰচ কৰিছে। ৰাজ্যৰ তথ্য আৰু জনসংযোগ মন্ত্ৰী পীযুশ হাজৰিকাই বুধবাৰে বিধানসভাত অৱগত কৰে যে বিগত চাৰিটা বিত্তীয় বৰ্ষত মুখ্যমন্ত্ৰী হিমন্ত বিশ্ব শৰ্মাৰ চৰকাৰে বিজ্ঞাপনৰ বাবে ৩৭০ কোটিৰো অধিক টকা ব্যয় কৰিছে।
মন্ত্ৰী হাজৰিকাই কয় যে ২০১৬ চনৰ পৰা ২০২১ চনলৈ অসমৰ মুখ্যমন্ত্ৰী হিচাপে থকা সৰ্বানন্দ সোণোৱালৰ নেতৃত্বত ৰাজ্য চৰকাৰে ২০১৬-১৭ বৰ্ষৰ পৰা পাঁচটা বিত্তীয় বৰ্ষত মুঠ ১২৫.৬ কোটি টকা বিজ্ঞাপনৰ বাবে ব্যয় কৰিছিল।
বিজেপি চৰকাৰৰ কাৰ্যকালত বিজ্ঞাপনৰ বাবে ব্যয় ক্ৰমাগতভাৱে বৃদ্ধি পাইছে। ২০২০-২১ চনত সোণোৱাল চৰকাৰে বিজ্ঞাপনৰ বাবে ৩০.২৪ কোটি টকা ব্যয় কৰাৰ বিপৰীতে ২০২১-২২ চনত হিমন্ত বিশ্ব শৰ্মাই মুখ্যমন্ত্ৰীৰ দায়িত্ব লোৱাৰ সময়ত এই ব্যয় ৭২.৮৩ কোটি টকালৈ বৃদ্ধি পাইছিল।
ইয়াৰ পিছত শৰ্মা চৰকাৰৰ দিনত প্ৰতিবছৰে বিজ্ঞাপনৰ ব্যয় বাঢ়ি গৈ থাকিল। ২০২২-২৩ চনত এই ব্যয় ৭৮.৮৫ কোটি আৰু ২০২৩-২৪ চনত ১৬০.৯২ কোটি টকালৈ বৃদ্ধি পায়। একেদৰে ২০২৪-২৫ বিত্তীয় বৰ্ষত এই পৰ্যন্ত বিজ্ঞাপনৰ বাবে ৫৯.৭২ কোটি টকা ব্যয় কৰা হৈছে।
তদুপৰি, মন্ত্ৰী হাজৰিকাই লগতে অৱগত কৰে যে ২০১৫-১৬ চনত যেতিয়া অসমত তৰুণ গগৈ চৰকাৰ আছিল তেতিয়া বিজ্ঞাপনৰ বাবে ১৮.৫৮ কোটি টকা ব্যয় কৰা হৈছিল। ইয়াৰ পিছত যেতিয়া বিজেপি চৰকাৰ আহি সৰ্বানন্দ সোণোৱালে মুখ্যমন্ত্ৰীৰ পদ গ্ৰহণ কৰিলে, তেতিয়া পিছৰ বছৰতে বিজ্ঞাপনৰ ব্যয় ২৬.৮৮ কোটি টকালৈ বৃদ্ধি পালে।
ইপিনে, ২০২১-২২ বৰ্ষৰ পৰা ২০২৪-২৫ বিত্তীয় বৰ্ষলৈকে এই সময়ছোৱাত মুখ্যমন্ত্ৰী হিমন্ত বিশ্ব শৰ্মাৰ পৰিয়ালৰ মালিকানাধীন সংবাদ প্ৰতিষ্ঠানে প্ৰচুৰ বিজ্ঞাপন লাভ কৰাৰ তথ্যও পোহৰলৈ আহিছে।
তথ্য অনুসৰি, বিগত চাৰি বছৰ মুখ্যমন্ত্ৰীৰ পৰিয়ালৰ সংবাদ প্ৰতিষ্ঠানৰ ভিতৰত নিয়মীয়া বাৰ্তাই ১৪ কোটি ১ লাখ ৫৬হাজাৰ ৮১৮ টকা, নিউজ লাইভে ৩ কোটি ৭১ লাখ ৯ হাজাৰ ২৩০ টকা, নৰ্থ ইষ্ট লাইভে ১ কোটি ৯৯ লাখ ৭৮ হাজাৰ, ৩৪৪ টকা, ৰামধেনুৱে ৭৯ লাখ ৬৯ হাজাৰ ১১টকা আৰু ৰং চেনেলে ১ কোটি ৩৮ লাখ ৩৩৬ টকা। মুঠতে তেওঁলোকে বিজ্ঞাপনৰ বাবদ লাভ কৰিছে ২১ কোটি ৯০ লাখ ১৩ হাজাৰ ৭৩৯ টকা।
