বেংগালুৰু আৰক্ষীয়ে তেওঁৰ লিভ ইন পাৰ্টনাৰক হত্যা কৰি জাবৰৰ গাড়ীত পেলোৱাৰ অভিযোগত অসমৰ এজন লোকক গ্ৰেপ্তাৰ কৰিছে। দেওবাৰে এখন জাবৰ ট্ৰাকত এগৰাকী মহিলাৰ মৃতদেহ উদ্ধাৰৰ ঘটনাই ব্ৰুহাট বেংগালুৰু মহানগৰৰ অধীনস্থ অঞ্চলটোত চাঞ্চল্যৰ সৃষ্টি কৰিছিল।
মৃতদেহটো বেগত ভৰাই চান্নামনাকেৰে স্কেটিং গ্ৰাউণ্ডৰ ওচৰত ট্ৰাকৰ পিছফালৰ অংশত ৰখা হৈছিল। ঘটনাৰ তদন্ত কৰি আৰক্ষীয়ে এক বৃহৎ ৰহস্য উন্মোচন কৰিছে।
সূত্ৰ অনুসৰি দেওবাৰে পুৱা জাবৰ পেলাবলৈ অহা স্থানীয় এজন বাসিন্দাই প্ৰথমে বেগটো দেখিছিল। সন্দেহ ওপজাত তেওঁ আৰক্ষীক খবৰ দিয়ে। আৰক্ষীয়ে আহি বেগটো খুলি মহিলাগৰাকীৰ মৃতদেহ উদ্ধাৰ কৰে।
অঞ্চলটোৰ চিচিটিভি ফুটেজ পৰীক্ষা কৰি আৰক্ষীয়ে গম পায় যে পুৱা ১ বজাৰ পৰা ৩ বজালৈ অটোৰিক্সাত এজন লোক আহি বেগটো জাবৰ গাড়ীখনত পেলাই দিয়ে। পিছত বেগটো খুলি হাত-ভৰি বান্ধি থোৱা মহিলাগৰাকীৰ মৃতদেহ উদ্ধাৰ কৰে। ইয়াৰ পিছতে হত্যাৰ গোচৰ ৰুজু হৈ প্ৰকৃত ঘটনা পোহৰলৈ আহে।
ঘটনাৰ ২০ ঘণ্টাৰ ভিতৰতে আৰক্ষীয়ে গ্ৰেপ্তাৰ কৰে ছামছুদ্দিন নামৰ লোকজনক। আৰক্ষীয়ে জনোৱা মতে, মৃত মহিলাগৰাকীৰ নাম আশা। দুবছৰ ধৰি অভিযুক্ত ছামছুদ্দিনৰ সৈতে লিভ ইন ৰিলেচনত আছিল। এটা সংগঠনত কাম কৰি থাকোঁতে দুয়োৰে চিনাকি হৈছিল।
প্ৰাথমিক তদন্ত অনুসৰি আশাৰ মদ্যপানৰ অভ্যাস আৰু গভীৰ নিশা ফোনত কথা পতাৰ বাবে দম্পতীহালে অহৰহ অশান্তিত থকা বুলি আৰক্ষীয়ে অনুমান কৰিছে। ঘটনাৰ দিনটোতো দুয়োৰে মাজত অশান্তিৰ সৃষ্টি হৈছিল। যেতিয়া এই অশান্তি তুংগত উঠিল, তেতিয়া আশাক ছামছুদ্দিনে ডিঙি চেপি হত্যা কৰা বুলি অভিযোগ উত্থাপন হৈছে। তাৰ পাছত আশাৰ মৃতদেহটো বেগত ভৰাই জাবৰৰ গাড়ী এখনত পেলাই দিয়ে।
আৰক্ষীৰ সূত্ৰ অনুসৰি আশা এগৰাকী বিধৱা আছিল। দুটা সন্তানৰ মাতৃ। আনহাতে ছামছুদ্দিন বিবাহিত। তেওঁৰ সন্তান দুটা অসমত থাকে। তেওঁ আশাৰ সৈতে বেংগালুৰুৰ হুলিমাভুটৰ এটা ঘৰত বাস কৰিছিল। সেইদিনা হত্যাকাণ্ডৰ পিছত ছামছুদ্দিনে আশাৰ মৃতদেহ এখন বাইকত আনি এখন জাবৰৰ গাড়ীত পেলাই পলায়ন কৰে বুলি অভিযোগ উঠিছে।
আৰক্ষীয়ে জনোৱা মতে, ঘটনা সন্দৰ্ভত তদন্ত অব্যাহত আছে। উল্লেখ্য যে কেইসপ্তাহমানৰ আগতেও বেংগালুৰুত ৩৩ বছৰীয়া এগৰাকী বিবাহিতা মহিলাৰ নৃশংস হত্যাকাণ্ডৰ ঘটনা পোহৰলৈ আহিছিল। দুটি সন্তানৰ মাতৃ মহিলাগৰাকীক ছুৰীৰে আঘাত কৰি হত্যা কৰা হৈছিল। আৰক্ষীয়ে প্ৰাথমিক তদন্তৰ পৰা জানিব পাৰিছে যে এজন যুৱকৰ সৈতে প্ৰেমৰ সম্পৰ্কৰ বাবেই মহিলাগৰাকীক হত্যা কৰা হৈছিল।
