আন্তঃৰাজ্যিক পথত চলাচল কৰা ট্ৰাক চালকসকলক ধাৰাবাহিকভাৱে হাৰাশাস্তি কৰাৰ অভিযোগত অসমৰ কাছাৰ জিলাৰ লাইলাপুৰত এক তীব্ৰ উত্তেজনাময় পৰিস্থিতিৰ সৃষ্টি হৈছে। দেওবাৰৰ পৰা শতাধিক ট্ৰাক চালক আৰু পৰিবহণ কৰ্মীয়ে নিজৰ বাহনসমূহ ৰখাই পথ অৱৰোধ কৰাৰ ফলত মিজোৰামলৈ বাণিজ্যিক সামগ্ৰীৰ সৰবৰাহ সম্পূৰ্ণৰূপে ব্যাহত হৈ পৰিছে।
মঙলবাৰে এই প্ৰতিবাদে তৃতীয় দিনত ভৰি দিয়ে আৰু মূল পথৰ অসম প্ৰান্তত মিজোৰাম অভিমুখী বহুকেইখন ট্ৰাক আৱদ্ধ হৈ পৰে। পৰিস্থিতি নিয়ন্ত্ৰণ কৰিবলৈ কাছাৰ জিলা প্ৰশাসনৰ বিষয়াসকল ঘটনাস্থলীত উপস্থিত হৈ পথটো মুকলি কৰিবলৈ চেষ্টা কৰে যদিও প্ৰতিবাদকাৰীসকলে ইয়াৰ তীব্ৰ বিৰোধিতা কৰে। আনকি ঘাইপথৰ মাজতে গধুৰ বাহনসমূহ আঁৰি ৰাখি তেওঁলোকে মিজোৰামলৈ যাবলগীয়া ট্ৰাকসমূহৰ চলাচল সম্পূৰ্ণৰূপে বন্ধ কৰি দিয়ে।
পৰিবহণ কৰ্মীসকলৰ অভিযোগ অনুসৰি, মিজোৰামলৈ সামগ্ৰী কঢ়িয়াই নিয়া চালকসকলে সঘনাই অসুবিধা আৰু ভাবুকিৰ সন্মুখীন হ‘বলগীয়া হৈছে। চালক আৰু বাহনৰ নিৰাপত্তাৰ ক্ষেত্ৰত কৰ্তৃপক্ষৰ পৰা সুনিশ্চিত প্ৰতিশ্ৰুতি নাপালে তেওঁলোকে মালবাহী বাহনৰ চলাচল পুনৰ আৰম্ভ কৰিবলৈ নিদিয়ে বুলি স্পষ্ট কৰি দিছে। সামগ্ৰী সৰবৰাহৰ এক প্ৰধান পথ বন্ধ হৈ পৰাৰ ফলত চুবুৰীয়া ৰাজ্যখনলৈ অত্যাৱশ্যকীয় সামগ্ৰীৰ যোগান ব্যাহত হোৱাৰ আশংকা প্ৰকট হৈ পৰিছে।
ইতিমধ্যে প্ৰতিবাদস্থলীত আৰক্ষী আৰু অসামৰিক প্ৰশাসনৰ লোক মোতায়েন কৰা হৈছে। অসম আৰু মিজোৰাম দুয়োখন ৰাজ্যৰ কৰ্তৃপক্ষই তেওঁলোকৰ সমস্যা সমাধান কৰি বাণিজ্যিক বাহনৰ নিৰাপদ চলাচলৰ ব্যৱস্থা নকৰা পৰ্যন্ত ট্ৰাক চালকসকলে অৱৰোধ চলাই যোৱাৰ হুংকাৰ দিছে। বৰ্তমান পথটোৰে যান-বাহনৰ চলাচল স্বাভাৱিক কৰিবলৈ প্ৰশাসনৰ বিষয়াসকলে প্ৰতিবাদকাৰীসকলৰ সৈতে আলোচনা অব্যাহত ৰাখিছে।
