আজি ঘোষিত হাইস্কুল শিক্ষান্ত পৰীক্ষাৰ ফলাফলত গৌৰীসাগৰৰ অন্যতম বেচৰকাৰী শিক্ষানুষ্ঠান গৌৰীসাগৰ শংকৰদেৱ বিদ্যামন্দিৰৰ ছাত্ৰী দেৱাশ্ৰী শইকীয়াই ৰাজ্যখনৰ ভিতৰতে অষ্টম স্থান দখল কৰি গৌৰীসাগৰৰ লগতে জিলাখনলৈ গৌৰৱ কঢ়িয়াই আনিছে।
গৌৰীসাগৰৰ ন-কটানী মাটিয়াবাট নিবাসী তথা জলসম্পদ বিভাগৰ অৱসৰপ্ৰাপ্ত কৰ্মচাৰী যাদৱ শইকীয়া আৰু অৱন্তী শইকীয়াৰ জ্যেষ্ঠা কন্যা দেৱাশ্ৰীয়ে অসমীয়াত ৯৬, ইংৰাজীত ৯৮, সাধাৰণ গণিতত ১০০, সাধাৰণ বিজ্ঞানত ৯৮, সমাজ বিজ্ঞানত ৯৪ আৰু ঐচ্ছিক গণিতত ১০০ মুঠ ৫৮৬ নম্বৰসহ ৯৭.৪ শতাংশ লাভ কৰে।
আজি পুৱা ছাত্ৰীগৰাকীক বিদ্যালয়খনৰ ছাত্ৰ-ছাত্ৰী, শিক্ষক-শিক্ষয়িত্ৰী তথা আছু, জাতীয়তাবাদী যুৱ ছাত্ৰ পৰিষদকে ধৰি স্থানীয় ৰাইজ আৰু দল সংগঠনে ন-কটানীস্থিত বাসগৃহৰ পৰা গৌৰীসাগৰ পুখুৰীৰ পাৰত থকা বিদ্যালয়লৈ আদৰি অনাৰ অঞ্চলটোত এক শোভাযাত্ৰা উলিয়ায়।
কোনো ধৰণৰ নিৰ্দিষ্ট সময়সূচী নথকাকৈ যেতিয়াই মন যায় তেতিয়াই অধ্যয়ন কৰা দেৱাশ্ৰীৰ ভবিষ্যতে বিজ্ঞান শাখাত অধ্যয়ন কৰি চিকিৎসক হোৱাৰ মন।
নিজৰ এই সফলতাত তেওঁ পিতৃ-মাতৃৰ উপৰিও বিদ্যালয়খনৰ শিক্ষক-শিক্ষয়িত্ৰীসকলৰ সহযোগিতাৰ কথা আন্তৰিকতাৰে উল্লেখ কৰে৷ আজৰি সময়ত কবিতা লিখি ভাল পোৱা কৃতি ছাত্ৰীগৰাকীক বিদ্যালয় কৰ্তৃপক্ষৰ উপৰিও বিভিন্ন দল-সংগঠন, গৌৰীসাগৰ প্ৰেছ ক্লাব, স্থানীয় বিধায়ক, শুভাকাংক্ষী ব্যক্তিয়ে সম্বৰ্দ্ধনা আৰু অভিনন্দন জনায়৷
একেৰাহে ৪টা বৰ্ষ ১০০শতাংশ সফলতাৰ ধাৰা অক্ষুন্ন ৰখা বিদ্যালয়খনৰ এইবাৰ পৰীক্ষাত অৱৰ্তীৰ্ণ হোৱা ১৫গৰাকী পৰেক্ষাৰ্থীৰ এগৰাকীয়ে অষ্টম স্থান লাভ কৰাৰ বিপৰীতে ৪গৰাকীয়ে বিভিন্ন বিষয়ত লেটাৰ মাৰ্কসহ ডিষ্টংচন, ৩গৰাকীয়ে ষ্টাৰসহ প্ৰথম, ১১ গৰাকীয়ে প্ৰথম বিভাগ আৰু ৩গৰাকীয়ে দ্বিতীয় বিভাগত উত্তীৰ্ণ হয়।