চুলাই ট্ৰেজেডি : হালোৱাটিঙত মুখ্য মন্ত্ৰী আৰু আবকাৰী মন্ত্ৰীৰ প্ৰতিকৃতি কঢ়িয়াই শ্মশান যাত্ৰা

বিষাক্ত সুৰাপান কৰি গোলাঘাট আৰু যোৰহাট জিলাত প্ৰায় ডেৰ শতাধিক লোকে প্ৰাণ হেৰুৱা ঘটনাক লৈ এতিয়াও ৰাজ্যৰ বিভিন্ন স্থানত প্ৰতিবাদ অব্যাহত আছে। আজি অসম-নগালেণ্ড সীমান্তৱৰ্তী শিৱসাগৰ জিলাৰ হালোৱাটিং বজাৰত মুখ্য মন্ত্ৰী সৰ্বানন্দ সোণোৱাল আৰু আবকাৰী মন্ত্ৰী পৰিমল শুক্লবৈদ্যৰ শৱদেহৰ প্ৰতিকৃতি কান্ধত কঢ়িয়াই শ্মশান যাত্ৰা কৰে  অসম চাহ জনজাতি ছাত্ৰ সন্থাই।

প্ৰতিবাদকাৰীসকলে সমগ্ৰ হালোৱাটিং অঞ্চলজুৰি মন্ত্ৰী দুজনৰ শৱদেহৰ প্ৰতিকৃতি কঢ়িয়াই শ্মশান যাত্ৰা কৰাৰ লগতে নগৰৰ মাজ মজিয়াত মন্ত্ৰী দুজনৰ প্ৰতিকৃতি দাহ কৰি প্ৰতিবাদী শ্ল’গানেৰে পৰিবেশ উত্তাল কৰি তোলে।

উক্ত প্ৰতিবাদী কাৰ্যসূচীৰ মাজতে আটছাৰ নেতৃত্বই স্থানীয় বিধায়ক প্ৰদীপ হাজৰিকাই সংগঠনসমূহক লৈ কৰা বিৰূপ মন্ত্ৰব্যৰ তীব্ৰ গৰিহণা দিয়ে। উল্লেখযোগ্য যে বিধায়ক প্ৰদীপ হাজৰিকাই সংবাদ মাধ্যমৰ আগত সংগঠনসমূহে ধন লৈ আমগুৰিত চুলাই মদৰ ভাটি চলাই থাকিবলৈ দিয়ে মন্তব্য কৰিছিল।