অসম বিধানসভা নিৰ্বাচনৰ দিন চমু চাপি অহাৰ লগে লগে ৰাজ্যৰ ৰাজনৈতিক পৰিৱেশ উত্তপ্ত হৈ পৰিছে। বিজেপি চৰকাৰক প্ৰত্যাহ্বান জনাবলৈ কেইবাটাও বিৰোধী ৰাজনৈতিক দলে আজি একগোট হৈ এক গুৰুত্বপূৰ্ণ বৈঠকত মিলিত হয়।
কংগ্ৰেছ, এজেপি, এপিএইচএলচি আৰু চিপিএমৰ জ্যেষ্ঠ নেতাসকলে এই বৈঠকত অংশগ্ৰহণ কৰি আগন্তুক নিৰ্বাচনত ঐক্যবদ্ধভাৱে যুঁজ দিয়াৰ কথা সদৰী কৰে। গুৱাহাটীত অনুষ্ঠিত এই সংবাদমেলত গৌৰৱ গগৈ, লুৰীণজ্যোতি গগৈ, জন ইংতি কাঠাৰ আৰু সুপ্ৰকাশ তালুকদাৰ উপস্থিত থাকে যদিও অখিল গগৈ এই বৈঠকত অনুপস্থিত আছিল।
সংবাদমেলত ভাষণ দি সাংসদ গৌৰৱ গগৈয়ে কয় যে চাৰিটা দলেই মিলি আজিৰ পৰা এক নতুন যাত্ৰা আৰম্ভ কৰিছে। ৰাইজৰ দল আৰু চিপিআইৰ সৈতেও মিত্ৰতাৰ আলোচনা চলি আছে বুলি তেওঁ জানিবলৈ দিয়ে। আগন্তুক দিনত ৰাজ্যৰ বিভিন্ন প্ৰান্তত যৌথ সভা অনুষ্ঠিত কৰি বিজেপিৰ তথাকথিত কুশাসন আৰু দুৰ্নীতিৰ কথা ৰাইজৰ মাজলৈ লৈ যোৱা হ’ব বুলি তেওঁ হুংকাৰ দিয়ে। বিজেপি চৰকাৰখনে কেৱল ক্ষমতাৰ স্বাৰ্থত কাম কৰিছে বুলি অভিযোগ তুলি তেওঁ কয় যে এই যুঁজখন হ’ব নীতি আৰু আদৰ্শৰ যুঁজ।
এআইইউডিএফৰ মুৰব্বী বদৰুদ্দিন আজমলক তীব্ৰ সমালোচনা কৰি গৌৰৱ গগৈয়ে তেওঁক মুখ্যমন্ত্ৰীৰ ১০৮ বুলি অভিহিত কৰে। তেওঁ অভিযোগ কৰে যে যেতিয়াই মুখ্যমন্ত্ৰী হিমন্ত বিশ্ব শৰ্মা বিপদত পৰে, তেতিয়াই আজমলে সহায়ৰ হাত আগবঢ়ায়। এই গোপন বুজাবুজিৰ ফলস্বৰূপে এআইইউডিএফ লাভান্বিত হৈছে বুলিও তেওঁ মন্তব্য কৰে। বিজেপিয়ে যাক শত্ৰু বুলি কৈছিল, তেওঁলোকৰ পৰাই এতিয়া সমৰ্থন বিচাৰিছে বুলি উল্লেখ কৰি গগৈয়ে কয় যে বৰ্তমান ৰাজ্যখনৰ ৰাজনীতি নিম্নতম স্তৰলৈ নামি গৈছে।
আনহাতে অসম জাতীয় পৰিষদৰ সভাপতি লুৰীণজ্যোতি গগৈয়েও বিজেপি চৰকাৰক কঠোৰ ভাষাৰে আক্ৰমণ কৰে। তেওঁ কয় যে বিজেপিক পৰাস্ত কৰিবলৈ বিৰোধী শক্তিসমূহ একগোট হৈছে আৰু ভৱিষ্যতে আৰু বহু দল এই মিত্ৰজোঁটত চামিল হ’ব। বিজেপিৰ জন আশীৰ্বাদ যাত্ৰাক সমালোচনা কৰি তেওঁ ইয়াক অভিশাপ যাত্ৰা বুলিহে অভিহিত কৰে। গৰু চুৰিৰ পৰা আৰম্ভ কৰি জনপ্ৰিয় শিল্পী জুবিন গাৰ্গৰ গোচৰত ন্যায় দিয়াত ব্যৰ্থ হোৱা চৰকাৰখনৰ বিৰুদ্ধে ৰাইজৰ মাজত ব্যাপক ক্ষোভৰ সৃষ্টি হৈছে বুলি লুৰীণজ্যোতি গগৈয়ে সংবাদমেলত মত প্ৰকাশ কৰে।
