বিৰোধী ঐক্যমঞ্চই আজি পুৱা ৬ বজাৰ পৰা সন্ধিয়া ৬ বজালৈ কা’ৰ বিৰোধিতা কৰি সৰ্বাত্মক হৰতালৰ আহ্বান জনাইছে ৷ ইপিনে, বিৰোধী ঐক্যমঞ্চৰ নেতৃত্বলৈ আইনী জাননী জাৰি কৰিছে অসম আৰক্ষীয়ে ৷
উচ্চতম ন্যায়ালয়ৰ ‘সর্বাত্মক হৰতাল’ক অসাংবিধানিক আৰু বে-আইনী আখ্যাৰ উল্লেখেৰে অসম আৰক্ষীয়ে ‘সর্বাত্মক হৰতাল’ উঠাই লোৱাৰ আহ্বান জনাইছে ৷
‘সর্বাত্মক হৰতাল’ৰ ফলত ৰাজ্যৰ শান্তি-শৃংখলা ভংগৰ আশংকা ব্যক্ত কৰি অসম আৰক্ষীয়ে বন্ধৰ ফলত ৰাজহুৱা সম্পত্তিৰ ক্ষতি হ’লে আইনী ব্যৱস্থা লোৱা হ’ব বুলিও সকীয়াই দিছে ৷
কোনো লোকৰ আঘাত বা যিকোনো ক্ষতিৰ বাবেও বন্ধ আহ্বানকাৰী দায়ী হ’ব বুলি কোৱা হৈছে ৷
লগতে পঢ়কঃ ‘কা’ৰ বিৰুদ্ধে সমগ্র ৰাজ্যত গণতান্ত্ৰিকভাৱে তীব্ৰ প্রতিৰোধ গঢ়ি তুলিবলৈ আহ্বান অসম বিৰোধী ঐক্যৰ
‘ইউনাইটেড অ’পজিচন ফ’ৰাম’ৰ অন্তৰ্গত ১৬টা দলে ১২ মাৰ্চৰ পুৱা ৬ বজাৰ সন্ধিয়া ৬ বজালৈ আহ্বান কৰা ‘সৰ্বাত্মক হৰতাল’ সন্দৰ্ভত অসম আৰক্ষীৰ আৰক্ষী আয়ুক্ত কাৰ্যালয়ৰ পৰা এই বিশেষ জাননী জাৰি কৰা হৈছে। নিৰ্দেশনাটোত এই আন্দোলন অবৈধ বুলি উল্লেখ কৰি ইয়াৰ বিৰুদ্ধে কঠোৰ ব্যৱস্থা গ্ৰহণৰ সকীয়নি দিয়া হৈছে।
জাননীটোত কোৱা হৈছে, “ইউনাইটেড অ’পজিচন ফ’ৰাম”ৰ দ্বাৰা প্ৰকাশিত ১১ মাৰ্চ, ২০২৪ তাৰিখৰ প্ৰেছ বিবৃত্তিৰ তলত স্বাক্ষৰকাৰীসকলৰ দৃষ্টিগোচৰ কৰা হৈছে যে আপোনালোক আৰু আপোনাৰ সংগঠনে ২০২৪ চনৰ ১২ মাৰ্চত পুৱা ৬ বজাৰ পৰা সন্ধিয়া ৬ বজালৈ অসমত ‘সৰ্বাত্মক হৰতাল’ৰ আহ্বান জনাইছে। যিহেতু ‘সৰ্বাত্মক হৰতাল’ৰ ফলত ৰাজ্যখনৰ শান্তিপ্ৰেমী নাগৰিকৰ স্বাভাৱিক জীৱনত ব্যাঘাত জন্মাৰ লগতে শান্তি আৰু নিৰাপত্তা ভংগ হোৱাৰ সকলো সম্ভাৱনা আছে। ‘সৰ্বাত্মক হৰতাল’ৰ ফলত পথ অৱৰোধ, দোকান-পোহাৰ আৰু অন্যান্য ব্যৱসায়িক প্ৰতিষ্ঠান বলপূৰ্বক বন্ধ, ৰেলৱে/ৰাষ্ট্ৰীয় ঘাইপথকে ধৰি ৰাজহুৱা আৰু ব্যক্তিগত সম্পত্তিৰ ক্ষতি হোৱাৰ সম্ভাৱনা আছে যাৰ ফলত অত্যাৱশ্যকীয় সেৱা প্ৰদানত ব্যাঘাত জন্মে।
তদুপৰি, এনেধৰণৰ ‘সৰ্বাত্মক হৰতাল’ বুলি কোৱাৰ ফলত ঘাইপথ আৰু ৰে’লৱে ট্ৰেক অৱৰোধৰ সৃষ্টি হ’ব, যিটো ভাৰতৰ মাননীয় উচ্চতম ন্যায়ালয়, মাননীয় কেৰালা উচ্চ ন্যায়ালয়ৰ লগতে মাননীয় গুৱাহাটী উচ্চ ন্যায়ালয়ৰ বিভিন্ন ৰায়দানৰ দ্বাৰা অবৈধ আৰু অসাংবিধানিক বুলি ঘোষণা কৰা হৈছে।
লগতে পঢ়কঃ ‘কা’ৰ বিৰুদ্ধে সমগ্র ৰাজ্যত গণতান্ত্ৰিকভাৱে তীব্ৰ প্রতিৰোধ গঢ়ি তুলিবলৈ আহ্বান অসম বিৰোধী ঐক্যৰ
এই সন্দৰ্ভত মাননীয় গুৱাহাটী উচ্চ ন্যায়ালয়ে ১৯ মাৰ্চ ২০১৯ত ২০১৩/৭৫৭০ নিৰ্দেশৰ প্ৰতি আপোনালোকৰ দৃষ্টি আকৰ্ষণ কৰা হৈছে।
গতিকে ওপৰৰ কথাখিনি বিবেচনা কৰি তলত স্বাক্ষৰকাৰীয়ে আপোনাক আৰু আপোনাৰ সংস্থাক উক্ত ‘সৰ্বাত্মক হৰতাল’ প্ৰত্যাহাৰ কৰি ৰাজ্যখনৰ শান্তি বজাই ৰখাত সহযোগিতা কৰিবলৈ নিৰ্দেশ দিয়ে, যিটো ব্যৰ্থ হ’লে আইনী ব্যৱস্থা গ্ৰহণ কৰা হ’ব।
