অসমৰ বৰ্তমানৰ নিৰ্বাচনকালীন পৰিস্থিতিত সহমত প্ৰকাশ কৰা কেইবাটাও নাগৰিক সংগঠনক একত্ৰিত কৰি ‘অসম নাগৰিক সন্মিলন’ৰ জন্ম দিয়া হৈছিল। বহুতেই প্ৰশ্ন কৰে যে নাগৰিক সমাজ নিৰ্বাচনী ৰাজনীতিত কিয় জড়িত হৈ পৰিছে? ইয়াৰ উত্তৰত সন্মিলনে জনাইছে যে, প্ৰকৃততে শাসকীয় চৰকাৰখনে সৃষ্টি কৰা অৰাজকতাৰ বাবেই নাগৰিক সমাজ আজি নিৰ্বাচনী ৰাজনীতিত জড়িত হ’বলৈ বাধ্য হৈ পৰিছে। এই চৰকাৰখনে কাৰো কথা নুশুনে; তেওঁলোকে নিজৰ খেয়াল-খুচি মতে যি মন যায় তাকে কৰে। বিশেষকৈ মুখ্যমন্ত্ৰীজনে নিজৰ মইমতালীৰে ৰাজ্যখনত এক অদ্ভুত পৰিস্থিতিৰ সৃষ্টি কৰিছে।
সন্মিলনৰ মতে, অনবৰতে ‘মিঞা’ৰ ভয় দেখুৱাই অসমীয়া পৰিচয়ৰ দোহাই দি থকা এই চৰকাৰখনে সুপৰিকল্পিতভাৱে অসমৰ মাটি-পানীকে ধৰি সকলো সম্পদ আদানী, আম্বানী আৰু ৰামদেৱৰ দৰে মুষ্টিমেয় বাণিজ্যিক প্ৰতিষ্ঠানক গতাই দিছে। তেওঁলোকেই এতিয়া অসমৰ হাজাৰ হাজাৰ বিঘা কৃষিভূমি আৰু বনভূমিৰ গৰাকী হৈ পৰিছে। আনকি ঠিকা-ঠুকলি আৰু সৰু-সুৰা ব্যৱসায়-বাণিজ্যও এতিয়া বিজেপি-আৰএছএছে সমৰ্থিত উত্তৰ ভাৰতীয় আৰু গুজৰাটী লবীৰ হাতত। চাৰিওফালে কেৱল তেওঁলোকৰ লবী আৰু চিণ্ডিকেটৰ ৰাজত্ব চলিছে বুলি সন্মিলনে অভিযোগ কৰে।
শেহতীয়াকৈ এছ.আৰ. (SR) ৰ নামত সম্পূৰ্ণ ৰাজনৈতিক উদ্দেশ্যৰে ভোটাৰ তালিকাৰ পৰা এফালে অসমত শতিকা জুৰি বাস কৰি অহা সংখ্যালঘু লোকৰ নাম কৰ্তন কৰা হৈছে আৰু আনফালে হিন্দু ধৰ্মৰ দোহাই দি বাহিৰৰ পৰা যিকোনো প্ৰকাৰে মানুহ আনি তেওঁলোকৰ মৰ্জি মতে অসমত ভোট দিয়াৰ পথ মুকলি কৰি দিয়া হৈছে। সন্মিলনৰ মতে, অসমত এতিয়া আইন-কানুন বোলা কোনো কথা নাই; মুখ্যমন্ত্ৰীৰ মুখৰ কথাই যেন আইনত পৰিণত হৈছে।
তেওঁলোক ক্ষমতাত থকা বাবেই আজি বিজেপি-আৰএছএছে এইদৰে মইমতালী কৰিব পাৰিছে। গতিকে ২০২৬ৰ নিৰ্বাচনত তেওঁলোকক ক্ষমতাৰ পৰা আঁতৰাব নোৱাৰিলে অসম আৰু ‘অসম’ হৈ নাথাকিব; নৈৰাজ্য আৰু অৰাজকতাই ৰাজ্যখনক সম্পূৰ্ণৰূপে গ্ৰাস কৰিব বুলি সন্মিলনে সকীয়াই দিছে।
আগন্তুক নিৰ্বাচনত বিজেপিক প্ৰতিহত কৰিবলৈ বিৰোধী ৰাজনৈতিক দলসমূহ ঐক্যবদ্ধ হ’বই লাগিব। ইয়াৰ লগতে ৰাজ্যৰ সমূহ নাগৰিক সমাজ একগোট হ’ব লাগিব আৰু এই ঐক্যক এক ‘জনজাগৰণ’ৰ জৰিয়তে জনসাধাৰণৰ ঐক্যলৈ ৰূপান্তৰিত কৰিব লাগিব। তেতিয়াহে ২০২৬ ৰ নিৰ্বাচনত বিজেপিক পৰাস্ত কৰা সম্ভৱ হ’ব। অসম নাগৰিক সন্মিলনৰ ৰাজ্যিক সন্মিলনে বিৰোধী দলবোৰৰ সৈতে আলোচনা কৰি তেওঁলোকক ঐক্যবদ্ধ কৰাৰ বাবে এটি ছয়জনীয়া কমিটি গঠন কৰি দিছিল। যোৱা ছয় মাহে এই কমিটিখনে বিৰোধী ঐক্যৰ বাবে অহোপুৰুষাৰ্থ কৰি আহিছে। সুখৰ কথা যে শেহতীয়াকৈ বিৰোধী দলসমূহে ২০২৬ৰ নিৰ্বাচনত ঐক্যবদ্ধভাৱে প্ৰতিদ্বন্দ্বিতা কৰাৰ সিদ্ধান্ত লৈছে, যিটোৱে জনসাধাৰণৰ মাজত উৎসাহ আৰু আশাৰ সঞ্চাৰ কৰিছে।
কিন্তু এছ.আৰ.ৰ জৰিয়তে লাখ লাখ লোকৰ নাম ভোটাৰ তালিকাৰ পৰা বাদ দি বা অন্য ষড়যন্ত্ৰ কৰি ‘পিছ দুৱাৰেৰে’ নিৰ্বাচন জিকাৰ বিজেপিৰ যি কৌশল, তাক প্ৰতিহত কৰিবলৈ বিৰোধী অধিক তৎপৰ হ’ব লাগিব বুলি সন্মিলনে মত প্ৰকাশ কৰিছে। তেওঁলোকে ক্ষিপ্ৰতাৰে নিৰ্ণায়ক সিদ্ধান্ত ল’ব লাগিব, কিয়নো সময় তেনেই তাকৰ। বৃহৎ বিৰোধী দল হিচাপে এই ক্ষেত্ৰত কংগ্ৰেছৰ ভূমিকা অতি গুৰুত্বপূৰ্ণ বুলি গণ্য কৰি সন্মিলনে কয় যে সকলো দ্বিধা-সংকোচ আঁতৰাই তেওঁলোক সম্মুখ সমৰত জপিয়াই পৰিব লাগিব। পৰিস্থিতিৰ গুৰুত্ব বুজি অসমৰ নিৰ্বাচনত কংগ্ৰেছৰ কেন্দ্ৰীয় নেতৃত্ব যাতে অধিক সক্ৰিয় হয়, তাৰ বাবে ইতিমধ্যে লোকসভাৰ বিৰোধী দলপতি ৰাহুল গান্ধী আৰু সৰ্বভাৰতীয় নেত্ৰী প্ৰিয়ংকা গান্ধীলৈ সন্মিলনৰ তৰফৰ পৰা এখন যুটীয়া পত্ৰ প্ৰেৰণ কৰা হৈছে।
সেই পত্ৰখন আজি এই সংবাদ মেলাতে ৰাজহুৱা কৰা হ’ব। সন্মিলনে মতে, সকলোৱে উপলব্ধি কৰা উচিত যে আজি অসমবাসী এক বৃহৎ প্ৰত্যাহ্বানৰ সন্মুখীন হৈছে। সকলো ঐক্যবদ্ধ হ’লেহে অসমৰ ওপৰত চলা উত্তৰ ভাৰতীয় আগ্ৰাসন প্ৰতিহত কৰিব পৰা যাব বুলি সন্মিলনে দৃঢ়তাৰে প্ৰকাশ কৰিছে।
