অসম আৰক্ষীৰ শেহতীয়া কেতবোৰ কাৰ্যকলাপ আৰু ভূমিকা সন্দৰ্ভত ৰাজ্যৰ বিশিষ্ট নাগৰিকসকলে তীব্ৰ ক্ষোভ আৰু গভীৰ উদ্বেগ প্ৰকাশ কৰিছে। বুধবাৰে অসম নাগৰিক সন্মিলনৰ হৈ কেইবাগৰাকীও বিশিষ্ট বুদ্ধিজীৱী আৰু সমাজকৰ্মীয়ে এক বিবৃতিযোগে অসম আৰক্ষীৰ স্পষ্ট দুমুখীয়া নীতি তথা পক্ষপাতমূলক আচৰণক লৈ গুৰুতৰ প্ৰশ্ন উত্থাপন কৰাৰ লগতে এই সমগ্ৰ বিষয়টোত ভাৰতৰ নিৰ্বাচন আয়োগৰ নীৰৱতাকো কঠোৰ সমালোচনা কৰিছে।
সন্মিলনে আৰক্ষীৰ এই পক্ষপাতিত্বৰ উদাহৰণ দাঙি ধৰি শেহতীয়া দুটা গুৰুত্বপূৰ্ণ ঘটনাৰ কথা উল্লেখ কৰিছে। বিবৃতিটোত প্ৰকাশ কৰা অনুসৰি, কংগ্ৰেছৰ জ্যেষ্ঠ নেতা পৱন খেৰাই এখন সংবাদমেলত অসমৰ মুখ্যমন্ত্ৰী ড° হিমন্ত বিশ্ব শৰ্মাৰ পত্নীৰ বিৰুদ্ধে কেইটামান গুৰুতৰ অভিযোগ উত্থাপন কৰাৰ ঠিক পিছদিনাই তেওঁৰ বিৰুদ্ধে এখন এজাহাৰ পঞ্জীয়ন কৰা হৈছিল। আনকি তেওঁক গ্ৰেপ্তাৰ কৰিবলৈ অসম আৰক্ষীৰ এটা দল ততাতৈয়াকৈ দিল্লীলৈ প্ৰেৰণ কৰা হৈছিল। কিন্তু ইয়াৰ সম্পূৰ্ণ বিপৰীতে, অসম জাতীয় পৰিষদৰ প্ৰাৰ্থী কুংকি চৌধুৰীয়ে একাংশ ব্যক্তিয়ে কৃত্ৰিম বুদ্ধিমত্তাৰ জৰিয়তে নিৰ্মাণ কৰা ভুৱা ভিডিঅ’ প্ৰচাৰ কৰা সন্দৰ্ভত দাখিল কৰা এজাহাৰৰ ভিত্তিত আৰক্ষীয়ে বৰ্তমানলৈকে কোনো ধৰণৰ ব্যৱস্থা গ্ৰহণ কৰা নাই।
আইন বলবৎকাৰী সংস্থাৰ এনে একপক্ষীয় প্ৰয়োগে গণতান্ত্ৰিক ব্যৱস্থাত বিৰূপ প্ৰভাৱ পেলোৱাৰ আশংকা ব্যক্ত কৰি সন্মিলনে তীব্ৰ উদ্বেগ প্ৰকাশ কৰিছে। সমানেই উদ্বেগজনক বিষয় হিচাপে তেওঁলোকে ভাৰতৰ নিৰ্বাচন আয়োগৰ ভূমিকাকো আঙুলিয়াই দিছে। এনে এক গুৰুতৰ পৰিস্থিতিতো নিৰ্বাচন আয়োগ সম্পূৰ্ণৰূপে নিমাত হৈ থকা কাৰ্যই সন্মিলনক গভীৰভাৱে চিন্তিত কৰি তুলিছে। সেয়েহে, আৰক্ষী আৰু নিৰ্বাচন আয়োগৰ এই পক্ষপাতমূলক দৃষ্টিভংগীৰ বিৰুদ্ধে সজাগ আৰু সতৰ্ক হৈ থাকিবলৈ সন্মিলনে অসমৰ ৰাইজক আহ্বান জনাইছে।
সাম্প্ৰতিক সময়ত ৰাজ্যৰ আইন-শৃংখলা ৰক্ষা আৰু নিৰ্বাচনী পৰিৱেশৰ স্বচ্ছতাক লৈ বিভিন্ন মহলে প্ৰশ্ন উত্থাপন কৰি অহাৰ মাজতে বিশিষ্ট নাগৰিকসকলৰ এই বিবৃতিত সংশ্লিষ্ট কৰ্তৃপক্ষই কেনেধৰণৰ প্ৰতিক্ৰিয়া প্ৰকাশ কৰে, সেয়া পৰৱৰ্তী সময়ত লক্ষণীয় হ’ব।
