অসমত সংঘটিত দেশৰ সৰ্বকালৰ অন্যতম বৃহৎ সুৰা ত্ৰাজিদিটোৱে এইপৰ্য্যন্ত প্ৰায় ডেৰশ লোকৰ প্ৰাণ কাঢ়ি লোৱাৰ পিছত সমগ্ৰ ৰাজ্যতে “চুলাই”ৰ প্ৰধান উপকৰণ লালিগুৰ নিষিদ্ধ কৰিছে চৰকাৰে।
জন্তুখাদ্য হিচাপে কোনো ব্যক্তিয়ে লালিগুৰ ব্যৱহাৰ কৰিব খুজিলে জিলা দণ্ডাধীশ বা পশুপালন বিভাগৰ অনুমতি ল’ব লাগিব।
গোলাঘাট আৱৰ্ত ভৱনত গোলাঘাট আৰু যোৰহাট জিলাৰ আবকাৰী বিষয়াসকলৰ সৈতে দেওবাৰে অনুষ্ঠিত উচ্চস্তৰীয় বৈঠকৰ পিছতে এই কথা ঘোষণা কৰিছে বিভাগীয় মন্ত্ৰী পৰিমল শুক্লবৈদ্যই।
তাৎপৰ্য্যপূৰ্ণভাৱে এতিয়া লালিগুৰ নিষিদ্ধ কৰি দিয়া নিৰ্দেশটোৰ সম্পূৰ্ণ বিপৰীত নিৰ্দেশ এটা এই চৰকাৰেই যোৱা বছৰ জুন মাহত দিছিল।
“এইটো চৰকাৰৰ দৃষ্টিগোচৰ হৈছে যে অসমৰ খেতিয়ক আৰু ব্যৱসায়ীসকলৰ মাজত ক্ষোভৰ সৃষ্টি কৰি অনৈতিক শক্তিয়ে অকৰ্তৃত্বশীলভাৱে বিভিন্ন ঠাইত গুৰৰ যোগানত বাধা দি আহিছে। গুৰৰ ক্ষেত্ৰত বৰ্তমান কোনো অনুজ্ঞাপত্ৰৰ প্ৰয়োজন, মজুতৰণত সীমাবদ্ধতা আৰু যোগানত বাধা নাই। সেয়ে আপোনালোকক গুৰৰ মুক্ত যোগান নিশ্চিত কৰিবলৈ আৰু সামগ্ৰীবিধৰ আহ-যাহত বাধা দিয়া অনৈতিক ব্যক্তিসকলৰ ওপৰত শক্তিশালী পদক্ষেপ গ্ৰহণৰ বাবে অনুৰোধ কৰা হ’ল,” খাদ্য, অসামৰিক যোগান আৰু উপভোক্তা পৰিক্ৰমা বিভাগৰ যুটীয়া সচিবে অসমৰ সকলো আৰক্ষী অধীক্ষকলৈ দিছিল এই নিৰ্দেশটো। নিৰ্দেশটোৰ প্ৰতিলিপি নৰ্থ ইষ্ট নাও-ৰ হাতত মজুত আছে।
আনহাতে লালিগুৰ নিষিদ্ধকৰণে বৰ্তমানৰ ভয়ংকৰ ঘটনাটোৰ দৰে ঘটনাৰ পুনৰাবৃত্তিহে কৰিব বুলি মন্তব্য কৰিছে যোগান বিভাগৰ এজন বিষয়াই।
“অবৈধ সুৰাৰ ব্যৱসায় বন্ধ কৰাৰ উপায় লালিগুৰ নিষিদ্ধকৰণ নহয়। লালিগুৰ যদি নাথাকে, তেন্তে মদ প্ৰস্তুতকৰ্তাসকলে ব্যৱহাৰ কৰিব মিথানল— যিটো অতি বিষাক্ত আৰু শেহতীয়াকৈ শালমিৰা চাহ বাগিচাত সংঘটিত বেদনাদায়ক ঘটনাটো তাৰে ফল,” নাম প্ৰকাশ নকৰাৰ চৰ্তত এই মন্তব্য বিষয়াগৰাকীৰ।
