ভাৰতীয় খাদ্য নিগমৰ উদ্যোগত অসমত পোন প্ৰথমবাৰৰ বাবে অনুষ্ঠিত অল ইণ্ডিয়া পাব্লিক ছেক্টৰ ফুটবল টুৰ্নামেন্টৰ ছেমি ফাইনেলখন সোমবাৰে অনুষ্ঠিত হ’ব।গুৱাহাটীৰ নেহৰু ষ্টেডিয়ামত চলি থকা দেশৰ এই গুৰুত্বপূৰ্ণ প্ৰতিযোগিতাখনৰ ছেমিত সমুখ সমৰত অৱতীৰ্ণ হ’বলৈ ইতিমধ্যে সাজু হৈছে চাৰিটা দল।
কাইলৈ অৰ্থাৎ ২৫ ফেব্ৰুৱাৰিত প্ৰথমতে তেল আৰু প্ৰাকৃতিক গেছ নিগম (অ’ এন জি চি) দলৰ বিৰুদ্ধে ছেমি ফাইনেলত অৱতীৰ্ণ হ’ব ভাৰতীয় বিমানবন্দৰ প্ৰাধিকৰণ দল। ইয়াৰ পাছতেই ভাৰতীয় খাদ্য নিগম দলৰ বিৰুদ্ধে খেলপথাৰত নামিব অইল ইণ্ডিয়া লিমিটেড দলটো।
যোৱা ২১ ফেব্ৰুৱাৰিৰ পৰা নেহৰু ষ্টেডিয়ামত চলি থকা থকা অল ইণ্ডিয়া পাব্লিক ছেক্টৰ ফুটবল টুৰ্নামেন্টৰ দেওবাৰে প্ৰথমতে ভাৰতীয় বিমানবন্দৰ প্ৰাধিকৰণ আৰু বি এছ এন এলৰ মাজত খেল অনুষ্ঠিত হয়। খেলখনত বিমানবন্দৰ প্ৰাধিকৰণে বি এছ এন এলক ৪-০ গলৰ ব্যৱধানত পৰাজিত কৰে।
ভাৰতীয় বিমানবন্দৰ প্ৰাধিকৰণৰ হৈ দলটোৰ সৌৰ্য্য বালিয়ানে ৩৪ আৰু ৩৮ মিনিটত দুটা গল দিবলৈ সক্ষম হয়। আনহাতে, ৰজত মিশ্ৰই ১১ মিনিটত আৰু কুশান্ত চৌহানে ৬৬ মিনিটত এটাকৈ গল দিয়ে।
একেদিনাই অনুষ্ঠিত দ্বিতীয়খন খেলত ভাৰতীয় ৰিজাৰ্ভ বেংক দলক অইল ইণ্ডিয়া লিমিটেডে ৫-০ গলৰ ব্যৱধানত পৰাজিত কৰে।
অইল ইণ্ডিয়া লিমিটেডৰ জয়ন্ত বসুমতাৰীয়ে ১৪ মিনিটত, তুলিয়া দাসে ৩৮ মিনিটত চিৰনদ্বীপ মৰাণে ৫৭ মিনিটত, মন্দিলা ৰংমেইয়ে ৬৯ মিনিটত আৰু মিলন বসুমতাৰীয়ে ৭৮ মিনিটত এটাকৈ গল দিয়ে।
ইপিনে প্ৰতিযোগিতাখনৰ কালি অনুষ্ঠিত তৃতীয় দিনাৰ খেলত ভাৰতীয় খাদ্য নিগম দলে নেয়ভেলি লিগনাইট কৰ্প’ৰেশ্যন (এন এল চি) দলৰ বিৰুদ্ধে ৭-০ গল আৰু অ’ এন জি চি দলে কৰ্মচাৰী ৰাজ্যিক বীমা নিগম (ই এছ আই চি) দলৰ বিৰুদ্ধে ৪-০ গলৰ ব্যৱধানত জয়লাভ কৰি ইতিমধ্যেই ছেমি ফাইনেলত প্ৰৱেশ কৰিছিল।
কাইলৈ অনুষ্ঠিত হ’বলগীয়া দুয়োখন ছেমিফাইনেলৰ বিজয়ী দলে পৰহিলৈ অৰ্থাৎ ২৬ ফেব্ৰুৱাৰিত চুড়ান্ত খেলত মুখামুখি হ’ব। অল ইণ্ডিয়া পাব্লিক ছেক্টৰ ফুটবল টুৰ্নামেন্টত এইবাৰ ১২ টা দলে ভাগ লৈছিল।
