‘আছুক পৰিষ্কাৰ কৰিব লাগিব আৰু সেই দায়িত্ব বিজেপিৰ’ বুলি কোৱা মন্ত্ৰী হিমন্তই নিজৰ পাপ থকাৰ কথা আজি আওপকীয়াকৈ স্বীকাৰ কৰে আৰু নিজেও গংগাত স্নান কৰি নিষ্কলুষ হোৱাৰ বাবে সন্মত হৈছে। আছুৱে তেওঁক দিয়া পৰামৰ্শ মানিয়েই এইটো কৰিব বুলি জনালে মন্ত্ৰীজনে।
“গংগাত গা ধুই ল’ম, কুম্ভমেলাত যাম আৰু তেতিয়াই ধুই ল’ম। আগতে দুই তিনিবাৰ ধুইছো, আৰু এবাৰ ধুই ল’ম।” সদৌ অসম ছাত্ৰ সন্থাৰ সাধাৰণ সম্পাদক লুৰিন জ্যোতি গগৈয়ে মন্ত্ৰীজনক পাপ মোচন কৰিবৰ বাবে গংগাত গা ধুই আহিবলৈ আহ্বান জনোৱাৰ পাছতেই সংবাদ মাধ্যমৰ আগত মন্ত্ৰী হিমন্ত বিশ্বৰ এই মন্তব্য।
ইয়াৰ পূৰ্বে ৯ ফেব্ৰুৱাৰিত জি এম চি এইচ্ছৰ প্ৰেক্ষাগৃহত অনুষ্ঠিত বিজেপিৰ যুৱ মৰ্চাৰ ‘বিজয় লক্ষ্য ২০১৯’-অত ভাষণ দি মন্ত্ৰী শৰ্মাই আছুক কটাক্ষ কৰিছিল এই বুলি যে ছাত্ৰ সংগঠনটোৱে পূৰ্বৰ গৰিমা হেৰুৱাই পেলাইছে। আছুত থকা কলুষিত নেতাসকলক গঁতিয়াই উলিয়াই দিব লাগে।
প্ৰত্যুত্তৰত আজি ছাত্ৰ সংগঠনটোৰ সাধাৰণ সম্পাদক লুৰিণজ্যোতি গগৈয়ে কয় যে তেওঁ কেনেকুৱা এজন ব্যক্তি অসমীয়া সমাজ জীৱনৰ সকলোৱে জানে।
“তেওঁ যিমানবোৰ কথাবতৰা আছে, সেইবোৰ জানে অসমৰ মানুহে। তেওঁ প্ৰথমে নিজে সংস্কাৰ হৈ লওক”, সংবাদ মাধ্যমত হিমন্ত বিশ্বক ৰাজহুৱা পৰামৰ্শ লুৰিণজ্যোতি গগৈৰ।
“ক্ষমতা আৰু টকাৰ কাৰণে সময়ে সময়ে ৰাজনৈতিক দল সলনি কৰি থকা ব্যক্তিৰ পৰা জনসাধাৰণে অমৃতবাণী শুনাৰ প্ৰয়োজন নাই”, লুৰিণজ্যোতি গগৈয়ে কয়।
মন্ত্ৰীগৰাকী সাৰদা কেলেংকাৰি আৰু ধেমাজিৰ বোমা বিস্ফোৰণৰ সৈতে জড়িত থকাৰো অভিযোগ কৰে আছুৰ নেতাজনে।
“এই পাপবোৰ মোচনৰ বাবে প্ৰথমে তেওঁ গংগাত গা ধুই পুণ্য হৈ আহক। তাৰ পিছতহে অসমত আহি পুণ্য হৈ বক্তব্য ৰখা উচিত।” আক্ৰমণাত্মক লুৰিণজ্যোতি গগৈৰ মন্তব্য।
অৱশ্যে, লুৰিণজ্যোতি গগৈৰ এই পৰামৰ্শ মানি লোৱা বুলি জানিবলৈ দি মন্ত্ৰী শৰ্মাই ছাত্ৰ সংগঠনটোকো তেওঁৰ সৈতে গংগাত স্নানৰ বাবে আহ্বান জনায়।
“গংগা আমাৰ হিন্দু ধৰ্মৰ এখন পবিত্ৰ নদী। মোৰ লগত যদি আছুও যায় তেন্তে ভাল হ’ব। মোৰ লগতে তেওঁলোকৰো পাপ ক্ষয় হ’ব।” নিজৰো পাপ থকা বুলি আওপকীয়াকৈ স্বীকাৰ কৰি এইদৰে কয় মন্ত্ৰীজনে।
আনহাতে, লুৰিণজ্যোতি গগৈয়ে ভাৰতীয় সভ্যতা-সংস্কৃতিৰ সৈতে জড়িত গংগাক সন্মান প্ৰদৰ্শন কৰিছে বুলি উল্লেখ কৰি তাৰ বাবে তেওঁক ধন্যবাদো জ্ঞাপন কৰে।
