অসম চৰকাৰৰ ২০২৪-২৫ বিত্তীয় বৰ্ষৰ কেইটামান স্নেপশ্বট দাঙি ধৰিছে ৰাজ্যসভাৰ সাংসদ অজিত কুমাৰ ভূঞাই। ভূঞাই সংবাদ মাধ্যমলৈ প্ৰেৰণ কৰা এক বিবৃতিত অসম চৰকাৰৰ শেহতীয়া বিত্তীয় বৰ্ষৰ কেতবোৰ আঁসোৱাহ দাঙি ধৰি ৰাজ্য চৰকাৰক কঠোৰ সমালোচনা কৰিছে।
সাংসদ অজিত কুমাৰ ভূঞাই তথ্য সহকাৰে অভিযোগ উত্থাপন কৰি কয় যে ২০২৪ – ২৫ বৰ্ষত অসম চৰকাৰে কেৱল সুদৰ নামমে ৯,৫০০ কোটি টকা খৰচ কৰিছে।
ইয়াৰ লগতে সাংসদ ভূঞাই অভিযোগ কৰি কয় যে সুদৰ নামত হাজাৰ কোটি দিবলগীয়া হোৱা চৰকাৰখনে অসমৰ সৰু সৰু ঠিকাদাৰ সকলক প্রাপ্য ধন দিব পৰা নাই।
ধাৰৰ বোজাত কোঙা হোৱা চৰকাৰখনে বিগত বিত্তীয় বৰ্ষত ধাৰ্য্য কৰা মুঠ ধনৰ ৭০% হে ব্যয় কৰিবলৈ সক্ষম হৈছে বুলিও তথ্য দাঙি ধৰে সাংসদ অজিত কুমাৰ ভূঞাই।
ধনৰ অভাৱত বিভিন্ন বিভাগৰ চিলিং প্রস্তাৱবোৰ বিত্ত বিভাগে ঘূৰাই পঠোৱাৰ দৰে ঘটনাও সংঘটিত হৈছে বুলি অভিযোগ উত্থাপন কৰি চৰকাৰক অজিত কুমাৰ ভূঞাই সমালোচনা কৰে।
ইয়াৰ লগতে অজিত কুমাৰ ভূঞাই প্ৰশ্ন উত্থাপন কৰি কয়, “সামগ্রিকভাবে ধাৰৰ বোজাৰে সামৰণি পৰিল ২০২৪-২৫ বিত্তীয় বৰ্ষ। অহা বিত্তীয় বৰ্ষত আকৌ বৃদ্ধি পাব ধাৰ আৰু সুদৰ বোজা। আমাৰ শংকা আৰু ভয় হৈছে, চৰকাৰে ৰাজ্যিক কৰ্মচাৰীসকলক দৰমহা দি থাকিবলৈ বিত্তীয়ভাৱে সক্ষম হৈ থাকিবগৈনে?”
এতিয়া সাংসদ ভূঞাৰ এই বিবৃতিয়ে পুনৰ বাৰ কেতবোৰ প্ৰশ্ন চৰ্চালৈ আনিছে – অসমখন ধাৰত ডুবাই ধৰুৱাৰ দেশলৈ পৰিণত কৰিলে নেকি মুখ্যমন্ত্ৰী হিমন্ত বিশ্ব শৰ্মাৰ চৰকাৰে? কেৱল চমক সৃষ্টিৰে অনুৎপাদনশীল হিতাধিকাৰী আাঁচনিৰ দ্বাৰা ভোট আদায় কৰাৰ পাং পাতি অসমখনৰ অৰ্থনৈতিক ৰাজহাড় ভাঙিব খুজিছে নেকি ৰাজ্যৰ বিজেপি চৰকাৰে?
