৩ জানুৱাৰিত গ্ৰেপ্তাৰ কৰা ভাৰতীয় জাতীয় কংগ্ৰেছ দলৰ অন্যতম ৰাজ্যিক মুখপাত্ৰ মনোৰঞ্জন বৰগোঁহাইক আজি মাৰ্ঘেৰিটা মহকুমা ন্যায়িক আদালতত হাজিৰ কৰাই তিনিচুকীয়া জে’ল হাজোতলৈ প্ৰেৰণ কৰে।
জে’ললৈ প্ৰেৰণ কৰাৰ সময়ত বৰগোহাঁইয়ে সংবাদ মাধ্যমৰ আগত প্ৰতিক্ৰিয়া প্ৰকাশ কৰি কয়, “হিটলাৰী আৰু ফেচিষ্ট বাদী চৰকাৰৰ পৰা ইয়াতকৈ কি আশা কৰিব পাৰি।”
বৰগোহাঁইয়ে অসমত অসমীয়া হিচাপে জীয়াই থকাৰ অধিকাৰ এই চৰকাৰে কাঢ়ি নিবলৈ চেষ্টা কৰিছে বুলি প্ৰকাশ কৰাৰ লগতে শান্তিপূৰ্ণ গণতান্ত্ৰিক আন্দোলনত জড়িত থকাৰ পিছতো তেওঁক গ্ৰেপ্তাৰ কৰা কাৰ্যত আশ্চৰ্য প্ৰকাশ কৰিছে।
উল্লেখযোগ্য যে ৩ জানুৱাৰিৰ পুৱা মাৰ্ঘেৰিটাস্থ এটা শৰীৰ চৰ্চা কেন্দ্ৰৰ পৰা কংগ্ৰেছ দলৰ অন্যতম ৰাজ্যিক মুখপাত্ৰ মনোৰঞ্জন বৰগোঁহাইক আৰক্ষীয়ে গ্ৰেপ্তাৰ কৰিছিল।
ইফালে আৰক্ষীয়ে গ্ৰেপ্তাৰৰ সম্পৰ্কে কালি একো তথ্য সদৰী কৰা নাছিল যদিও আজি পুৱা মাৰ্ঘেৰিটা আৰক্ষী থানাৰ ভাৰপ্ৰাপ্ত বিষয়া মুনীন্দ্ৰ চমুৱাই সংবাদমাধ্যমৰ আগত গ্ৰেপ্তাৰ কৰাৰ কথা সদৰী কৰে।
আৰক্ষী বিষয়া গৰাকীয়ে কয় মাৰ্ঘেৰিটা আৰক্ষী থানাত বৰগোহাঁইৰ বিৰুদ্ধে ৩৭৪/১৯ নং গোচৰত ভাৰতীয় দণ্ড বিধি আইনৰ অধীনত 120B, 121, 147, 148, 149, 353, 454, 427, 435 ৰ অধীনত এটা গোচৰ ৰজু কৰা বুলিও জানিবলৈ দিয়ে৷
আনহাতে কংগ্ৰেছ দলৰ নেতা-কৰ্মীক আৰক্ষীয়ে গ্ৰেপ্তাৰ কৰি জে’ল হাজোতলৈ প্ৰেৰণ কৰি থকাৰ পাছতো মাৰ্ঘেৰিটা ব্লক কংগ্ৰেছ কমিটিয়ে প্ৰতিবাদ সাব্যস্তু কৰাটো বাদেই এটা প্ৰেছ বিবৃতিৰ জৰিয়তেও প্ৰতিক্ৰিয়া প্ৰকাশ নকৰা বিষয়টোৱে বিশেষ তাৎপৰ্য বহন কৰিছে৷