দুৰ্গা পূজাৰ আনন্দ-উল্লাসৰ মাজতে সোমবাৰে সন্ধিয়া গোৱালপাৰা নগৰত অসম আৰক্ষীৰ এজন কনিষ্টবলে এগৰাকী সপ্তম শ্ৰেণীত ছাত্ৰীক ধৰ্ষণৰ চেষ্টা চলায়।
অভিযুক্ত কনিষ্টবলজনক জয়চৰণ দাস বুলি চিনাক্ত কৰা হৈছে।
প্ৰাপ্ত তথ্য মতে কালি সন্ধিয়া নৱমীৰ ব্যস্ততাৰ মাজতে নগৰখনৰ মাজমজিয়াৰ শাস্ত্ৰী নগৰত ঘৰত কোনো নথকাৰ সুযোগ লৈ কিশোৰীগৰাকীক মুখত সোপা দি অসৎ উদ্দেশ্য চৰিতাৰ্থ কৰিব খোজে।
অৱশ্যে কিশোৰীগৰাকীয়ে চিঞৰ-বাখৰ কৰাত তেওঁলোকৰ ঘৰৰ ওচৰতে থকা মানুহ এজনে শুনা পাই আগবাঢ়ি অহাত কনিষ্টবল জয়চৰণ দাস ঘটনাস্থলীৰ পৰা পলায়ন কৰে যদিও ৰাইজে তেওঁক কৰায়ত্ত কৰি উত্তম–মধ্যম শোধাই গতাই দিয়ে আৰক্ষীক।
জিলাখনৰ আৰক্ষী অধীক্ষক সুশান্ত বিশ্ব শৰ্মাই কয় যে ৰাইজৰ এজাহাৰৰ ভিত্তিত কনিষ্টবলজনক ভাৰতীয় দণ্ড বিধিৰ ৩৭৬/৫১১ ধাৰাত ৬১৩/২০১৯ নম্বৰৰ গোচৰ ৰুজু কৰি গ্ৰেপ্তাৰ কৰা হৈছে।
ইয়াৰ উপৰি অভিযুক্ত জয়চৰণ দাসক তাৎক্ষণিকভাৱে কাৰ্যকৰী হোৱাকৈ চাকৰিৰ পৰা নিলম্বন কৰা হয় বুলিও আৰক্ষী অধীক্ষক গৰাকীয়ে জানিবলৈ দিয়ে।
