অসম ৰাজ্যিক বিদ্যালয় শিক্ষা পৰিষদৰ ডিভিজন-১-এ এক গুৰুত্বপূৰ্ণ নিৰ্দেশনা জাৰি কৰিছে। এই নিৰ্দেশনা অনুসৰি, ২০২৭ বৰ্ষৰ হাইস্কুল শিক্ষান্ত পৰীক্ষাত অৱতীৰ্ণ হ‘বলগীয়া সকলো ছাত্ৰ-ছাত্ৰীৰ নিজা বেংক একাউণ্ট থকাটো বাধ্যতামূলক কৰা হৈছে।
যোৱা ১১ আগষ্টত জাৰি কৰা এক চৰকাৰী অধিসূচনা অনুসৰি, ২০২৭ বৰ্ষৰ মেট্ৰিক পৰীক্ষাৰ বাবে আবেদন প্ৰক্ৰিয়া ২০২৬ চনৰ অক্টোবৰ মাহৰ প্ৰথম সপ্তাহৰ পৰা আৰম্ভ হ‘ব। এই অনলাইন আবেদন প্ৰক্ৰিয়াত আবেদনকাৰীৰ নিজা ব্যক্তিগত বেংক একাউণ্টৰ নম্বৰ প্ৰদান কৰাটো এক বাধ্যতামূলক চৰ্ত হ‘ব।
ছাত্ৰ-ছাত্ৰীসকলে যাতে আবেদনৰ সময়ত কোনো ধৰণৰ অসুবিধাৰ সন্মুখীন হ‘বলগীয়া নহয়, তাৰ প্ৰতি লক্ষ্য ৰাখি পৰিষদে আগতীয়াকৈ ব্যৱস্থা গ্ৰহণ কৰিছে। পৰিষদে সকলো জিলাৰ বিদ্যালয় পৰিদৰ্শকসকলক নিজৰ নিজৰ জিলাৰ শিক্ষানুষ্ঠানৰ প্ৰধানসকলক এই বিষয়ে কঠোৰ নিৰ্দেশ দিবলৈ কৈছে। যিসকল দশম শ্ৰেণীৰ ছাত্ৰ-ছাত্ৰীৰ এতিয়াও নিজা বেংক একাউণ্ট নাই, তেওঁলোকে ফৰ্ম পূৰণ প্ৰক্ৰিয়া আৰম্ভ হোৱাৰ পূৰ্বেই যাতে একাউণ্ট খোলে, সেয়া নিশ্চিত কৰিবলৈ বিদ্যালয় কৰ্তৃপক্ষক দায়িত্ব দিয়া হৈছে। গুৱাহাটীৰ বামুণীমৈদামত থকা পৰিষদৰ মুখ্য কাৰ্যালয়ৰ পৰা ASSEB ডিভিজন-১ ৰ সচিব এন. এন. নাথে এই চৰকাৰী নিৰ্দেশনাটো জাৰি কৰিছে। ছাত্ৰ-ছাত্ৰীসকলে যাতে শেষ মুহূৰ্তত কোনো কাৰিকৰী অসুবিধা বা মানসিক চাপৰ সন্মুখীন নহয়, তাৰ বাবে বিদ্যালয়সমূহক এই সমগ্ৰ প্ৰক্ৰিয়াটো যথেষ্ট সময় হাতত থাকোঁতেই আগতীয়াকৈ সম্পূৰ্ণ কৰিবলৈ পৰিষদে আহ্বান জনাইছে।
