কাজিৰঙাৰ ইংলে পথাৰত চৰকাৰৰ হৈ বৰ্বৰতা প্ৰদৰ্শন বোকাখাত আৰক্ষীৰ।ৰঙাজান-হাতীখলি-দিৰিং চাহ বাগিছাৰ শান্তিপূৰ্ণ প্ৰতিবাদী শ্ৰমিক আৰু আটছাৰ নেতাৰ ওপৰত বৰ্বৰ লাঠিচালনা অসম আৰক্ষীৰ।ফলত উত্তপ্ত হৈ পৰে আজি কাজিৰঙাৰ ইংলে পথাৰ।
চাহ জনগোষ্ঠী লোকৰ দখলত থকা কাজিৰঙাৰ ইংলে পথাৰৰ ভূমি হস্তগত কৰি অসম চৰকাৰে হায়াট গ্ৰুপক পঞ্চতাৰকা হোটেল নিৰ্মান কৰিবলৈ দিয়া কাৰ্যৰ বিৰোধিতা কৰিবলৈ যাওঁতেই শান্তিপূৰ্ণ প্ৰতিবাদীৰ ওপৰত বোকাখাত আৰক্ষীয়ে সংঘটিত কৰে এই বৰ্বৰ আক্ৰমণৰ ঘটনা ।
বুধবাৰে আটছা, বোকাখাত শাখাৰ উদ্যোগত তথা কেন্দ্ৰীয় সমিতিৰ নেতৃত্বত আৰু স্থানীয় হাতীখুলী-ৰঙাজান-দিৰিং চাহ বাগিছাৰ শ্ৰমিক ৰাইজৰ সহযোগত ৰঙাজানত কৰা এক প্রতিবাদী সমাবেশ কার্যসূচীৰ অন্তত ইংলে পথাৰ পৰিদৰ্শনৰ বাবে যোৱা শান্তিপূৰ্ণ জনতাৰ ওপৰত এই বৰ্বৰ আক্ৰমণত লিপ্ত হয় বোকাখাত আৰক্ষী।
উল্লেখযোগ্য যে কাজিৰঙাৰ ইংলে পথাৰৰ উক্ত ভূমিত ৰঙাজান-হাতীখুলী চাহ বাগিছাৰ শ্ৰমিক সকলে পুৰুষানুক্ৰমে কৃষি কাৰ্য কৰি অহাৰ পিছতো অসম চৰকাৰৰ পৰ্যটণ বিভাগে বলপূৰ্বক ভাৱে সেই ভূমি হস্তগত কৰি আন্তঃৰাষ্ট্ৰীয় হায়াট গ্ৰুপক পঞ্চতাৰকা হোটেল নিৰ্মান কৰিবলৈ দিয়া কাৰ্যক আৰম্ভণিৰে পৰা আটছাই বিৰোধিতা কৰি আহিছে।
সেই মৰ্মে থলুৱা আদিবাসী চাহ শ্ৰমিক সকলৰ ভূমিৰ অধিকাৰৰ স্বাৰ্থত বুধবাৰে ৰঙাজানত আয়োজিত প্ৰতিবাদী সমাবেশৰ পাছতেই এই বৰ্বৰ ঘটনা সংঘটিত হয়।
এই ঘটনাত আৰক্ষীৰ আক্ৰমণত কেইবাগৰাকীও মহিলা প্ৰতিবাদকাৰী আহত হোৱাৰ উপৰিও আহত হৈছে আটছাৰ কেন্দ্ৰীয় সমিতিৰ সাংগঠনিক সম্পাদক অনিত গড়, জিলা সম্পাদক সুশীল কালিন্দী, জিলা সাংগঠনিক সম্পাদক বিকাশ নায়ক, দেৰগাঁও শাখাৰ শিক্ষা সম্পাদক দানিচ কুমাৰ। আহত সকলক তাৎক্ষণিক ভাৱে কহঁৰাস্থিত বেজা বৈষ্ণৱ আদৰ্শ চিকিৎসালয়ত ভৰ্তি কৰোৱা হয় যদিও ইয়াৰে একাংশক বোকাখাত কমলা মিৰি অসামৰিক চিকিৎসালয়ত ভৰ্তি কৰোৱা হয়।
এই বৰ্বৰ আক্ৰমণৰ ঘটনাৰ পাছতেই আক্ৰমণ স্থলীৰ পৰাই তীব্ৰ প্ৰতিক্ৰিয়া প্ৰকাশ কৰিছে আটছাৰ কেন্দ্ৰীয় সমিতিৰ সাধাৰণ সম্পাদক জগদিশ বৰাইকে। বোকাখাত আৰক্ষীৰ এই আক্ৰমণক গৃহ বিভাগৰ গুণ্ডাগিৰি আৰু স্বৈৰাচাৰী বুলি কঠোৰ সমালোচনা কৰি তেওঁ কয় – দণ্ডাধীশৰ নিৰ্দেশ অবিহনে জাতীয় সংগঠনৰ নেতৃবৃন্দক আৰু তাৰ শ্ৰমজীৱীৰ ওপৰত আইন হাতত তুলি লোৱা ঘটনা অত্যন্ত দুৰ্ভাগ্যজনক। লগতে তেওঁ মুখ্যমন্ত্ৰীৰ ওচৰত সমগ্ৰ ঘটনাৰ এক উচ্চ পৰ্যায়ৰ তদন্ত দাবী কৰে।
তদুপৰি বুধবাৰৰ প্ৰতিবাদী কাৰ্যসূচীক সংবাদ মাধ্যম NEWS LIVE ত চাহ শ্ৰমিকসকলে ইংলে পথাৰৰ ভূমিৰ ক্ষতিপূৰণ বিচাৰি কৰা আন্দোলন বুলি প্ৰচাৰ কৰা কাৰ্যক অভিসন্ধিমূলক প্ৰচাৰ আখ্যা দিছে আটছাৰ কেন্দ্ৰীয় সমিতিৰ সাধাৰণ সম্পাদক গৰাকীয়ে। তেওঁ পুনৰ স্পষ্ট কৰি দি কয়, এয়া ক্ষতিপূৰণ বিচাৰি কৰা আন্দোলন নহয় , এয়া থলুৱা আদিবাসী লোকৰ ভূমিৰ অধিকাৰৰ আন্দোলন।
ইফালে বন্যহস্তীৰ বিচৰণভূমি তথা খিলঞ্জীয়া কৃষকৰ কৃষি ভূমি বলপূৰ্বক উচ্ছেদ কৰি কৰ্পৰেট গোষ্ঠীৰ হাতত তুলি দিয়াৰ স্বাৰ্থত থলুৱা আদিবাসী লোকক কৰা এই বৰ্বৰ আক্ৰমণৰ ঘটনাক নিন্দা তথা ফেচিষ্ট আক্ৰমণ হিচাপে আখ্যা জীপাল কৃষক শ্ৰমিক সংঘৰ।লগতে সকলো সাংগঠনিক গোৰামীৰ উৰ্ধত গৈ উদাৰচিত্তে সন্মিলিত প্ৰতিৰোধ সংগ্ৰাম গঢ়ি তোলাৰ পোষকতা কৰাৰ উপৰিও এই ঘটনাৰ পৰা সকলো পক্ষই শিক্ষা লোৱা উচিত বুলি তাৎপৰ্য পূৰ্ণ মন্তব্য আগবঢ়াই জীপাল কৃষক শ্ৰমিক সংঘৰ উপদেষ্টা সোণেশ্বৰ নৰহে ।
আনহাতে দণ্ডাধীশৰ নিৰ্দেশ অবিহনে জাতীয় সংগঠনৰ নেতৃবৃন্দক আৰু তাৰ শ্ৰমজীৱীৰ ওপৰত আইন হাতত তুলি লোৱা পুলিচ বিষয়াৰ ওপৰত মাননীয় উচ্চ আদালতক স্বমত গোচৰ পঞ্জীয়ন কৰি উচিত শাস্তি প্ৰদানৰো পোষকতা জীপালৰ উপদেষ্টা গৰাকীৰ।
