উৰিয়ামঘাটৰ ৰেংমা বনাঞ্চলত উচ্ছেদৰ পিছত অসম – নগালেণ্ড সীমান্তৰ বিশেষকৈ এ , বি , চি আৰু ডি চেক্টৰত নগালেণ্ড চৰকাৰ আৰু সমান্তৱৰ্তী নগা জনসাধাৰণৰ তৎপৰতা পুনৰ বৃদ্ধি পাইছে ৷ উচ্ছেদৰ পিছত উদ্ভৱ হোৱা পৰিস্থিতি জনচক্ষুৰ পৰা আঁতৰত ৰাখিবৰ বাবে ৰাজ্য চৰকাৰে নগালেণ্ড চৰকাৰৰ মুখ্যমন্ত্ৰী আৰু বিষয়া পৰ্যায়ত চেষ্টা অব্যাহত ৰাখিছে যদিও সুফল পোৱা নাই অসম চৰকাৰে ৷ এই অভিযোগ আম আদমি পাৰ্টী, অসমৰ (আপ ) ৰ ৷
দেওবাৰে প্ৰকাশ কৰা এক প্ৰেছ বিবৃতিত আপ , অসমৰ ৰাজ্যিক সাধাৰণ সম্পাদক ( সংগঠন ) ৰাজীব শইকীয়াই কয় যে, দুয়োখন ৰাজ্যৰ সীমা সমস্যা সমাধানৰ ক্ষেত্ৰত কেন্দ্ৰ আৰু ৰাজ্যত অধীস্থিত কোনো এটা দলৰ চৰকাৰৰ সদিচ্ছা নাই ৷ কি কংগ্ৰেছ, কি বিজেপি , কি অন্যান্য দল – চৰকাৰ ; সীমা সমস্যাক লৈ কেন্দ্ৰ – ৰাজ্য উভয় চৰকাৰে কেৱল ৰাজনীতি কৰি আহিছে ৷ সীমা সমস্যাৰ স্থায়ী সমাধান কৰিব বুলি প্ৰতিটো নিৰ্বাচনত প্ৰতিশ্ৰুতি দিয়া কংগ্ৰেছ আৰু বিজেপিয়ে প্ৰতিশ্ৰুতি ৰক্ষা কৰক ৷ ৰাজনৈতিক সদিচ্ছা অবিহনে অসম – নগালেণ্ডৰ মাজৰ সীমা সমস্যাৰ স্থায়ী সমাধান সম্ভৱ নহয় বুলি কয় আপৰ নেতা ৰাজীব শইকীয়াই ৷
দুয়োখন ৰাজ্যৰ সীমা সমস্যা সম্পৰ্কত উচ্চতম ন্যায়ালয়ত চলি থকা গোচৰ প্ৰসংগ উত্থাপন কৰি তেখেতে এই সম্পৰ্কত অসম চৰকাৰে ন্যায়ালয়ত কি শপতনামা দিলে তাক ৰাজহুৱা কৰিব লাগে বুলি ৰাজ্য চৰকাৰলৈ আহ্বান জনায় ৷ অসম – নগালেণ্ডৰ সীমা সমস্যা সম্পৰ্কত অধ্যয়ণ কৰিবলৈ কেন্দ্ৰীয় চৰকাৰে গঠন কৰি দিয়া সুন্দৰম আয়োগ , শাস্ত্ৰী আয়োগ , পিল্লাই আয়োগ আৰু এছ কে ভাৰিৱাভা আয়োগৰ প্ৰতিবেদন চাৰিখনৰ ভিতৰত সুন্দৰম আয়োগৰ প্ৰতিবেদন গ্ৰহণযোগ্য বুলি মত ব্যক্ত কৰি আপৰ নেতাজনে সুন্দৰম আয়োগৰ প্ৰতিবেদনৰ ভিত্তিত সীমা সমস্যা সমাধান কৰিবলৈ অসম চৰকাৰ আৰু কেন্দ্ৰীয় চৰকাৰৰ প্ৰতি আহ্বান জনায় ৷
সীমান্তত উত্তেজনা অব্যাহত আছে আৰু একে সময়তে অহা ২৭ আগষ্টত গোলাঘাটত অনুস্থিত হ’ব অসম চৰকাৰৰ কেবিনেট বৈঠক ৷ এই বৈঠকত দুয়োখন ৰাজ্যৰ সীমা সমস্যা সম্পৰ্কত সীমান্তবাসী ৰাইজক এটা বিশেষ বাৰ্তা দিব বুলি আম আদমি পাৰ্টীয়ে আশা প্ৰকাশ কৰিছে ৷
এই সন্দৰ্ভত আপ ৰ ৰাজ্যিক সাধাৰণ সম্পাদকজনে কয় যে, কেন্দ্ৰ আৰু ৰাজ্য চৰকাৰৰ গা’ এৰা মনোভাৱৰ বাবেই দুয়ো ৰাজ্যৰ সীমা সমস্যাই আজি জটিল ৰূপ ধাৰণ কৰিলে ৷ গতিকে চৰকাৰে সত্যক ঢাকিবলৈ কৰা চেষ্টা উচিত হোৱা নাই ৷ অন্যহাতে কেৱল গোলাঘাট জিলাৰ অধীনৰ দুয়োখন ৰাজ্যৰ সীমান্তত বলবৎ হৈ থকা “ বিবদমান এলেকা “ প্ৰত্যাহাৰ কৰিবলৈ আম আদমি পাৰ্টী , অসম য়ে দাবী জনাইছে ৷
