অসমৰ বাহিৰত আৱদ্ধ শ্ৰমিক, দৰিদ্ৰ, নিম্ন মধ্যবিত্ত লোকৰ বাবে হেল্পলাইন নম্বৰ মুকলি কৰে স্বাস্থ্য মন্ত্ৰী ডঃ হিমন্ত বিশ্ব শৰ্মাই।
আজি মন্ত্ৰী হিমন্ত বিশ্ব শৰ্মাই NHM ৰ ৰাজ্যিক কাৰ্যালয়ত এক সংবাদমেল সম্বোধন কৰি মুকলি কৰে এই হেল্পলাইন নম্বৰটো। হেল্পলাইন নম্বৰটো হ’ল 9615471547। এইটোত MISSED CALL দিলে এটা VOICE MESSAGE আৰু এটা লিংক আহিব।
লিংকত ক্লিক কৰি লোকজনে নিজৰ নাম, ক’ত আৱদ্ধ হৈ আছে আৰু বেংকৰ একাউণ্ট নম্বৰ দি প-পত্ৰ পূৰণ কৰিব লাগিব। তেতিয়া তেওঁলোকৰ একাউন্টত আৰ্থিক সাহায্য আগবঢ়াব অসম চৰকাৰৰ বিত্ত বিভাগে।
যিসকলে কেৱল MISSED CALL হে দিছে ফৰ্ম FILL-UP কৰিব পৰা নাই সেইসকলক সহায় কৰিবৰ বাবে বিশ্ববিদ্যালয় আৰু অভিযান্ত্ৰিক মহাবিদ্যালয়ৰ ৪০০ ছাত্ৰ ছাত্ৰীৰ এটা দলে সহায় কৰিব।
স্বাস্থ্য মন্ত্ৰী গৰাকীয়ে কয় যে, অসম অভিযান্ত্ৰিক মহাবিদ্যালয়, কটন বিশ্ববিদ্যালয়, গুৱাহাটী বিশ্ববিদ্যালয় আৰু পিৰামল ফাউণ্ডেচনৰ ছাত্ৰ ছাত্ৰীক স্বেচ্ছাসেৱক হিচাপে এই কামত নিয়োগ কৰা হৈছে।
আৱদ্ধ থকা শ্ৰমিক, তীৰ্থযাত্ৰা বা অন্য কামত গৈ ঘূৰি আহিব নোৱাৰা দৰিদ্ৰ আৰু নিম্ন মধ্য বিত্তসকলৰ বাবে এই ব্যৱস্থা লৈছে ৰাজ্য চৰকাৰে।
ইয়াৰোপৰি বিদেশত হঠাৎ আৱদ্ধ হৈ পৰা সকলৰ বাবে লোৱা অন্য এক পদক্ষেপৰ কথা উল্লেখ কৰি হিমন্তই কয় “বিদেশত গৈ আৱদ্ধ হৈ পৰা ২১ গৰাকী লোকক প্ৰথম কৃষ্টিত ১০০০ ডলাৰ দিছো, দ্বিতীয় কৃষ্টিত ১০০০ ডলাৰ অহা ২৫ এপ্ৰিলত দিয়া হ’ব। যিসকলে এতিয়াও লাভ কৰা নাই তেওঁলোকে বিত্তীয় বিভাগৰ টুইটাৰত টুইট কৰিব লাগিব।”
আনহাতে, অসমৰ বাহিৰত কৰ্কট, বৃক্ক আৰু হৃদ ৰোগৰ চিকিৎসাৰ বাবে গৈ আৱদ্ধ হৈ থকা মুঠ ৯১৯ গৰাকী লোকৰ পৰা ফোন আহিছে। তেওঁলোকৰ ভিতৰত বৰ্তমানলৈকে ২১৩ জনক বিভিন্ন জিলাৰ উপায়ুক্তই চিনাক্ত কৰিছে আৰু ইতিমধ্যে ২৫ হাজাৰ টকাকৈ তেওঁলোকৰ একাউন্টত আজি জমা কৰি দিয়া হৈছে। বাকী সকলৰ verification চলি আছে বুলি মন্ত্ৰীগৰাকীয়ে জনায়।
তাৎপৰ্যপূৰ্ণভাৱে হেল্পলাইন মুকলি কৰাৰ ১০ মিনিট ভিতৰত অসমৰ বাহিৰৰ পৰা ৬ হাজাৰ ফোনকল আহিল।
